သၞေဟ်ကၚ်စၟဳစၟတ်မုက်ပြေၚ်(မုပ္ပလင်) ဒးဒုၚ်ဗတိုက်လဝ်တုဲ ပါလုပ်သီုသၞာဲဒဴကံၚ်ဇြဳပၞာန် ဒးချိုတ်လဝ် (၃) တၠ

ကျာ်ထဝ်၊ ဒဳဇြေမ်ဗာ (၅)

သၞေဟ်ကၚ်စၟဳစၟတ်ကံၚ်ဇြဳပၞာန် မၞုံတၞုၚ်ဒဒန်သက်တိုၚ် ကွာန်မုက်ပြေၚ်၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန်ဂှ် ဟိုတ်နူဒးဒုၚ်ဗတိုက်လဝ်တုဲ လ္ပာ်ဒပ်ကံၚ်ဇြဳပၞာန် ပါလုပ်သီုသၞာဲဒဴမွဲတၠ ဒးချိုတ်လဝ် (၃) တၠရဂှ် ဂွံတီကေတ် အတိုၚ်လဟီု ညးတာလျိုၚ်ဂကောံဇြဟတ်ပၠန်ဂတးတအ်ရ။ 

သၞေဟ်ကၚ်စၟဳစၟတ်မုက်ပြေၚ် ပါဲနူဒပ်ကံၚ်ဇြဳပၞာန်တုဲ ကောန်ဒပ်ဗၠာဲသၟိၚ် (၃၀) ပြၚ်ဖျေံလဝ်ဗဒိုပ် မံၚ်တန်တဴဒၟံၚ်ဂှ် ပ္ဍဲတ္ၚဲတုဲကၠုၚ်တေံ ဂိတုဒဳဇြေမ်ဗာ စၟတ်တ္ၚဲ(၃) အခိၚ်နူဂယး ၜိုတ် (၁၁) နာဍဳဂှ် ပါဲနူလွဟ်ဇၞော်တုဲ ဒပ်ပံၚ်ကောံ ဂကောံဇြဟတ်ပၠန်ဂတးတအ် အာစိုပ်ဗတိုက်လဝ် သီုကဵုဒရုမ်ရ။ 

ပ္ဍဲပရေၚ်ချဳဒရာၚ်ပၞာန်ဏံ ဟိုတ်နူဗတိုက်ပန်လဝ်ကဵု လွဟ်ဇၞော် ၆၀-မမ (၈) မ၊ ၆၀ – မမ နကဵုဒရုမ် မွဲမ၊ ၄၀-မမ ဗ္ဒာဲ (၂၀) မ ရဂှ် ဂွံတီကေတ် အတိုၚ်တၚ်လလောၚ်တြး ဂကောံဇြဟတ်ပၠန်ဂတးကျာ်ထဝ် KRF လလောၚ်တြးလဝ်ရ။ 

ဟိုတ်နူဒးဒုၚ်ပန်ဗတိုက်လဝ်ကဵုလွဟ်ဇၞော်တုဲ သၞာဲဒဴဒပ်ကံၚ်ဇြဳပၞာန် မွဲတၠ၊ အကြာပ်ဒပ် မွဲတၠ၊ ကောန်ဒပ် မွဲတၠ ဒးချိုတ်လဝ်တုဲ ကောန်ဒပ်ဗၠာဲသၟိၚ် (၂) တၠ ဒးလဝ်ဘဲဝပ်သ္ကာတ်မြဟ်ရဂှ် ညးတာလျိုၚ်ဂကောံဇြဟတ်ပၠန်ဂတးကျာ်ထဝ် KRF မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။ 

ပ္ဍဲပရေၚ်ပန်ဗတိုက်ဏံ ဟိုတ်နူဒပ်ကံၚ်ဇြဳပၞာန် ဖျေံလဝ်ဗဒိုပ် ပ္ဍဲကွာန်အထေတ်ကွေအ်ဂျဳ(အထက်ကွေ့ကြီး) ပွိုၚ်ဍုၚ်ဝဝ်ကဵု ဒပ်ကံၚ်ဇြဳပၞာန် ဖျေံလဝ်ဗဒိုပ် ကွာန်လေတ်ပ ပွိုၚ်ဍုၚ်ကျာ်ထဝ်တအ် ပန်ဖျေံလဝ်လွဟ်ဇၞော်တုဲ ဗ္ဒမ်ဂဥုဲကွာန်ရး၊ ဘာလကျာ် သီုသ္ၚိဒၟံၚ် (၄) မ မၞုံကွာန်ခယွဲ(ခရွဲ) ဇီုကပိုက် ဒးလီုလာ်လဝ်ရဂှ် ညးဒေသတအ် ဟီုထ္ၜးလဝ်ရ။ 

ပရေၚ်ချဳဒရာၚ်ပၞာန်ဏံဂှ် တံဒပ် KNU/KNLA (၇၈၀၅) ၊ ဒပ်လ္ပာ် (၂) ဒပ်ဒမၠုက်တွေတေတ်သာ၊ YEF TPDF Drone Force ၊ ကရောၚ်ပၞာန်တဝ်ကျဳကာန်၊ ABSDF ၊ ပကဖကျာ်ထဝ်ကဵု ဂကောံဇြဟတ်ပၠန်ဂတးကျာ်ထဝ် (KRF) တအ် ပံၚ်တောဲဗတိုက်လဝ်ရ။ 

သၞေဟ်ကၚ်စၟဳစၟတ်မုက်ပြေၚ်ဂှ် ပ္ဍဲမွဲကာလသီအဝဵုဏံ ဒးဒုၚ်ဗတိုက်လဝ် ဟွံအောန်နူ (၇) အလန်နွံတုဲ ပ္ဍဲကဵုပရေၚ်ပန်ဗတိုက်ဂမၠိုၚ်ဂှ် လ္ပာ်ကံၚ်ဇြဳပၞာန် ဒးဂိဒၟံၚ်ရ။ 

ပ္ဍဲပွိုၚ်ဍုၚ်ကျာ်ထဝ် ပရေၚ်ချဳဒရာၚ်ဂကောံဇြဟတ်ပၠန်ဂတး ဇြဟတ်ခိုဟ်ဒၟံၚ်ဂှ်မ္ဂး ဟိုတ်နူပရိုၚ်ပေါဲဗတိုက်သီဍုၚ် လ္ပာ်ကံၚ်ဇြဳပၞာန် သၠုၚ်ပ္တိုန်လဝ်ပရေၚ်ဂီုကၠီုတုဲ နူကဵုတံဒပ်ဖျေံသ္ဇိုၚ်တအ် ပန်ဖျေံဒၟံၚ်လွဟ်ဇၞော် သီုတ္ၚဲသီုဗ္တံရဂှ် ဂွံတီကေတ်ရ။ 

ပရိုၚ်- သြၚ်လောန်တိုၚ်မ်

ဗီု -KIC