ညးဍုၚ်ကွာန်တအ် လုပ်စိုပ်မံၚ်တန်တဴ ပ္ဍဲဍုၚ်ကဝ်လေန်မာန်ရဂှ် ဂကောံအုပ်ဓုပ်တအ်ကဵုလဝ်သမ္တီ

ကဝ်လေန် – နဝ်ဝေမ်ဗာ(၁၇)

ရးဒေသသက်ကိုၚ်၊ ပ္ဍဲပွိုၚ်ဍုၚ်ကဝ်လေန်ဂှ် ညးဍုၚ်ကွာန်တအ် လုပ်စိုပ်မံၚ်တန်တဴမာန်ရဂှ် ဂကောံပရေၚ်ပံၚ်ကောံပရေၚ်အုပ်ဓုပ်ခရိုၚ် လလောၚ်တြးပ္တိတ်လဝ် နကဵုစၟတ်တ္ၚဲ ဂိတုနဝ်ဝေမ်ဗာ စၟတ်တ္ၚဲ (၁၄) ရ။

ဂကောံပ္ညဳပ္ညပ်ပံၚ်ကောံခရိုၚ် ဆေၚ်ကဵုပရေၚ်အုပ်ဓုပ်ကာတၟေၚ်ခရိုၚ်ကဝ်လေန်ဂှ် ဥက္ကဋ္ဌကဝ်မတဳပရေၚ်အုပ်ဓုပ် ဒေသန္တရကာအကြာ သ္ကိုပ်ဝန်ဇၞော်မာန်​ဝေန်ခိုၚ်တာန် ဒက်ပ္တန်လဝ် နကဵုအသံပၟိၚ် စၟတ် ၁/၂၀၂၃ ရ။

ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၆) တုဲကၠုၚ်တေံဂှ် ဒပ်ပၞာန်ဗၠးၜးကောန်ဂကူကချေၚ် KIA၊ ဒပ်ပၞာန်စဵုဒၞာညးဍုၚ်ကွာန် PDF ၊ ဂကောံစဵုဒၞာညးဍုၚ်ကွာန် ပ.က.ဖ ကေုာံ ဂကောံပၠန်ဂတးပံၚ်ကောံတအ် ဗတိုက်သီကေတ်လဝ် ဍုၚ်ကဝ်လေန်ရ။

ဂကောံက္ဍိုက်က္ဍိုပ်ပရေၚ်ကောပ်ကာဲခရိုၚ် ဍုၚ်ကဝ်လေန် ဗတိုက်သီကေတ်လဝ်ဂှ် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၈) အခိၚ် (၃) နာဍဳ ဇိုၚ်သဝ်တ္ၚဲဂှ် ပြံၚ်စၠောံပ္အပ်ပြာပ်ကဵုလဝ် ဂကောံပံၚ်ကောံပ္ညဳပ္ညပ်ကာတၟေၚ်ခရိုၚ်ကဝ်လေန်ရဂှ် ဂွံတီကေတ်ရ။

ပ္ဍဲကဵုကာလပေါဲဗတိုက်သီဍုၚ်ဏံ ဟိုတ်နူအကာဲအရာပရေၚ်ဂီုကၠီုတုဲ ညးဍုၚ်ကွာန်ဒးပါဲဓလေတ်ဒၟံၚ်တအ်ဂှ် လုပ်စိုပ်မံၚ်တန်တဴဴ ပ္ဍဲဍုၚ်မာန်ရဂှ် ကဵုလဝ်သမ္တီရ။

ပရိုၚ် – သြၚ်လောန်တိုၚ်မ်

ဗီု – MOD (ဗီုပ္တိုန်လဝ်အလာံပၠန်ဂတး ပ္ဍဲရုၚ်ခရိုၚ်ကဝ်လေန်)