အကြာပ်ဒပ်ဇၞော်ဗၠာဲသၟိၚ် ပ္ဍဲသဝ် (၁) တၠ လုပ်စိုပ် ဖျေံလဝ်လွဟ်

သဝ် – ဒဳဇြေမ်ဗာ (၅)

အကြာပ်ဒပ်ဇၞော်ဗၠာဲသၟိၚ် နူဗဒိုပ်ဗၠာဲသၟိၚ် ဍုၚ်သဝ်၊ ရးဒေသမဂွေ (၁) တၠဂှ် ကော်ကေတ်နၚ် ဂကောံအိန်ထံၚ်ညးတုဲ ကေတ်နၚ်လဝ် လွဟ် G-3 လုပ်ကၠုၚ်ဖျေံလဝ်လွဟ်ရဂှ် တံဒပ်ခရိုၚ်ဂဂဝ် စၟတ် (၃) လလောၚ်တြးလဝ် ပရိုၚ်ရ။ 

ပ္ဍဲဂိတုနဝ်ဝေမ်ဗာ စၟတ်တ္ၚဲ (၃၀) တုဲကၠုၚ်တေံ အကြာပ်ဒပ်ဇၞော် နူဗဒိုပ်ဗၠာဲသၟိၚ်ဍုၚ်သဝ် (၁) တၠဂှ် လုပ်ကၠုၚ်ဖျေံလဝ်လွဟ် ပ္ဍဲခရိုၚ်ဂဂဝ် တံဒပ် စၟတ်-၃ ရ။ 

မွဲကရောံညးဂှ် လွဟ် G-3 (၁) ဒကိုအ်၊ ဖျေဲကမ် (၂) မ၊ မကမ် (၃၃၂) မ သီုဗုမ်ကၠဟ် (၁) မကေတ်နၚ်လဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။ 

အခိၚ်လၟုဟ်ဏံ သွက်ဂွံပှ်ပလှ်ဖျေံကံၚ်ဇြဳပၞာန်ဂှ် ဟိုတ်နူသၠုၚ်ပ္တိုန်ဒၟံၚ် အသိၚ်ပၞာန်ဂှ်ရ ကောန်ဒပ်ပၞာန်၊ ဗၠာဲသၟိၚ် သၟဝ်တဲကံၚ်ဇြဳတအ်ဂှ် ညံၚ်တၚ်ဒုၚ်လျိုၚ်လမျီု ဂွံနွံ ထောံလသာဒပ်ကံၚ်ဇြဳပၞာန်တုဲ သွက်ဂွံလုပ်ကၠုၚ်ဇူဗ္ဒာဲ ဇရေၚ်ဂၠံသြိုဟ်ညးဍုၚ်ကွာန် ဗွဲမပြဟ်ဂှ် တံဒပ်ဂဂဝ် စၟတ်-၃ ကဵုလဝ်သတိရ။ 

လုပ်ဇူဒလာဲ ဗ္ဒာဲဂၠံသြိုဟ်ညးဍုၚ်ကွာန်တုဲ ညးလုပ်ကၠုၚ် ဖျေံလွဟ်တအ်ဂှ် တုဲတဴကဵုဂကူလွဟ်လက်နက်တုဲ ဖျေံကဵုအာလာဘ် ဗွဲမထေက်တန်ရောၚ်ဂှ် ကဵုလဝ်သမ္တီရ။ 

ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ ဗၠာဲသၟိၚ် ကေုာံ ကောန်ပၞာန် ဗ္ဒာဲ ၂ ဠက် ပံၚ်တောဲကၠုၚ် ကရောံညးဍုၚ်ကွာန်တအ် နွံရဂှ် ဂွံတီကေတ် အတိုၚ်တၚ်ဂၞၚ် NUG ရ။ 

ပရိုၚ်- သြၚ်လောန်တိုၚ်မ်

ဗီု – တံဒပ်ဂဂဝ် စၟတ် ၃