ဟိုတ်နူပေါဲဗိုက်ကအ်ကြိက်တုဲ ညးဍုၚ်ကွာန်ပါဲပၞာန် ဂၠိုၚ်ကဵုဠက် နွံကၠုၚ်

ကအ်ကြိက်၊ ဒဳဇြေမ်ဗာ(၅)

ပ္ဍဲကဵုပေါဲဗတိုက် ပွိုၚ်ဍုၚ်ကအ်ကြိက် တွဵုရးကရေၚ်ဂှ် ပါဲနူလွဟ်ဇၞော်တုဲ ဟိုတ်နူကံၚ်ဇြဳပၞာန် သုၚ်စောဲက္ၜၚ်ကျာ ဗတိုက်ပန်ဒၟံၚ်တုဲ ညးဍုၚ်ကွာန် ဒးဂြိပ်ဒဴပါဲဓလေတ်ဒၟံၚ်ပၞာန် ဂၠိုၚ်ကဵုဠက်နွံကၠုၚ်ရဂှ် ဂွံတီကေတ် နူတံရိုဟ်ပရိုၚ်သ္ဇိုၚ်တိဍာ်တအ်ရ။

နူကဵုဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ပံၚ်ကောံ ဂကောံဇြဟတ်ပၠန်ဂတးတအ် လုပ်စိုပ်ဗတိုက်လဝ် ဒၞာဲဒပ်ကံၚ်ဇြဳပၞာန် ဖျေံဗဒိုပ် မၞုံလ္တူဍုၚ်ကအ်ကြိက် ပွိုၚ်ဍုၚ်ကအ်ကြိက် KNU ပ္ဍဲဂိတုဒဳဇြေမ်ဗာ စၟတ်တ္ၚဲ (၁) တုဲဂှ် ပေါဲဗတိုက်ၜါလ္ပာ် သ္ကာတ်မြဟ် က္တဵုဒှ်လဝ်ရ။

ပ္ဍဲပေါဲဗတိုက်ဂှ် ဒပ်ကံၚ်ဇြဳပၞာန် ပန်ဖျေံလွဟ်ဇၞော် လ္တူဍုၚ်ကအ်ကြိက်ကဵု ပ္ဍဲကွာန်မၞုံပွဳပွူဍုၚ်ဂှ် သၟးဟေၚ်ဟွံသေၚ်တုဲ သီုဂြာတ်ထောံဖျေံဗုမ် ကဵုက္ၜၚ်ကျာ ကၠောန်သ္ပလဝ် အဆက်က်ရ။

ဟိုတ်နူဒပ်ကံၚ်ဇြဳပၞာန် ဂြာတ်ထောံဖျေံလဝ်ဗုမ်တုဲ နူကဵုဂိတုဒဳဇြေမ်ဗာ စၟတ်တ္ၚဲ (၁) စဵုကဵုစၟတ်တ္ၚဲ (၃) ပါလုပ်သီုညးဗြဴ (၂) တၠ ကောန်အရာပ်ညးဍုၚ်ကွာန် ဒးလဝ်ဘဲဝပ် (၄) တၠ ဒးချိုတ်လဝ်တုဲ လ္တူဍုၚ်ကအ်ကြိက်လေဝ် ကောန်အရာပ်ဗွဲမဂၠိုၚ် ဇီုကပိုက် ဒးချိုတ်လဝ် နွံတုဲ ဟွံဂွံတီကေတ်စရၚ်ဇီုကပိုက်ဒးလဝ်ဏီရဂှ် ဂွံတီကေတ် နူတံရိုဟ်ပရိုၚ် ဒပ်မဟာ (၆) ရ။

ဟိုတ်နူဒပ်ကံၚ်ဇြဳပၞာန် ပ္တဝ်လဝ်ကဵုကောန်အရာပ်ညးဍုၚ်ကွာန်တုဲ ဗတိုက်ဒၟံၚ်ကီု သီုကဵုဟိုတ်နူပေါဲဗတိုက်ၜါလ္ပာ်တုဲ ကောန်ဒေသညးဍုၚ်ကွာန် နူကဵုဂကောံကွာန်မပ္တံကဵု ကအ်နွ၊ မောၚ်မယွာတေတ်၊ အာန်ဖဂျဳ၊ ယွာတာန်ယှေ မဒှ်ကွာန်မၞုံဗ္ဒာဲဍုၚ် ပါလုပ် သီုကောန်ဒေသညးဍုၚ်ကွာန် လ္တူဍုၚ်ကအ်ကြိက် ၜါဠက်ပြၚ် ဒးဂြိပ်ဒဴပါဲဓလေတ်ဒၟံၚ်တုဲ အရီုဗၚ်တအ်လေဝ် နွံဒၟံၚ်ပၟိက်ရဂှ် ဂွံတီကေတ်ရ။

အခိၚ်လၟုဟ်ပြဟ်ဟ်ဏံလေဝ် ဟိုတ်နူပေါဲဗတိုက်ကအ်ကြိက်တုဲ ကောန်အရာပ်ညးဍုၚ်ကွာန် ဒးဒုၚ်ကၟာတ်ဂွံလဝ်တအ်ဂှ် တိတ်ဒၟံၚ်ညးသ္ကအ် နူလ္တူဍုၚ်တုဲ ဂြိပ်ဒဴဴပါဲဓလေတ်ဒၟံၚ် လ္ပာ်ဒေသတၞဟ်သ္အာၚ် ညးသ္ကအ်ရဂှ် ဂွံတီကေတ်ရ။

ပ္ဍဲကဵုဂိတုဒဳဇြေမ်ဗာ စၟတ်တ္ၚဲ (၄) အခိၚ်နူဂယးဂှ်လေဝ် ဒပ်ကံၚ်ဇြဳပၞာန် ဆက်ဂြာတ်ထောံဖျေံဗုမ် လ္တူဍုၚ်ကအ်ကြိက်တုဲ သ္ၚိဒၟံၚ်စမြိုၚ်တအ် ဇီုကပိုက်ဒးလဝ် နွံရဂှ်လေဝ် ဂွံတီကေတ်အတိုၚ်တၚ်ညးဒေသတအ် ဟီုဂးလဝ်ရ။

ပရိုၚ် – သြၚ်လောန်တိုၚ်မ်

ဗီု -CJ