ဗိက်၊ နဝ်ဝေမ်ဗာ (၁၇)
သၠုၚ်ပ္တိုန်အာအသိၚ်ဗတိုက် ဗဒိုပ်ကံၚ်ဇြဳပၞာန် မၞုံခရိုၚ်ဗိက် ရးဒေသဇၞော်တၞၚ်သြဳတအ်ရောၚ်ဂှ်ရ နကဵုညးဍုၚ်ကွာန်တအ် ညံၚ်ဂွံနွံကဵုသတိပရေၚ်ပၞာန်ညးသ္ကအ်ဂှ် ညးတာလျိုၚ် ဂကောံစဵုဒၞာညးဍုၚ်ကွာန် (ပကဖ) ပွိုၚ်ဍုၚ်တအ် ဗတိုက်ဖ္အောဝ်လဝ်ရ။
ဂကောံဇြဟတ်ပၠန်ဂတးတအ်ဂှ် သွက်ဂွံသၠုၚ်ပ္တိုန်အာ ပရေၚ်ချဳဒရာၚ်ပၞာန် ပ္ဍဲဗဒိုပ်ကံၚ်ဇြဳပၞာန် ပွိုၚ်ဍုၚ်ဗိက်၊ တၞၚ်သြဳ ကဵု ပွိုၚ်ဍုၚ်ကျောန်သုတအ်ဂှ် ပလေဝ်ပလေတ်ဒၟံၚ်တုဲ လ္ပာ်ကံၚ်ဇြဳပၞာန်လေဝ် ကၠောန်ပလေဝ်ပလေတ်ဒၟံၚ် သွက်ဂွံဒုၚ်ပၞာန်ရ။
အခိၚ်လၟုဟ်ပြဟ်ဟ်ဏံဂှ် စဗတိုက်ဒၟံၚ် ဒၞာဲဒပ်ကံၚ်ဇြဳပၞာန်တအ် ဖျေံလဝ်ဗဒိုပ်လ္ၚဵုဂှ်တုဲ လကြဴမ္ဂး သွက်ဂွံဝေၚ်အာပၞာန် စဵုကဵုပေါဲဗတိုက်သီဗဒိုပ် ပ္တိတ်ဒၟံၚ်ဇြဟတ်ရဂှ် ညးတာလျိုၚ်ပကဖ မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဟိုတ်နူသၠုၚ်ပ္တိုန်အာအသိၚ်ပၞာန်ဂှ်ရ နကဵုညးဍုၚ်ကွာန်တအ်လေဝ် ညံၚ်ဟွံဂွံအာကၠုၚ် ဗ္ဒာဲဗဒိုပ်ကံၚ်ဇြဳပၞာန်တအ်ကီု ပ္ဍဲအရာအာကၠုၚ်တိတ်တရဴလေဝ် မၚ်က္လၚ်ဒၟံၚ် ပရိုၚ်ပၞာန်တအ် အဆက်လ္ပကဵုပိုတ်တုဲ ချဳဒရာၚ်အာကၠုၚ်ညးသ္ကအ်ညိဂှ် ဗတိုက်ဖ္အောဝ်လဝ်ရ။
ဟိုတ်နူပရေၚ်ချဳဒရာၚ်ပၞာန် ဂကောံဇြဟတ်ပၠန်ဂတးတအ်တုဲ သ္ပတံနူဂိတုနဝ်ဝေမ်ဗာ ပထမသတ္တာဟဂှ် ပ္ဍဲပွိုၚ်ဍုၚ်ကျောန်သုကဵု ပွိုၚ်ဍုၚ်ဗိက်တအ်ဂှ် ဒပ်ကံၚ်ဇြဳပၞာန်ထ္ပက်လဝ်ပၞာန်တုဲ ထပ်ဂလိုပ်ပ္တိုန်လဝ် ဇြဟတ်ဂီုကၠီုရ။
ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၁၅) ဂှ်လေဝ် ပ္ဍဲကဵုဗ္ဒာဲကွာန်မှိုဲယှောၚ် ပွိုၚ်ဍုၚ်ဗိက်ဂှ် ဟိုတ်နူကရောၚ်ပၞာန်ကံၚ်ဇြဳပၞာန် ဒးဒုၚ်ဖံက်ခတိုဟ်လဝ်မာၚ်တုဲ ကောန်ဒပ်ကံၚ်ဇြဳပၞာန် ဟွံအောန်နူ (၅) တၠ ဇီုကပိုက်ဒးချိုတ်လဝ်ရ။
အတိုၚ်ပရိုၚ်ကၠုၚ်နူဍုၚ်ဗိက်မ္ဂး ဒပ်ကံၚ်ဇြဳပၞာန်ဂှ် ဟိုတ်နူပေါဲဗတိုက်အလုံမွဲဍုၚ်တုဲ ပ္ဍဲကဵုဍုၚ်ဗိက် မဒှ်ဍုၚ်ဇၞော်ပရေၚ်ပိုန်ဒြပ် ရးဒေသဇၞော်တၞၚ်သြဳဂှ် ပလေဝ်ပလေတ်လဝ် သွက်ဂွံဒုၚ်ပၞာန်တုဲ ပ္ဍဲဗဒိုပ်ကံၚ်ဇြဳပၞာန်တအ်လေဝ် ပြေၚ်လဝ်ဒပ်ရဂှ် ဂွံတီကေတ်ရ။
ပ္ဍဲပွိုၚ်ဍုၚ်ပလဝ်ကဵု ပွိုၚ်ဍုၚ်တၞၚ်သြဳ မဒှ်ပွိုၚ်ဍုၚ်ခရိုၚ်ဗိက် ပရေၚ်ချဳဒရာၚ် ဂကောံဇြဟတ်ပၠန်ဂတးတအ် ဇြဟတ်ခိုဟ်ဒၟံၚ်ဂှ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၂) တုဲကၠုၚ်တေံဂှ် ကံၚ်ဇြဳပၞာန် လလောၚ်တြးလဝ် နဒဒှ်ပရေၚ်အုပ်ဓုပ်ပၞာန်ရ။
ပရိုၚ် – သြၚ်လောန်တိုၚ်မ်
ဗီု -ပကဖ ဗိက်
sanlontai