ဗဒိုပ်ကံၚ်ဇြဳပၞာန် လ္တူဍုၚ်မုမ်သီုဖအိုတ် KNU သီဂွံပါလုပ်သီုသ္ကိုပ်တံဒပ် ကောန်ဒပ်ကံၚ်ဇြဳပၞာန် ဗွဲမဂၠိုၚ် ထံက်က္ၜံၚ်ဖျေံလွဟ်

မုမ် – ဒဳဇြေမ်ဗာ (၅)

ခမရ-၅၉၉၊ ခမရ-၅၉၀ ကံၚ်ဇြဳပၞာန်၊ ဗဒိုပ်ဗၠာဲသၟိၚ်ၝောံဍုၚ်မုမ်ကီု သီုကဵုဗဒိုပ်သၞေဟ်ကၚ်စၟဳစၟတ်ဒဒန် မၞုံလ္တူဍုၚ်မုမ် တိဍာ်ဒပ်မဟာ ၃ KNU တအ်ဂှ် ပ္ဍဲကဵုဂိတုဒဳဇြေမ်ဗာ စၟတ်တ္ၚဲ (၄) အခိၚ်ဇိုၚ်သဝ်တ္ၚဲ (၅) နာဍဳကဝက်ဂှ် ဒပ်ပၞာန်ဗၠးၜးကောန်ဂကူကရေၚ် (KNLA) တအ် သီဂွံလဝ်ရဂှ် ဗဟဵု KNU လလောၚ်တြးလဝ် ပရိုၚ်ရ။

ပ္ဍဲဂိတုဒဳဇြေမ်ဗာ စၟတ်တ္ၚဲ (၂) တုဲကၠုၚ်တေံ အခိၚ်ဗ္တံဂှ် စဗတိုက်လဝ် ဗဒိုပ်တအ်ဂှ်တုဲ အခိၚ်လၟုဟ်ဏံမ္ဂး တိဍာ်သီဂွံလဝ်တအ်ဂှ် ကၠောန်ရေၚ်တၠုၚ်ဒၟံၚ် ကမၠောန်ဂြးတးတိဍာ် နကဵုဇြဟတ်ဒပ် ၁၅၀၀ ရဂှ် ဟီုလဝ်ရ။

ဒပ်ကံၚ်ဇြဳပၞာန် ဖျေံလဝ်သ္ဇိုၚ် ပ္ဍဲဗဒိုပ်တအ်ဂှ် ဟိုတ်နူပန်ဖျေံဒၟံၚ်လွဟ်ဇၞော် ပ္ဍဲဒၞာဲညးဍုၚ်ကွာန်တအ် မံၚ်တန်တဴဒၟံၚ်ကဵု ပ္ဍဲဗွိုၚ်ကမၠောန်တအ် ခြာဟွံလအ်ဟွံလအ်ဂှ်ရ ညးဍုၚ်ကွာန်ဗွဲမဂၠိုၚ် ဇီုကပိုက်ဒးလဝ်ဘဲဝပ်တုဲ ဒးဆေၚ်ဒၟံၚ်မုက်ကဵု အခက်ခုဲ သွက်ဂွံလုပ်ဗွိုၚ်ကမၠောန်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ဟိုတ်နူသ္ပမာန်ဍဵုဍိုက်ပျဲပျာံဒၟံၚ် ညးဍုၚ်ကွာန်တအ်ဂှ်ရ တံဒပ်သၟဝ်တဲ ဒပ်ပၞာန်ဗၠးၜးကောန်ဂကူကရေၚ် (KNLA) တအ်ကဵု ဒပ်ပံၚ်ကောံပၠန်ဂတးတအ်ဂှ် ဗတိုက်သရိုဟ်လဝ် ဗဒိုပ်ဒပ်ကံၚ်ဇြဳပၞာန် အတိုၚ်ပၟိက်ဆန္ဒညးဍုၚ်ကွာန်ရဂှ် ဂွံတီကေတ်ရ။

ပ္ဍဲကဵုပေါဲဗတိုက်သီဗဒိုပ်တအ်ဂှ် ပရေၚ်ဇီုကပိုက်ၜါလ္ပာ် နွံတုဲ နူလ္ပာ်ကံၚ်ဇြဳပၞာန် ပါလုပ်သီုကဆံၚ်သ္ကိုပ်တံဒပ် ထံက်က္ၜံၚ် ဖျေံလဝ်လွဟ် ဗွဲမဂၠိုၚ်ရဂှ် ကဵုလဝ်သမ္တီရ။

စပ်ကဵုအကာဲအရာပေါဲဗတိုက် သီဍုၚ်မုမ်တုဲ နကဵုဗော်သွးကောန်ဂကူကရေၚ် KNU ဆက်ကဵုအာသမ္တီ သောဲသောဲဗြောဲဗြောဲ ပၠန်ရောၚ်ဂှ်လေဝ် ဟီုသ္ဂးလဝ်ရ။

ပရိုၚ် – သြၚ်လောန်တိုၚ်မ်

ဗီု – KNU