ၜဳကလေၚ်၊ နဝ်ဝေမ်ဗာ (၂၆)
ဟိုတ်နူပရိုၚ်ဂကောံဇြဟတ်ပၠန်ဂတးတအ် ချဳဒရာၚ်ပေါဲဗတိုက်သီဍုၚ် သီဗဒိုပ်တုဲ ဗဒိုပ်ဗၠာဲသၟိၚ်မၞုံကွာန်ဝၚ်က ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ် လ္ပာ်ကံၚ်ဇြဳပၞာန် သီရုပ်လဝ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၂၄) တေံဂှ် ကံၚ်ဇြဳပၞာန် ပြံၚ်ပဆုဲလဝ် ကောန်ဒပ်ဗၠာဲသၟိၚ် သီုဂကောံအိန်ထံၚ်တအ် ပ္ဍဲဗဒိုပ်ဗၠာဲသၟိၚ်တောၚ်ဇြောန်တုဲ ပံၚ်ပကောံလဝ်ဇြဟတ်ရဂှ် ဂွံတီကေတ်ရ။
ဗဒိုပ်ဗၠာဲသၟိၚ်ဝၚ်က ကံၚ်ဇြဳပၞာန် ဗလးထောံလဝ်တဲဏံဂှ် ဒှ်ဗဒိုပ်ဗၠာဲသၟိၚ် ဇြဟတ်ကောန်ဒပ် နွံၜိုတ် (၁၀) တၠဓဝ်ဟေၚ်တုဲ ပ္ဍဲမွဲကာလဒပ်ပၞာန်သီအဝဵုဏံ ဂကောံဇြဟတ်ပၠန်ဂတးတအ် ကၠုၚ်စိုပ်ဗတိုက်ဒၟံၚ် ခြာဟွံလအ်ဟွံလအ်ရ။
ပ္ဍဲတ္ၚဲဂှ်ဟေၚ် ကံၚ်ဇြဳပၞာန် ပဆုဲပြံၚ်လဝ် ညးယိုက်ဝန်ထံၚ် မၞုံပ္ဍဲဗဒိုပ်ထံၚ်စာတ်တောၚ်ဇြောန် ပွိုၚ်ဍုၚ်ၜဳကလေၚ်တအ်ကဵု ကောန်ထံၚ်တအ် ပ္ဍဲထံၚ်စာတ်မုက်ပြေၚ်တုဲ ပ္ဍဲကဵုထံၚ်စာတ်တောၚ်ဇြောန်ဂှ်မ္ဂး ကောန်ဒပ်ကံၚ်ဇြဳပၞာန်ကဵု ကောန်ဒပ်ဗၠာဲသၟိၚ်လ္ၚဵုတအ် ဖျေံလဝ်ဗဒိုပ်ရဂှ် ဂွံတီကေတ် အတိုၚ်ညးဒေသတအ်ဟီုထ္ၜးလဝ်ရ။
ကံၚ်ဇြဳပၞာန် ဒးဗလးလဝ်တဲ ဗဒိုပ်ဗၠာဲသၟိၚ်ဝၚ်ကဂှ် ပ္ဍဲကဵုရုၚ်ဒပ်ဗၠာဲသၟိၚ်ကဵု ဗဒိုပ်ဗၠာဲသၟိၚ်ၝောံဍုၚ်တအ်ဂှ် သွက်ပၞာန်ဒုၚ် သိုၚ်ခၞံလဝ်ဗာန်ကာတအ် ခိုၚ်ၚ်ကၠိုက်က်တုဲ ပ္ဍဲကဵုပ္ဍဲဍုၚ် မ္ၚးဍုၚ်တအ်လေဝ် ဖျေံဂလိုၚ်လဝ် ဒပ်ကၚ်ရ။
သ္အာၚ်နူဂှ်ပၠန် ပ္ဍဲကဵုဗ္ဒာဲသၞေဟ်ကၚ်ဇြဳပေန် ပရေၚ်စၟဳစၟတ်လုပ်ဍုၚ်၊ ဒၞာဲသၞေဟ်ကၚ်တြေံ ၜဳကလေၚ်ဂှ်လေဝ် ဂလိုၚ်လဝ်ဇြဟတ်ဂီုကၠီုတုဲ ပတေၚ်ဂြတ်လဝ် ပရေၚ်စၟဳစၟတ်ဂၠိုက်ဂၠာဲရဂှ် ညးအာတရဴတအ်ဟီုလဝ်ရ။
ပ္ဍဲမွဲၜါတ္ၚဲကၠုၚ်တေံလေဝ် ကံၚ်ဇြဳပၞာန် စကာကဵုဂကောံအိန်ထံၚ်ညညးယိုက်ဝန်ဌာနမဆေၚ်စပ်တအ်ကဵု အိန်ထံၚ်ဗၠာဲသၟိၚ်တအ် ဆုဲပြံၚ်လဝ် ပ္ဍဲအရာပ်လ္ပာ်မ္ၚး နူကဵုသ္ၚိဌာန်ညးယိုက်ဝန်တအ်ရ။
ပ္ဍဲမွဲကာလဒပ်ပၞာန်သီအဝဵုဏံ ကံၚ်ဇြဳပၞာန် ပ္ဍဲတွဵုရးဍုၚ်မန်ဂှ် ဗဒိုပ်ဗၠာဲသၟိၚ် မၞုံပ္ဍဲပွိုၚ်ဍုၚ်ရေဝ်၊ ဇြပ်ဗု၊ ကျာ်ထဝ်ကဵု ၜဳကလေၚ်လ္ၚဵုတအ် ဒးဗလးလဝ်တဲရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
ဗီု – MOI
လိက်စၞောန်ဗီု – ဗီုဂွံညာတ်ကေတ် ကောန်ဒပ်ဗၠာဲသၟိၚ်တွဵုရးဍုၚ်မန် ဃောပြေၚ်ဒၟံၚ်ဒပ်။
sanlontai