မွဲဒမြိပ်ဂၠံၚ်ကာ မတ်မလီု−လ္ဂုၚ်ဂှ် ကောန်ဒပ်ကံၚ်ဇြဳပၞာန် အာတ်မိက်ကၠုၚ်လှုဲတံ သာပရေံကၠုၚ်

မတ်မလီု၊ ဒဳဇြေမ်ဗာ ၃

ပ္ဍဲမွဲဒမြိပ်ဂၠံၚ်ကာ မတ်မလီု−လ္ဂုၚ်ဂှ် ကောန်ဒပ်ကံၚ်ဇြဳပၞာန် အာတ်ကၠုၚ်လှုဲ နကဵုဟိုတ်ပရေၚ်ဂီုကၠီုတံဂှ် သာပရေံကၠုၚ်တုဲ တိတ်မ္ၚးဒပ်တုဲ အာတ်ကၠုၚ်လှုဲတံလေဝ် နွံကၠုၚ်ဂှ် ညးအာတရဴတံကဵု ညးဒဳယာန်တံ ဟီုဂးလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။

ကံၚ်ဇြဳပၞာန်ဝွံ ကြဴနူဒပ်ပၞာန်သီအဝဵုတုဲ မွဲဒမြိပ်ဂၠံၚ်ကာ မတ်မလီု−လ္ဂုၚ်ဂှ် နကဵုဟိုတ်ပရေၚ်ဂီုကၠီုဂှ် သၠဲပ္တိုန်ပံက်လဝ် သၞေဟ်ကၚ်စၟဳတ် ဟွံအောန်နူကဵု ၁၀ ဒၞါဲတုဲ အာတ်မိက်ကၠုၚ်လှုဲ ပ္ဍဲကဵုညးဍုၚ်ကွာန်အာတရဴတံကဵု ကွဳစက်အာတရဴတံရ။

ဗွဲကြဴဏံ တမ်ဒပ်ကံၚ်ဇြဳပၞာန် ဖျေံသ္ဇိုၚ် မွဲဒမြိပ်ဂၠံၚ်ကာ မတ်မလီု−လ္ဂုၚ်တံဂှ်လေဝ် တိတ်မ္ၚးတမ်ဒပ်တုဲ ကွဳစက်မွဲဖ္ဍိုက်ဂှ် အာတ်ကၠုၚ် နူကဵု ၁၀၀၀ ဒ္ကေဝ် စဵုကဵု ၅၀၀၀ ဒ္ကေဝ်တံ နွံကၠုၚ်ရ။

ညးဍုၚ်ကွာန်အာတရဴမွဲတၠဂှ် ဟိုတ်နူဒပ်ကံၚ်ဇြဳပၞာန် တိတ်မ္ၚးဒပ် အာတ်မိက်ကၠုၚ်လှုဲ နကဵုဟိုတ်ပရေၚ်ဂီုကၠီုတံဂှ်တုဲ ဒးဆေၚ်ဒၟံၚ်မုက် ကုအခက်အခုဲနာနာသာ်ရောၚ်ဂှ် ဟီုရ။

“ထ္ၜးဟိုတ်ကုပရေၚ်ဂီုကၠီုတုဲ သၞေဟ်ကၚ်အာတ်မိက်ကၠုၚ်လှုဲတံ သာဂၠိုၚ်ကၠုၚ်ရ။ ၜိုတ်သၞေဟ်ကၚ်နွံဂှ် အာတ်မံၚ်ဖအိုတ်ဏောၚ်ဂှ် ဟွံပတှ်ေလ္ပကဵုဒှ်။ ကောန်ပၞာန်နူကဵုဒပ်လက္ကရဴအိုတ်တံဂှ်လေဝ် ၜိုတ်လဵုရောဟီုတှ်ေ ထ္ၜးဟိုတ်ပရေၚ်ဂီုကၠီုတုဲ တၟာဲလဝ်လွဟ်ၜါပိဇကိုအ်တုဲ နကဵုကယျိုၚ်အရာပ် ကဵုပံၚ်မဳဂၠေံဂၠေံတံဂှ် တိတ်ကၠုၚ်လ္တူဂၠံၚ်တံတုဲ PDF ညံၚ်ၚ် နူကဵုဒပ်ပၞာန်တံဂှ်ညံၚ်ၚ် အာတ်မံၚ်ရ။ နူကဵုဒပ်ပၞာန်တံဂှ်လေဝ် ထ္ၜးဟိုတ်ပရေၚ်ဂီုကၠီုတုဲ တိတ်ကၠုၚ်မ္ၚးဒပ်တုဲ အာတ်မံၚ်လှုဲအိုတ်ရ။ ဇၟာပ်ပ်ကာကၠုၚ်ဂှ် ဗက်အာတ်ဒၟံၚ်လှုဲသၟးရ။ ကွဳစက်ဇၞော်ဇၞော်တံဂှ်လေဝ် ဟွံကဵုတှ်ေ လ္ပကဵုအာ၊ ကွဳစက်ဍောတ်တ်တံဂှ်လေဝ် ဟွံကဵုတှ်ေလ္ပကဵုအာဂးတုဲ ထ္ၜးသေနာတ်တုဲ အာကၠုၚ်ဒၟံၚ် နကဵုဗီုပြၚ်မၞိဟ်ပရမ်တံယျ။ အာတ်မံၚ် နကဵုဗီုပြၚ်ဍေံတံ အခေါၚ်ကၠောန်နွံတံဂှ်ရ။ ၜိုတ်မၞိဟ်နွံဂှ် အာတ်ဒၟံၚ်လှုဲ မံက်မံက်ထေၚ်ၚ်အိုတ်ရ။ အာတ်ကၠုၚ်ဗီုဏံတှ်ေ ကပေါတ်ဗၞိက်ဂေတ်ဂြိပ် ညးဍုၚ်ကွာန်တံ ဗီုလဵုဂွံကလိတ်ကလောတ်ဒၟံၚ်ဏီရော“ သာ်ဝွံ သ္ဂးရ။

ပ္ဍဲအရာအာတ်မိက်လှုဲတံဂှ် ဒပ်ကံၚ်ဇြဳပၞာန် အာတ်မိက်လဝ် ကွဳစက်သ္ၚိမွဲဖ္ဍိုက် နကဵုၚုဟ် ၁၀၀၀ ဒ္ကေဝ်ဂှ် နွံတုဲ ကွဳစက် ဖ္ဍိုက်ပ္တိုန်နၚ်ကပေါတ်ဗၞိက်တံဂှ်လေဝ် အာတ်မိက်ကၠုၚ် နူကဵု ၃၀၀၀ ဒ္ကေဝ် စဵုကဵု ၅၀၀၀ ဒ္ကေဝ်တံ နွံဒၟံၚ်ဂှ် ဂွံတီကေတ်ရ။

ဒပ်ကံၚ်ဇြဳပၞာန်တံ ပ္ဍဲအရာအာတ်မိက်သြန်တံဂှ် အာတ်မိက်ကၠုၚ် သီုအာ သီုစဴတံ နွံတုဲ ကွဳစက်ဟွံကဵုလှုဲတံဂှ် ထ္ၜးဟိုတ်နာနာတုဲ စၟဳတ်ဒၟံၚ် အခိၚ်ကာလဗွဲမလအ်လတံ နွံဒၟံၚ်ဂှ် ဂွံတီကေတ် အတိုၚ်ဂလာန်ညးအာတရဴတံရ။

ညးဒဳယာန်မွဲတၠဂှ်လေဝ် ပ္ဍဲကဵုသၞေဟ်ကၚ်စၟဳတ် မွဲဒမြိပ်ဂၠံၚ်ကွဳစက် မတ်မလီု−လ္ဂုၚ်ဂှ် သၞေဟ်ကၚ်ဟွံဒးကဵုလှုဲဂှ် ဟွံမွဲတုဲ တဲဍိုန် လ္ပာ်အာသၟးဂှ် ဒးအိုတ်ဒၟံၚ် ၜိုတ်ထပှ်ဠက်ဒ္ကေဝ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“သၞေဟ်ကၚ်ဟွံဒးကဵုဂှ် ဟွံမွဲပုဟ်။ ဇၟာပ်ပ်သၞေဟ်ကၚ်ဒပ်ပၞာန်တံဂှ်တှ်ေ ဒးကဵုဒၟံၚ်ဖအိုတ်ရ။ ကပေါတ်ပါကီုဒှ်၊ ဟွံပါကီုဒှ် ဓမ္မတာဂှ်တှ်ေ ဒးကဵုဒၟံၚ်အဆက်က်ရဏောၚ်။ ဗၠာဲသၟိၚ်တံလေဝ် ဒးကဵုဒၟံၚ်ဏောၚ်။ ဒပ်ပၞာန်တံဏံလေဝ် ပိုယ်ဒးကဵုဂှ်ရ။ ကောန်သ္ဂံၚ်တံဂှ်လေဝ် ဒးကဵု။ သၞေဟ်ကၚ်ဂှ်တှ်ေ စဵုကဵုဂၠံၚ် ၃ သွာၚ်အိုတ်ဏောၚ်။ ဒးကဵုဂှ်တှ်ေ စဵုကဵုဂၠံၚ် ၃ သွာၚ်ဂှ်ဟီုမ္ဂး ပိုယ်တံဂှ် အောန်အိုတ် ၜိုတ် ၇ ဠက်ဂှ်အိုတ်ဏောၚ်။ ညအ်ဂှ် ဒးကဵုဒၟံၚ်သီုအာသီုစဴ သက်က်ရ။ ဗွဲကြဴဏံဂှ်တှ်ေ ပရေံစှ်ေကၠုၚ်သိုက်က်ရ။ ကြေပ်ဂြတ်အာ ဒဵုကဆံၚ်ဏံရ“ သာ်ဝွံ သ္ဂးရ။

က္ဍိုပ်သ္ကိုပ်ပၞာန်ဂှ်တှ်ေ ၚုဟ်ဗၞိက်ဂွံသၠုၚ်တိုန်ဒၟံၚ်ဂှ်ဝွံ ပ္ဍဲကဵုသၞေဟ်ကၚ် မၞုံပ္ဍဲဂၠံၚ်တံဂှ် ဟိုတ်နူၚုဟ်ဒးအိုတ် အရာဟွံမွဲပၟိက်တံ နွံဒၟံၚ်တုဲ ညံၚ်ခရိတ်အိုတ် ဟွံမွဲပၟိက်တံ ဂွိုအ်မွဲဂှ် ညးတာလျိုၚ် ပ္ဍဲရးဒေသ ကေုာံ တွဵုရးတံ သွက်ဂွံစွံအာရီု ကောပ်ကာဲအိုတ်ဂှ် အပ္ဍဲဂိတုဂျောန်တုဲကၠုၚ်တေံ စၞောန်ပ္ညုၚ်လဝ်ရ။

ဆ္ဂး ဂကောံဒပ်သၟဝ်တဲတံဂှ် ဟွံဒ္ဂေတ်ဗက်တုဲ က္တဵုဒှ်ကၠုၚ် စဵုကဵုအကာဲအရာ ထ္ၜးလွဟ်တုဲ အာတ်ကၠုၚ်လှုဲတံရဂှ် ညးဍုၚ်ကွာန်အာတရဴတံ ဟီုဂးလဝ်ရ။

ဂၠံၚ်ကာပျဳထံၚ်သု မတ်မလီု−လ္ဂုၚ်ဂှ်ဝွံ ဒှ်ဂၠံၚ်ညးအာတရဴ ကေုာံ ညးပလံၚ်ပ္တိုန်ကပေါတ်ဗၞိက် နူကဵုတွဵုရးဍုၚ်မန်၊ တွဵုရးကရေၚ် ကေုာံ ရးတၞၚ်သဳတံ သုၚ်စောဲဒၟံၚ်အဓိကမွဲတုဲ လၟေၚ်တ္ၚဲ ကွဳစက်ဂၠိုၚ်ကဵုလ္ၚီဖ္ဍိုက် အာကၠုၚ်ဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီု−CJ