ပ္ဍဲကအ်သြံၚ် ဒပ်ကံၚ်ဇြဳပၞာန် ဒးဒုၚ်ကြတ်ဗတိုက်လဝ်တုဲ ချိုတ်လဝ် (၃) တၠ

ကအ်သြံၚ်၊ နဝ်ဝေမ်ဗာ (၂၆)

ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ဗ္ဒာဲဂကောံသ္ၚိစှ် ကွာန်မလိဝါန်၊ ပွိုၚ်ဍုၚ်ကအ်သြံၚ်၊ ရးဒေသတၞၚ်သြဳဂှ် ဟိုတ်နူဒးဒုၚ်ကြတ်ဗတိုက်လဝ်တုဲ ကောန်ဒပ်ကံၚ်ဇြဳပၞာန် ဒးချိုတ်လဝ် (၃) တၠရဂှ် ဂွံတီကေတ် နူဇရေၚ်ပကဖပွိုၚ်ဍုၚ်ရ။

ကရောၚ်ပၞာန်ကံၚ်ဇြဳပၞာန် တံဒပ်ပၞာန်တိုက် စၟတ် (၂၈၈) ဖျေံသ္ဇိုၚ်ခမောက်ဂျဳ ဇြဟတ်ပါလုပ်ဗ္ဒာဲ (၅၀) နူကဵုဍာန်ဍာ်မွဲကဆံၚ် ဃောလုပ်ကၠုၚ် ပ္ဍဲလ္ပာ်ကွာန်မလိဝါန် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၄) ဂှ် ဒးဒုၚ်ကြတ်ဗတိုက်လဝ်ရ။

ဟိုတ်နူပရေၚ်ဗတိုက်ပန်ဏံတုဲ ပရေၚ်ပန်ပှော်ၜါလ္ပာ် ဒှ်လဝ် ဗ္ဒာဲပွိုၚ် (၁၅) မိနေတ်တုဲဂှ် လ္ပာ်ဂကောံဇြဟတ်ပၠန်ဂတးတအ် ပရေၚ်ဇီုကပိုက်ဒးလဝ် ဟၟဲမွဲသာ် ကလေၚ်ဆုတ်တိတ်အာလဝ်ရ။

ပ္ဍဲပေါဲဗတိုက်ၜါလ္ပာ်ဏံ ကောန်ဒပ်ကံၚ်ဇြဳပၞာန် ဒးချိုတ်လဝ် (၃) တၠ မၞိဟ်ဒးလဝ်ဘဲဝပ် နွံဗွဲမဂၠိုၚ်တုဲ ဃောဆက်လ္ၚတ်ဂၠိုက်ဂၠာဲဒၟံၚ် လၟိဟ်ချိုတ်တ်ပၠိုတ်တ်ဖိုဟ်ရဂှ် ညးတာလျိုၚ် ဒပ်စဵုဒၞာညးဍုၚ်ကွာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။

အတိုၚ်တံရိုဟ်ပရိုၚ် ပ္ဍဲဒပ်ပၞာန်ဟီုလဝ်မ္ဂး ပ္ဍဲပရေၚ်ကြတ်ဗတိုက်ဏံ သၞာဲဒဴနူလ္ပာ်ဒပ်ကံၚ်ဇြဳပၞာန်မွဲတၠ ဟိုတ်နူဒးလဝ်ဘဲဝပ်သ္ကာတ်မြဟ်တုဲ ကၠုၚ်ပ္ဍိုက်ကေတ်ဏာလဝ်ကဵုက္ၜၚ်ကျာရဂှ် ဂွံတီကေတ်ရ။

ပကဖကအ်သြံၚ်ဂှ်မ္ဂး ကံၚ်ဇြဳပၞာန်ဒးဒုၚ်ကြတ်ဗတိုက်လဝ်ဂှ် ဟိုတ်နူသၠုၚ်ပ္တိုန်ကၠုၚ်ပရေၚ်ပၞာန်မာန်ဒၟံၚ်ဂှ်ရ နကဵုညးဍုၚ်ကွာန်တအ် စွံသတိဗွဲတၟေၚ်တုဲ အာကၠုၚ်ညးသ္ကအ်ညိဂှ် ဗတိုက်ဖ္အောဝ်လဝ်ရ။

ပ္ဍဲကဵုဂိတုသေပ်တေမ်ဗာ စၟတ်တ္ၚဲ (၂၀) တုဲကၠုၚ်တေံလေဝ် ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲကွာန်မလိဝါန်ဂှ် ဒးဒုၚ်ဖံက်ခတိုဟ်လဝ်မာၚ်တုဲ ကောန်ဒပ်ကံၚ်ဇြဳပၞာန် ဒးချိုတ်လဝ် (၂) တၠဏီရ။

ပရိုၚ် – သြၚ်လောန်တိုၚ်မ်

ဗီု – ပကဖကအ်သြံၚ်