ပ္ဍဲရးတၞၚ်သဳ အပ္ဍဲသၞာံဏံ သ္ၚိဒၟံၚ် ဗ္ဒါဲ ၇၅၀ ဒးဒုၚ်စံၚ်ပလီုပလာ်

တၞၚ်သဳ၊ နဝ်ဝေမ်ဗာ ၂၃

ပ္ဍဲရးတၞၚ်သဳ ပ္ဍဲသၞာံဏံ နူဂိတုဂျာန္နဝါရဳ စဵုကဵုဂိတုနဝ်ဝေမ်ဗာ သတ္တာဟတတိယဂှ် ဒပ်ကံၚ်ဇြဳပၞာန် စံၚ်ပလီုပလာ်လဝ် သ္ၚိဒၟံၚ် ဗ္ဒါဲ ၇၅၀ ဂှ် ဂွံတီကေတ် အတိုၚ်တၚ်လလောၚ်တြး ဂကောံဗၠးၜးအပ္ဍဲဒေသဂမၠိုၚ် ကေုာံ ဂကောံသုတေသန FE5 Tanintharyi တံရ။

ပရေၚ်ဒးဒုၚ်စံၚ်ပလီုသ္ၚိဌာန်ဂှ်ဝွံ ပ္ဍဲဂိတုနဝ်ဝေမ်ဗာဏံဂှ် နူကဵုပွိုၚ်ဍုၚ်ဍာ်ဗု၊ လံၚ်လုၚ် ကေုာံ ပွိုၚ်ဍုၚ်ကအ်သံၚ်တံဂှ် ဒးဒုၚ်စံၚ်ပလီုပလာ်လဝ် သ္ၚိဒၟံၚ် ၃၀ မပြၚ်တုဲ ဒေသသှ်ေလ္ၚဵုတံဂှ်လေဝ် ဒးဒုၚ်စံၚ်ပလီုပလာ်တံ နွံဒၟံၚ်ရ။

ဒပ်ကံၚ်ဇြဳပၞာန်ဝွံ အခိၚ်ထ္ပက်ဒၟံၚ်ကရောၚ်ပၞာန် အပ္ဍဲကွာန်တံဂှ် စံၚ်ပလီုပလာ် သ္ၚိဒၟံၚ်တံကီု၊ ဟိုတ်နူပရေၚ်ဗ္တိုက်ဂကောံဇြဟတ်ပၠန်ဂတးတံတုဲ ကလိလောန်လဝ် ပွမစံၚ်ပလီုပလာ် ကုကွာန်မၞုံပွဳပွူဗ္ဒါဲဗ္ဒါဲတံဂှ်ရ။

တုဲကၠုၚ် ပ္ဍဲဂိတုအံက်တဝ်ဗာတေံဂှ်လေဝ် သ္ၚိဒၟံၚ်နူကဵုပွိုၚ်ဍုၚ်ဍာ်ဗု၊ လံၚ်လုၚ်၊ တယိတ်ချံၚ် ကေုာံ ပွိုၚ်ဍုၚ်ပဠဝ် ၄၄ မ စံၚ်ပလီုပလာ်လဝ်တုဲ လၟိဟ်ပမာဏဏံဝွံ ယဝ်ရးဒးၜတ်ကၞာတ်ကဵု ပိဂိတုတုဲကၠုၚ်တေံမ္ဂး ဒးဒုၚ်စံၚ်ပလီုပလာ်ဂၠိုၚ်အိုတ်ရောၚ် မဒှ်ရ။

စံၚ်ပလီုပလာ်သ္ၚိဒၟံၚ်တံဂှ်ဝွံ နကဵုညးဍုၚ်ကွာန်တံ ညံၚ်ဂွိုအ်ထံက်ဂလာန် ကုဂကောံဇြဟတ်ပၠန်ဂတးတံမာန် ဒှ်ဂၠံၚ်တရဴ လ္ပာ်ဒပ်ပၞာန်တံ ထ္မံက်ဒၟံၚ်ရုပ်ရဴမွဲရောၚ်ဂှ် ညးတာလျိုၚ် ပကဖ ရးတၞၚ်သဳ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ်ကံၚ်ဇြဳပၞာန်ဝွံ ကၠာဂွိုအ်စံၚ်ပလီု သ္ၚိဒၟံၚ်တံဂှ် ကိုပ်ကၠာအိုတ် လုပ်စိုပ်ဂၠိုက်ဂၠါဲ ကပေါတ်မၞုံကဵုၚုဟ်မး အပ္ဍဲသ္ၚိတံဂှ်တုဲ ကေတ်ဏာတံဂှ်ကီု၊ ကေတ်ဏာတိရစ္ဆာန်လွဳလဝ်ဂမၠိုၚ် နကဵုအတေၚ်အဓမ္မတံဂှ်လေဝ် ကလိလောန်ဒၟံၚ်နွံဂှ် ဂွံတီကေတ် အတိုၚ်ဂလာန်ညးဒေသတံရ။

အတိုၚ်ဂလာန် FE5 Tanintharyi ဂှ်မ္ဂး ပ္ဍဲရးတၞၚ်သဳဂှ် နူကဵုပွိုၚ်ဍုၚ်ပဠဝ် ကေုာံ ပွိုၚ်ဍုၚ်လံၚ်လုၚ် ဒၞါဲပေါဲဗ္တိုက်အကြာကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ မက္တဵုဒှ်ဒၟံၚ်မွဲဏှမွဲဏှတံဂှ် ဒးဒုၚ်စံၚ်ပလီုပလာ်လဝ် သ္ၚိဒၟံၚ်ဂၠိုၚ်အိုတ်ရောၚ်ဂှ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု− CJ