ကအ်ကြိက်၊ နဝ်ဝေမ်ဗာ(၂၆)
သွက်ညးပါလုပ်ဒၟံၚ် ပ္ဍဲယန္တရာပရေၚ်အုပ်ဓုပ်ကံၚ်ဇြဳပၞာန် ပ္ဍဲပွိုၚ်ဍုၚ်ကအ်ကြိက် တွဵုရးကရေၚ်သီုဖအိုတ်တအ် ဂွံစ္ဍးတိတ်အာ ကြဴနူ KNU ကဵုကၠုၚ်သမ္တီ အလန်လကြဴအိုတ်တုဲဂှ် ညးယိုက်ဝန်လ္ၚဵု ကၠုၚ်စိုပ်ဗ္ဒဗ္ဒာဲဒၟံၚ် ပ္ဍဲတိဍာ် KNU တအ်လေဝ် နွံရဂှ် ဂွံတီကေတ် အတိုၚ်လဟီု တံရိုဟ်ပရိုၚ်တအ် ဟီုဂးလဝ်ရ။
နကဵုညးမပါလုပ်ဒၟံၚ် ပ္ဍဲယန္တရာ နွံသၟဝ်ပရေၚ်အုပ်ဓုပ်ဒပ်ပၞာန် ပ္ဍဲဍုၚ်ကျာ်ဍုၚ်၊ ဍုၚ်ဝဝ်လေဝ်၊ ဍုၚ်သုကလိ၊ ကေုာံ ဍုၚ်ကအ်ကြိက် မၞုံပွိုၚ်ဍုၚ်ကအ်ကြိက် တွဵုရးကရေၚ် ခရိုၚ်ဒူပလာယာသီုဖအိုတ်တအ်ဂှ် ပ္ဍဲပွိုၚ်မွဲသတ္တာဟ သွက်ဂွံစ္ဍးတိတ်အာညးသ္ကအ် ကဝ်မတဳဒ္တန် KNU ပွိုၚ်ဍုၚ်ကအ်ကြိက် လလောၚ်တြးလဝ် တၚ်ကဵုသတိ ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၇) ရ။
ကြဴနူလလောၚ်တြးပ္တိတ်လဝ် တၚ်ကဵုသတိတုဲဂှ် ညးယိုက်ဝန်သၟဝ်တဲကံၚ်ဇြဳပၞာန် မၞုံပ္ဍဲတိဍာ်ပရေၚ်အုပ်ဓုပ် ကအ်ကြိက် – KNU လ္ၚဵုတအ်ဂှ် စ္ဍးတိတ်အာ နူဍုၚ်ညးတအ်မံၚ်တန်တဴဒၟံၚ်ဂှ်တုဲ ကၠုၚ်စိုပ် လုပ်ဗ္ဒဗ္ဒာဲဒၟံၚ် ပ္ဍဲတိဍာ် KNU နွံရဂှ် တံရိုဟ်ပရိုၚ် စုက်လုက်ကဵု KNU တအ် ဟီုလဝ်ရ။
ပ္ဍဲကဵုညးကၠုၚ်စိုပ် လုပ်ဗ္ဒဗ္ဒာဲဒၟံၚ် ပ္ဍဲတိဍာ်အုပ်ဓုပ် KNU တအ်ဂှ် သ္ကိုပ်ပရေၚ်အုပ်ဓုပ် ကေုာံ ညးယိုက်ဝန်ကံၚ်ဇြဳပၞာန်လ္ၚဵုတအ် ပါလုပ်ဒၟံၚ်တုဲ ဟွံဂွံတီကေတ် လၟိဟ်ချိုတ်တ်ပၠိုတ်တ်ဏီရဂှ် ဟီုလဝ်ရ။
အတိုၚ်ညးစုက်လုက်ကဵုကံၚ်ဇြဳပၞာန်တအ် ဟီုထ္ၜးလဝ်မ္ဂး သ္ပတံနူမွဲၜါတ္ၚဲတုဲကၠုၚ်တေံတုဲ ညးယိုက်ဝန်ကံၚ်ဇြဳပၞာန် မၞုံလ္တူဍုၚ်ကအ်ကြိက်လ္ၚဵုဂှ် စ္ဍးတိတ်ဒၟံၚ်နွံတုဲ ပ္ဍဲကဵုရုၚ်ဌာနဆေၚ်စပ် လ္တူဍုၚ်တအ်ဂှ် ညးယိုက်ဝန်တအ် ဟၟဲဒၟံၚ်ဂၠိုၚ်ရဂှ် ဂွံတီကေတ်ရ။
ပြဟ်ဟ်ဏံ ဟိုတ်နူအကာဲအရာပၞာန်တုဲ ကောန်ဒေသ ညးဍုၚ်ကွာန် မၞုံလ္တူဍုၚ်ကအ်ကြိက် ဗွဲမဂၠိုၚ်တအ်ဂှ် ဆုဲပြံၚ်မံၚ်တန်တဴဴကၠုၚ် ပ္ဍဲလ္ပာ်ဒေသတၞဟ်တုဲ ပ္ဍဲကဵုဍုၚ်ကအ်ကြိက်ဂှ်လေဝ် လ္ၚုလ္ၚန်သ္ၚိတ်ဇြဒၟံၚ်ရဂှ် ညးဒေသတအ်ဟီုလဝ်ရ။
အခိၚ်လၟုဟ်ဏံမ္ဂး ဟိုတ်နူပရိုၚ် ဂကောံပၠန်ဂတးပံၚ်ကောံတအ် လုပ်စိုပ်ဗတိုက် ဍုၚ်ကအ်ကြိက်တုဲ လ္ပာ်ကံၚ်ဇြဳပၞာန် ပလေဝ်ပလေတ်လဝ်ပၞာန်ဒုၚ် ခိုၚ်ၚ်ရဂှ် ဂွံတီကေတ် အတိုၚ်လဟီုတံရိုဟ်ပရိုၚ် သ္ဇိုၚ်တိဍာ်ဂှ် ဟီုလဝ်ရ။
ပရိုၚ် – သြၚ်လောန်တိုၚ်မ်
ဗီု- CJ
sanlontai