ပ္ဍဲဍုၚ်ပေါက်တဝ် တွဵုရးရခေၚ် ကံၚ်ဇြဳပၞာန် သုၚ်စောဲပၞာန်ဍာ်၊ သီုပၞာန်ကျာတုဲ ဟိုတ်နူဗတိုက်ကၠုၚ်တုဲ ဒးဂြိပ်ဒဴပါဲဓလေတ်ဒၟံၚ် သီုအလုံမွဲဍုၚ်

ပေါက်တဝ်၊ နဝ်ဝေမ်ဗာ(၁၇)

ပ္ဍဲဍုၚ်ပေါက်တဝ် တွဵုရးရခေၚ် စလုပ်ဒၟံၚ်ပေါဲဗတိုက်သီဗဒိုပ်ကဵု ကောန်ဒပ်ကံၚ်ဇြဳပၞာန်တအ်ဂှ် တ္ၚဲဏံ ဂိတုနဝ်ဝေမ်ဗာ စၟတ်တ္ၚဲ (၁၆) အခိၚ်နူဂယးဂှ် ဒပ်ပၞာန်ရခေၚ် (AA) ထိၚ်ဒဝ်သီဂွံလဝ်တုဲ ခြာဟွံလအ်ဂှ် နူကဵုဒပ်ကံၚ်ဇြဳပၞာန် သုၚ်စောဲပၞာန်ဍာ်၊ သီုပၞာန်ကျာတုဲ ဟိုတ်နူပန်ပှော်ဒၟံၚ်တုဲ ညးဍုၚ်ကွာန်ဒၟံၚ်ကွာန်ပေါက်တဝ်တအ် ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ် နူညးဒေသတအ်ရ။

ကံၚ်ဇြဳပၞာန် သုၚ်စောဲက္ၜၚ်ပၞာန်၊ က္ၜၚ်ကျာသၞေၚ်ဝဲတအ်တုဲ ပန်ပှော်ဗတိုက်ဒၟံၚ် ပ္ဍဲဍုၚ်ပေါက်တဝ်ရ။

စဵုကဵုဂိတုနဝ်ဝေမ်ဗာ စၟတ်တ္ၚဲ (၁၆) အခိၚ်ဇိုၚ်သဝ်တ္ၚဲ မသုန်နာဍဳဂှ် ပန်ပှော်ဒၟံၚ်ဖိုဟ်ဏီတုဲ အလဵုဂကောံရဟိတလ္တူဍုၚ်တအ် ဟိုတ်နူဒးဂြိပ်ဒဴ ပါဲဓလေတ်ဒၟံၚ်တုဲ ဟွံဂွံတီကေတ် စရၚ်မၞိဟ်ချိုတ်ဂျိုၚ် ဒးလဝ်ဘဲကဵု စရၚ်ပရေၚ်လီုလာ် ချိုတ်တ်ပၠိုတ်တ်ဏီရဂှ်လေဝ် ဟီုလဝ်ရ။

ပ္ဍဲဗ္ဒာဲဍုၚ်ပေါက်တဝ်ဂှ် က္ၜၚ်ပၞာန်ပိဖ္ဍိုက်ကာတ်လုပ်ကၠုၚ်တုဲ က္ၜၚ်ၜါဖ္ဍိုက်ဂှ် ပန်ပှ်ောဒၟံၚ်တုဲ နူကဵုဍာန်ကျာလေဝ် ပန်ပှော်ဒၟံၚ်ကဵု က္ၜၚ်ကျာမွဲဖ္ဍိုက်ရဂှ် ညးတာလျိုၚ်ဂကောံပရဟိတ ဍုၚ်ပေါက်တဝ် Pauktaw Human Rescue-PTHR မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။

“ပရေၚ်ပန်ပှော်ကဵုက္ၜၚ်ကျာ ဒေါံဂွံလဝ် ၜိုတ်မသုန်မိနေတ် ညိကွေံဏီရ။ အကာဲအရာ ပရေံဒၟံၚ်ကွေံကွေံရ။ အကာဲအရာဇီုကပိုက် ဒးလဝ်ဘဲဝပ်တအ်ဂှ် ဟွံဂွံတီကေတ်ဏီပုဟ်။ ပ္ဍဲကဵုဍုၚ်ဂှ် ပၟတ်ဂဵုဒၟံၚ်တုဲ ၜိုတ်ဍစိုပ် ရီုဗၚ်ဒၟံၚ်ညးသ္ကအ်ရ။ မၞိဟ်နူကဵုဍုၚ်တအ်ဂှ် ပါဲဓလေတ်ဒၟံၚ် လ္ပာ်ကွာန်ညးသ္အအ်တုဲ။ အကာဲအရာဏံတှ်ေ အရၚ်မၞိဟ်ဂွံအောပ်မာ ဟၟဲပုဟ်။ ဘာလကျာ်တၞုၚ်ဍုၚ်တအ်ကဵု လ္ပာ်သၠာတ်တအ်ဂှ် ဒးဂြိပ်ဒၟံၚ်ယျ။ အလဵုပိုဲလေဝ် ဒးဂြိပ်ဒၟံၚ်ညးသ္ကအ်ရ” ဂှ် ညးဟီုလဝ်ရ။

တ္ၚဲဏံ ဂိတုနဝ်ဝေမ်ဗာ စၟတ်တ္ၚဲ (၁၆) အခိၚ်ဒေါဝ်တ္ၚဲ ၜိုတ် (၁) နာဍဳဂှ် နူကဵုဒပ်ကံၚ်ဇြဳပၞာန် သွက်ညးဍုၚ်ကွာန်တအ် ဂွံတိတ်ကဵုနူဍုၚ်ဂှ် ကဵုလဝ်အခိၚ် ပွိုၚ်မွဲနာဍဳရဂှ် ကံၚ်ဇြဳပၞာန်ဘပဠလဝ်တုဲ အခိၚ်ခြာဟွံလအ်ဂှ် က္ၜၚ်ကျာ၊ က္ၜၚ်ပၞာန်တအ် ပန်ဖျေံလဝ်လွဟ်ဇၞော်၊ လွဟ်ဍောတ် ပ္ဍဲကဵုကွာန်ဗ္ဒာဲဍုၚ်ပေါက်တဝ် ဆက်ဆက်ရဂှ် ဂွံတီကေတ်ရ။

ဗဒိုပ်ဗၠာဲသၟိၚ်ၝောံဍုၚ်ပေါက်တဝ်ဂှ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၅) အခိၚ်ဗ္တံ AA သီဂွံလဝ်တုဲ တ္ၚဲဏံ ဂိတုနဝ်ဝေမ်ဗာ စၟတ်တ္ၚဲ (၁၆) အခိၚ်နူဂယးဂှ်မ္ဂး ထိၚ်ဒဝ်ဂွံလဝ် ဌာဆေၚ်စပ်ကံၚ်ဇြဳပၞာန်သီုဖအိုတ်ရဂှ် ပရိုၚ်တိတ်ကၠုၚ်လဝ်ရ။ ကြဴနူဂှ် ပ္ဍဲအခိၚ်ဒေါဝ်တ္ၚဲဂှ်မ္ဂး နူကဵုကံၚ်ဇြဳပၞာန် ဗတိုက်ပန်ပှော်ကၠုၚ် သ္ကာတ်တ်မြဟ်ဟ် ဗီုလၟုဟ်ဏံရ။

ဆ္ဂး AA ဂှ်မ္ဂး ပရိုၚ်ထိၚ်ဒဝ်သီဂွံလဝ် ဍုၚ်ပေါက်တဝ်ဂှ် စဵုကဵုအခိၚ်လၟုဟ်ဏံ လလောၚ်တြးပ္တိတ်လဝ် ဗွဲမလုပ်သၞောဝ် ဟၟဲဏီရ။

ဍုၚ်ပေါက်တဝ်ဂှ် တ္ၚဲဏံ အခိၚ်နူဂယး (၁၀) နာဍဳပြၚ်ဂှ်လေဝ် ဟိုတ်နူကံၚ်ဇြဳပၞာန် ပန်ပှော်လဝ် လ္တူဍုၚ် ကဵုက္ၜၚ်ကျာၜါဖ္ဍိုက်ဏီဂှ်ရ ကောန်အရာပ်မွဲတၠ ဒလဝ်ဘဲဝပ် ပ္ဍဲက္ဍိုပ်ရဂှ် ဂွံတီကေတ်ရ။

ပ္ဍဲတွဵုရးရခေၚ်ဂှ် သ္ပတံနူ ဂိတုနဝ်ဝေမ်ဗာ စၟတ်တ္ၚဲ (၁၃) တုဲ ဒပ်ပၞာန်ရခေၚ် (AA) ကဵု ဒပ်ကံၚ်ဇြဳပၞာန်တအ် ပေါဲဗတိုက်က္လေၚ်က္တဵုဒှ်ဒၟံၚ်ရ။ သီဂွံလဝ် ဗဒိုပ်ပၞာန်မၚ်ပယျဵုကံၚ်ဇြဳပၞာန်လ္ၚဵုဂှ်ကဵု ဗဒိုပ်ဗၠာဲသၟိၚ်တအ်တုဲ ဗဒိုပ်ဗၠာဲသၟိၚ် (၄၀) ဗဒိုပ်ပြၚ်ဂှ်လေဝ် ထောံလဝ်တုဲ ဆုဲပြံၚ်အာမံၚ်ဒၟံၚ် ပ္ဍဲကဵုဗဒိုပ်ကံၚ်ဇြဳပၞာန် ကြပ်ညောန်တအ် ညးသ္ကအ်အိုတ်ရ။

ညးမၞုံအခေါၚ်ဟီုဂးကံၚ်ဇြဳပၞာန် သ္ကိုပ်ဗိုလ်ဇြဝ်မေန်ထောန်ဂှ်မ္ဂး ပ္ဍဲကဵုတွဵုရးရခေၚ်ဂှ် ဗဒိုပ်ဗၠာဲသၟိၚ် ဇြဟတ်ဍိုန်တအ်ဂှ် အတိုၚ်ဗျူဟာပၞာန် ညံၚ်ဂွံဒှ်မွဲဂကောံမွဲကလောံဓဝ်ဂှ် ပံၚ်ပကောံလဝ်ရဂှ် ဟီုဂးလဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၄)ဂှ်ရ။

ပရိုၚ် – သြၚ်လောန်တိုၚ်မ်

ဗီု -CJ