ပ္ဍဲတိဍာ် KNU ဒပ်မဟာ ၃ ဟိုတ်နူဒးဒုၚ်ဗတိုက်ကဵုက္ၜၚ်ကျာ ကောန်အရာပ် (၄) တၠ ပါလုပ်သီုကောန်ၚာ် (၂) တၠ ဇီုကပိုက်ဒးလဝ်ဝပ်

မုမ်၊ နဝ်ဝေမ်ဗာ(၂၄)

ပ္ဍဲပွိုၚ်ဍုၚ်မုမ်ကဵု ပွိုၚ်ဍုၚ်ကျောက်ဂျဳ တိဍာ်ဒပ်မဟာ (၃) ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU တအ်ဂှ် ဟိုတ်နူဒပ်ကံၚ်ဖြဳပၞာန် ဗတိုက်လဝ်ကဵုက္ၜၚ်ကျာ ပွိုၚ်ၜါတ္ၚဲ ဆက်ဆက်တုဲ ကောန်အရာပ် (၄) တၠ ပါလုပ်သီုကောန်ၚာ် (၂) တၠ ဇီုကပိုက်ဒးလဝ်ဘဲဝပ်ရဂှ် ဗဟဵု KNU လလောၚ်တြးလဝ်ရ။

ဂိတုနဝ်ဝေမ်ဗာ ပ္ဍဲစၟတ်တ္ၚဲ (၂၀) ကဵု စၟတ်တ္ၚဲ (၂၁) ဂှ် ပ္ဍဲကဵုကွာန်မပ္တံကဵု ဝေတ်တူအနောက်၊ တေန်ကာန်ပေန်၊ ဇြလုပ်ဂျဳ၊ ယှာပေန်ချောၚ်၊ မညုၚ်သု၊ ၚာဇြဳလှဝ်၊ တေဝ်သု၊ တေဝ်ကုမ်၊ ၚနွာဇြုက် မဒှ်ကွာန် ပ္ဍဲပွိုၚ်ဍုၚ်မုမ် KNU တအ်ဂှ် ဒပ်ပၞာန်ကျာကံၚ်ဇြဳပၞာန် ဗတိုက်လဝ်ကဵုက္ၜၚ်ကျာ ပွိုၚ်ၜါတ္ၚဲ ဆက်ဆက်ရ။

ပ္ဍဲကဵုပရေၚ်ဗတိုက်ပန်လဝ်ကဵုက္ၜၚ်ကျာဏံ က္ၜၚ်ကျာဂျေတ်ဖိုက်တာ က္ၜၚ်ကျာသၞေၚ်ဝဲကံၚ်ဇြဳပၞာန်တအ်ဂှ် ပန်လဝ်ကဵု လွဟ်စက် (၆) ဝါ၊ ဂြာတ်ထောံဖျေံလဝ် ဗုမ် (၆) ဝါ ပ္ဍဲကဵုအပံၚ်လၟိဟ် (၁၂) ဝါဂှ် ဂြာတ်ထောံဖျေံလဝ်ဗုမ် လျိုၚ် ၅၀၀ ပံၚ် (၇) မတုဲ ပန်လဝ်ကဵုလွဟ်စက် ဂၠိုၚ်ကဵုမရဂှ် ဓမံက်လဝ် ပ္ဍဲတၚ်လလောၚ်တြးရ။

ဟိုတ်နူပန်ပှော်ဗတိုက်လဝ်ကဵုက္ၜၚ်ကျာတုဲ ကောန်အရာပ်ညးဍုၚ်ကွာန် (၄) တၠ ပါလုပ်သီုကောန်ၚာ် အယုက် (၅) သၞာံလ္ပာ်သၟဝ် (၂) သီုကဵုမၞိဟ်ဗြဴမွဲတၠ နူကဵုကွာန်ၚနွာဇြုက်တအ် ဒးလဝ်ဘဲဝပ်ညးသ္ကအ်တုဲ ဂၠဴ (၂) သီုပြေၚ်(၁) ဇီုကပိုက်ဒးလဝ်ဘဲဝပ်တုဲ သ္ၚိဌာန်တအ်လေဝ် ဒးလွဟ်မကမ်တုဲ ဒးလီုလာ်လဝ်ရဂှ် လလောၚ်တြးလဝ်ရ။

သ္အာၚ်နူဂှ်ပၠန် ပ္ဍဲပွိုၚ်ဍုၚ်ကျောက်ဂျဳ တိဍာ်ဒပ်မဟာ – ၃ KNU ဂှ် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၁၆) ကဵု စၟတ်တ္ၚဲ (၂၀) တေံဂှ် ဒပ်ကံၚ်ဇြဳပၞာန် သုၚ်စောဲက္ၜၚ်ကျာသၞေၚ်ဝဲပၞာန် ပန်ပှော်လဝ် ပ္ဍဲကွာန်တေဝ်ကုမ် (၆) ဝါတုဲ ပ္ဍဲကဵုကွာန်တမေန်အေန်ကုမ်ဂှ်လေဝ် ဂြာတ်ထောံဖျေံလဝ်ဗုမ် (၂) မ နကဵု က္ၜၚ်ကျာပၞာန်ဂျေတ်တုဲ ပန်လဝ်ကဵုလွဟ်စက် (၂) ဝါရ။

ဟိုတ်နူဒပ်ကံၚ်ဇြဳပၞာန် ပန်ပှော်ဗတိုက်လဝ်ကဵုက္ၜၚ်ကျာတုဲ သ္ၚိဒၟံၚ်ညးဒေသ နူကဵုကွာန်တမေန်အေန်ကုမ် မွဲတၠဂှ်လေဝ် ဒးလဝ်ဗုမ် တူပၟတ် ဒှ်အာပတေၚ်ရဂှ် ဂွံတီကေတ် နူတၚ်လလောၚ်တြးရ။

ပ္ဍဲကဵုခရိုၚ်ညံၚ်လေဝ်ပေန် KNU ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ပေါဲဗတိုက်ဆေၚ်မုက် ဒှ်ဒၟံၚ်ခြာဟွံလအ်ဟွံလအ်တုဲ ဟိုတ်နူဒပ်ကံၚ်ဇြဳပၞာန် ပ္တဝ်လဝ်ဗတိုက်ဒၟံၚ်တုဲ ကောန်အရာပ်ညးဍုၚ်ကွာန်တအ် ဇီုကပိုက် ဒးချိုတ်ဒၟံၚ်နွံရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

ဗီု -KNU