မတ်မလီု၊ နဝ်ဝေမ်ဗာ(၁၇)
တွဵုရးဍုၚ်မန်၊ ဌာန်ဂအုပ်ရးပၞာန်ဒိုဟ်အဂၞဲ ဖျေံသ္ဇိုၚ်ဍုၚ်မတ်မလီုဂှ် တ္ၚဲဏံ ပ္ဍဲအခိၚ်ဇိုၚ်သဝ်တ္ၚဲ ၜိုတ် (၆) နာဍဳဂှ် ဒးဒုၚ်ဗတိုက်လဝ်ကဵု လွဟ်ဇၞော်ဟွံသေၚ်မ္ဂး ဒးဒုၚ်ဗတိုက်လဝ်ကဵုဒရုမ်(ဗရုသာဲ)တုဲ ပရေၚ်ပန်ပှော် ဒှ်လဝ်ညးသ္ကအ်ရဂှ် ဂွံတီကေတ် အတိုၚ်ညးဒေသတအ် ဟီုဂးလဝ်ရ။
ဃောကၠောန်ဗဒှ်ဒၟံၚ်တ္ၚဲဒှ်မၞိဟ် မရနုက်ကဵု (၆၂) သၞာံ ပ္ဍဲကဵုဌာန်ဂအုပ်ရးပၞာန်ဒိုဟ်အဂၞဲဂှ် လွဟ်ဇၞော်ၜါမ ဒတုမ်စှ်ေပါ်ခတိုဟ်လဝ်တုဲ မွဲမဂှ် ဒတုံစှ်ေပါ်ခတိုဟ်လဝ် ပ္ဍဲဂတရးဌာန်ဂအုပ်ရးပၞာန် ဗ္ဒာဲဖျာရခိုၚ်ကုမ်ရ။
“လွဟ်ဇၞော်ၜါမ စှ်ေကၠာ၊ တုဲမှ ပရေၚ်ပန်ပှော်ၜါလ္ပာ် ဂွံမိၚ်ကေတ်ဆက်ဆက်ရ၊ အုအုသံၚ်သံၚ်ရ၊ ညးဂှ်လေဝ် ဟွံဂံၚ်တိတ်မ္ၚးပုဟ်”ဂှ် ညးဒေသရခိုၚ်ကုမ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ် ပ္ဍဲအခိၚ်ဗ္တံ (၆) နာဍဳရ။
ပါဲနူဂှ် အတိုၚ်ကောန်ဒေသမွဲတၠဂှ် ဟီုလဝ်မ္ဂး ဌာန်ဂအုပ်ရးပၞာန်ဒိုဟ်အဂၞဲ ဒးဒုၚ်ဗတိုက်လဝ်ကဵုဒရုမ်(ဗရုသာဲ)တုဲ ပ္ဍဲကဵုဂၠံၚ်ဒရုမ်ကၠုၚ်ဂှ် ဗက်ပန်လဝ်ကဵုလွဟ်ဂှ်ရ ပရေၚ်ပန်ပှော်လွဟ်ဇၞော် ဒှ်ကၠုၚ်ဆက်က်ရဂှ် ဟီုလဝ်ရ။
ပေါဲတ္ၚဲဒှ်မၞိဟ် ဌာန်ဂအုပ်ရးပၞာန်ဒိုဟ်အဂၞဲ ပရေၚ်ပန်ပှော်ဒှ်လဝ်ဂှ် ပါဲနူတၠကမၠောန်ပရေၚ်ပိုန်ဒြပ် နူတွဵုရးကရေၚ် တွဵုရးဍုၚ်မန်တအ်တုဲ သ္ကအ်ပွံၚ်ကံၚ်ဇြဳပၞာန်တအ်လေဝ် တိုန်စိုပ်ဒၟံၚ်ရဂှ် လ္ၚတ်ဂၠိုက်ဂၠာဲ ဂွံတီကေတ်လဝ်ရ။
ပ္ဍဲပရေၚ်ဌာန်ဂအုပ်ရးပၞာန်ဒိုဟ်အဂၞဲ ဒးဒုၚ်ဗတိုက်လဝ်ဏံ ပရေၚ်ဇီုကပိုက်ချိုတ်ဂျိုၚ်ကဵု စမြိုၚ်ဇီုကပိုက်ဒးလီုလာ်လဝ် နွံဟၟဲဂှ် နကဵုသြၚ်လောန်တိုၚ်မ် ဆက်လ္ၚတ်ဂၠိုက်ဂၠာဲဒၟံၚ်ဖိုဟ်ရ။
ကြဴနူဌာန်ဂအုပ်ရးပၞာန်ဒိုဟ်အဂၞဲ ဒးဒုၚ်ပန်လဝ်ကဵုလွဟ်ဇၞော်တုဲဂှ် ပ္ဍဲကဵုဒၞာဲလုပ်တိတ်ဍုၚ်မတ်မလီုတအ် လ္ပာ်ကံၚ်ဇြဳပၞာန် ကၟာတ်လဒဵုစၟဳစၟတ်ဒၟံၚ်ရဂှ် ဂွံတီကေတ် နူညးဒေသတအ်ရ။
ပ္ဍဲကဵုဂိတုမာတ်ချ် တုဲကၠုၚ်တေံလေဝ် ဌာန်ဂအုပ်ရးပၞာန်ဒိုဟ်အဂၞဲ ဗ္ဂပ်လဝ်သၞောတ်ဗတိုက်သရိုဟ်ဒရုမ်ဂှ် ဟိုတ်နူဒးဒုၚ်ဗတိုက်လဝ်ကဵု က္ၜၚ်ကျာမသက္ကုမၞိဟ်ဒဳအဇာဍောတ်တုဲ စမြိုၚ်လ္ၚဵု ဇီုကပိုက်ဒးလီုလာ် က္တဵုဒှ်လဝ်နွံရ။
ဟိုတ်နူပရေၚ်ပရောဏံတုဲ ကံၚ်ဇြဳပၞာန် ဗဒေါံဗျူလဝ် သ္ကိုပ်ဂအုပ်ဗိုလ်မျတာတ်တုဲ ခါန်ကၞက် အပ်ပြာပ်ကဵုလဝ်တာလျိုၚ် သ္ကိုပ်ၝောံဒပ် ဒပ်ပၞာန်တိုက် စၟတ်(၁၁) ဖျေံသ္ဇိုၚ်လဂုၚ် ဂအုပ်သ္ကိုပ်ဗိုလ်သိုဝ်မေန် နဒဒှ်သ္ကိုပ်ပၞာန်ရးရ။
ပရိုၚ် – သြၚ်လောန်တိုၚ်မ်
ဗီု – Social Media
sanlontai