ဟိုတ်နူဒပ်ပၞာန်ကၟာတ်လဒဵုလဝ်တုဲ ညးပါဲပၞာန်ကရေၚ်ဍာဲတအ် ဒးဒုၚ်ဒၟံၚ်ဘဲဒဏ်ၚုဟ်ဗၞိက်ဖျာက္ဍၚ်

လွိုၚ်ကဝ် – ဒဳဇြေမ်ဗာ (၅)

ပ္ဍဲကဵုတွဵုရးကရေၚ်ဍာဲဂှ် ဟိုတ်နူဒပ်ပၞာန် ကၟာတ်လဒဵုလဝ်ဗလးမုက်တိတုဲ ဒးဆေၚ်ဒၟံၚ်မုက်ကဵု ပြဿနာၚုဟ်ဖျာ က္ဍၚ်တိုန်ကၠုၚ် ဂၠိုၚ်ကဵုချဂှ်ရ ညးပါဲဘဲပၞာန်တအ် ဒှ်ဒၟံၚ်အခက်ခုဲရဂှ် ညးတာလျိုၚ်ဗဒိုပ်ပါဲပၞာန် သ္ကုတ်ပလိုတ်ဒဳမအ်ဇြောတအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။ 

သ္ပတံနူဂိတုနဝ်ဝေမ်ဗာ တုဲကၠုၚ်ဏံတုဲ ကြဴနူလ္ပာ်ဂကောံပၠန်ဂတးပံၚ်ကောံတအ် လုပ်ဗတိုက်သီကေတ်လဝ် ဍုၚ်လွိုၚ်ကဝ် တွဵုရးကရေၚ်ဍာဲတုဲဂှ် ပေါဲဗတိုက်ဒှ်ဒၟံၚ် စဵုကဵုအခိၚ်တ္ၚဲဏံရ။ 

ဟိုတ်နူကဵုပေါဲဗတိုက်ကီု ဟိုတ်နူဒပ်ပၞာန်ကၟာတ်လဒဵုလဝ်ကီုတုဲ ညးပါဲဘဲပၞာန်တအ် ဒးဆေၚ်ဒၟံၚ်မုက်ကဵု ပရေၚ်ဇွောံမပိုတ်သ္ကုတ်ရဂှ် ညးကဵုရီုဗၚ် မၚ်မွဲဒၟံၚ် ညးပါဲပၞာန်မွဲတၠဂှ် ဟီုထ္ၜးရ။ 

“အဓိကဂှ်တှ်ေ ဇၟောဝ်ဗၞိက်ပိုဲ ဟၟဲရလေဝ်ဏး လွိုၚ်ကဝ်ဒှ်ဂှ်ရတှ်ေ ကံၚ်ဇြဳပၞာန်ဂှ် စကၟာတ်ကၠုၚ် နူကဵုပေန်လောၚ်ရ ဒၟာနူမာတ်​ထောံဂှ်ရ ကွဳစက်သ္ၚုလေဝ် ဟွံလုပ် ကွဳစက်ကၠေၚ်တအ်လေဝ် ဟွံလုပ်ရပုဟ်တှ်ေ ဇွောံမပိုတ်သ္ကုတ် ၚုဟ်ဗွဝ်ဖျာက္ဍၚ်တိုန် ဒှ်ကၠုၚ်ဒၟံၚ် ကွေံကွေံရ။ ၚုဟ်မးဗွဝ်ဖျာ က္ဍၚ်တိုန်ကၠုၚ် ဂၠိုၚ်ကဵုချဂှ်တှ်ေ ဒးဆဵုဂဗဒၟံၚ်ရ။” ဂှ် ညးဟီုလဝ်ရ။ 

ကၠာနူပေါဲဗတိုက်လ္တူဍုၚ်လွိုၚ်ကဝ် ဟွံဂွံက္တဵုဒှ်ဏီဂှ် ရာန်ကေတ်ဒၟံၚ်ဇွောံမ သီုဂဥုဲဇဗ နူကဵုဍုၚ်လွိုၚ်ကဝ် သွက်ဗဒိုပ်ပါဲပၞာန် ဗ္ဒာဲလွိုၚ်ကဝ် ပါလုသီုဒဳမအ်ဇြော သ္ကုတ်ဗၟံက်၊ ဖရူဇြော သ္ကုတ်ပလိုတ် အဓိကရဂှ် ဂွံတီကေတ်ရ။ 

သ္အာၚ်နူဂှ်ပၠန် နူကဵုဂၠံၚ်ပေန်လောၚ်-ဖေဝ်ခုမ်ဂှ် ၜိုန်ရရာန်ကေတ်ဒၟံၚ် သ္ၚုကဵု ဇွောံမတအ် နွံဒၟံၚ်ကီုလေဝ် ဟိုတ်နူပေါဲဗတိုက်ဒှ်ဒၟံၚ်တုဲ ဒးဆေၚ်ဒၟံၚ်မုက်ကဵု ပြဿနာဂၠံၚ်ကၟာတ်ရ။ 

ပ္ဍဲတွဵုရးကရေၚ်ဍာဲဂှ် ကၠေၚ်ဍေန်မွဲလဳတာမ္ဂး နူကဵု ၈၀၀၀ စဵုကဵု ၁၀၀၀၀ ဒှ်ဒၟံၚ်တုဲ ၚုဟ်ကပေါတ်ဗၞိက်စသုၚ်သ္ဇိုၚ် ပါလုပ်သီုသ္ၚု၊ ကၠေၚ်၊ ၜဵုတအ်လေဝ် ပ္ဍဲပွိုၚ်မွဲဂိတု က္ဍၚ်တိုန်ကၠုၚ် စဵုကဵုဗ္ဒာဲပိဂအုံရဂှ် ဂွံတီကေတ်ရ။ 

ဟိုတ်နူပေါဲဗတိုက်တုဲ ပ္ဍဲဗဒိုပ်ပါဲဘဲပၞာန်တအ် ဟိုတ်နူဇွောံမပိုတ်သ္ကုတ်ဒၟံၚ်ဂှ်ရ သုၚ်စောဲဒၟံၚ်သ္ၚု ပကောံပကေဝ်လဝ် နကဵုကိုန်အစဳမာန် ကံၚ်ဇြဳအုပ်ဓုပ်တွဵုရးကရေၚ်ဍာဲ ကာလအကြာ IEC တုဲ ဒးသောၚ်ကလးဒၟံၚ် ပြဿနာဇွောံမပိုတ်သ္ကုတ်ရဂှ် ဂွံတီကေတ်ရ။ 

အခိၚ်လၟုဟ်ဏံ လၟိဟ်မၞိဟ် ပ္ဍဲတွဵုရး ဗ္ဒာဲ ၉၀ တၟံကၠံဂှ် ဒးပါဲဓလေတ်ဒၟံၚ် ဘဲပၞာန်ညးသ္ကအ်တုဲ ဟိုတ်နူတၚ်နွံပၟိက်ဇွောမ ဂၠိုၚ်တိုန်ကၠုၚ်ဂှ်ရ နကဵုဂကောံကၟိန်ဍုၚ်နာနာ ကၠောံပယျဵုဒၞက်တုဲ ယဝ်ရကဵုအရီုဗၚ်ဟၟဲကၠုၚ်မ္ဂး ညးဍုၚ်ကွာန်ပါဲဘဲပၞာန်တအ် ဒးဆဵုဂဗကဵု ဘဲကၞောဝ်မာန်ဒၟံၚ်ရဂှ် IEC ကဵုလဝ်သမ္တီရ။ 

ပ္ဍဲတွဵုရးကရေၚ်ဍာဲ လ္ပာ်သ္ကုတ်ပလိုတ်ဒဳမအ်ဇြောဂှ် ညးပါဲဘဲပၞာန် နွံဒၟံၚ် ဗ္ဒာဲ (၂) ကိုတ်ဂှ်ရ ပ္ဍဲကဵုတွဵုရးဂှ် ဒှ်ဗဒိုပ်ပါဲပၞာန် ဇၞော်အိုတ်ရဂှ် ဂွံတီကေတ်ရ။ 

ပရိုၚ် – သြၚ်လောန်တိုၚ်မ်

ဗီု – Social Media