ဂျဳနဳဗာ၊ နဝ်ဝေမ်ဗာ ၂၃
ပပ္တံနူအခိၚ်ပၞာန်ၜက်ၜေတ်ရုယှာစတုဲဂှ် ပ္ဍဲဍုၚ်ယူကရုၚ် ကောန်အရာပ်မွဲဠက်ပြၚ် ချိုတ်အာလဝ်တုဲ ပ္ဍဲကဵုဏံ ၜိုတ်ကဝက်ဂှ်ဝွံ ဒှ်နူကဵုဒၞါဲမသ္ၚောဲနူကဵု မုက်ပၞာန်တံရောၚ်ဂှ် ပ္ဍဲဂိတုနဝ်ဝေမ်ဗာ ၂၁ တေံ ရုၚ်အခေါၚ်အရာမၞိဟ်ကုလ လလောၚ်ပ္တိတ်လဝ်ရ။
မေတ်ယှေန်အခေါၚ်အရာမၞိဟ်ကုလသမဂ္ဂဂှ် ကုမၞိဟ်မချိုတ်အာတံဂှ် ထပ်သ္ပဒတန်ဒၟံၚ်တုဲ လၟိဟ်မၞိဟ်ချိုတ်ဍာံဍာံဂှ်ဝွံ ဂၠိုၚ်နူကဵုစရၚ် မကံက်ကပှ်ဂွံလဝ်တံဏီဂှ်လေဝ် သ္ဂးလဝ်ရ။
တၚ်နၚ်တံဏံဝွံ ကြဴနူလုပ်စိုပ်ၜက်ၜေတ်တုဲ အပ္ဍဲဂိတုပထမဂမၠိုၚ်ဂှ် ညံၚ်ရဴပေါဲဗ္တိုက်သ္ဂောံထိၚ်ဒက် ဍုၚ်မာရဳယာပူ မဒှ်ဒၞါဲညးဒေသတံ ဒုၚ်လဝ်စဳရေၚ် ကောန်အရာပ်ချိုတ်ဂျိုၚ် သၠုၚ်လဝ်တံဂှ် ပါလုပ်ရ။
“ပေါဲပၞာန် ရုယှာဖေဝ်ဒရေယှေန် မဗ္တိုက် ကုယူကရုၚ်ဂှ်ဝွံ လၟုဟ်မ္ဂး လုပ်ကၠုၚ်အပ္ဍဲ ၂၁ ဂိတုယျတုဲ ကရောံမၞိဟ်ချိုတ်ဂျိုၚ်ဂၠိုၚ် သ္ဇက်ဒးဖေက်လကိုတ်ဂှ် ပြံၚ်လှာဲအာဗီုပြၚ် ပဋိပက္ခဂၠိၚ်သ္ၚောဲတံမာန်ရောၚ်” ဂှ် ဒါန်နဳယဴ ညးက္ဍိုက်ပ် မေတ်ယှေန်ပရေၚ်မၚ်ရံၚ်ဂှ် ဟီုဂးလဝ်ရ။
သ္အာၚ်နူဂှ်ပၠန် ကောန်အရာပ် မ္ဒးချိုတ်အာ ၜိုတ်မွဲဠက်ဂှ်ဝွံ သွက်ယူကရုၚ်ဂှ် ဒှ်တိုၚ်သမ္တီ ပရေံပရေံမွဲရောၚ်ဂှ်လေဝ် ညးဟီုလဝ်ဏီရ။
ညးမချိုတ်အာဗွဲမဂၠိုၚ်ဝွံ ဟိုတ်နူလွဟ်ဇၞော် မသ္ကဵုဇီုကပိုက်တဴဇၞော်ကဵုဇြဟတ် ညံၚ်ရဴကမ်လှောဝ်တံကဵု ကလက်သတာဗမ်တံရောၚ်ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် ကုလသမဂ္ဂဂှ်ရ။
အပ္ဍဲပွိုၚ်ပိဂိတုတုဲကၠုၚ်တေံ ပ္ဍဲကဵုမ္ဒးချိုတ်အာ ဗ္ဒါဲကဝက်ဂှ်ဝွံ ဒှ်ပ္ဍဲကဵုဒၞါဲ မစုက်လုက်ကဵု မုက်ပၞာန်တံဂှ်တုဲ ဟိုတ်နူကောန်ဒပ်ရုယှာတံ သုၚ်စောဲကမ်လှောဝ်ပန်ခြာဇမ္ၚောဲတံကဵု လွဟ်လက်နက် မတာဒၞါလဝ်တံ ဗ္တိုဟ်ထ္ကးအာရောၚ်ဂှ် ဂွံတီကေတ်ရ။
ညးဇၞော်ဗျုထဴ အခက်အခုဲနွံ သွက်ဂွံဆုဲပြံၚ် ဒၞါဲဂီုကၠီုတံ မ္ဒးချိုတ်အာဂှ်ဝွံ ပါလုပ်ဒၟံၚ် သၠုၚ်အိုတ်ဂှ် ဂွံတီကေတ် အတိုၚ်တၚ်နၚ် ညးမၚ်ရံၚ်လ္ၚတ်တံရ။
ၜိုန်ရကောန်အရာပ်ချိုတ်တံ သၠုၚ်တိုန်ဒၟံၚ်ကီုလေဝ် ရုယှာဂှ်တှ်ေ စွံပွန်ကုကောန်အရာပ်တုဲ ဗ္တိုက်လဝ်ဟွံသေၚ်ပုဟ်ဂှ် ကယျာန်ပါဲလဝ်ရ။
Ref: Reuters
sanlontai