ယှိုဲကျေန်၊ ဒဳဇြေမ်ဗာ (၆)
ပ္ဍဲပွိုၚ်ဍုၚ်ယှိုဲကျေန် တိဍာ်ဒပ်မဟာ ၃ ဗော်သွးကောန်ဂကူကရေၚ် KNU ဂှ် ဟိုတ်နူဒပ်ကံၚ်ဇြဳပၞာန် ဗတိုက်ဒၟံၚ်ကဵုလွဟ်ဇၞော် သီုက္ၜၚ်ကျာတုဲ ပ္ဍဲကဵုဂိတုနဝ်ဝေမ်ဗာ ပွိုၚ်မွဲဂိတုဂှ် ကောန်အရာပ်ညးဍုၚ်ကွာန် ၃ တၠ ဒးချိုတ်လဝ်တုဲ လၟိဟ်မၞိဟ် ဗ္ဒာဲ ၃၀,၀၀၀ ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ် အတိုၚ်တၚ်လလောၚ်တြး ဗဟဵု KNU ရ။
နူကဵုဂိတုနဝ်ဝေမ်ဗာ စၟတ်တ္ၚဲ (၁) စဵုကဵုစၟတ်တ္ၚဲ (၃၀) ဂှ် နူဒပ်ကံၚ်ဇြဳပၞာန် ဖျေံသ္ဇိုၚ် ပွိုၚ်ဍုၚ်ယှိုဲကျေန် မၞုံခရိုၚ်ညံၚ်လေဝ်ပေန် KNU ဂှ် ပန်ဖျေံလဝ်လွဟ်ဇၞော် မပ္တံကဵု ၁၂၀ မမ ၁၂၂ မမ ၁၅၅ မမ ၈၁ မမ ပ္ဍဲကဵုကွာန်တအ် အပံၚ်လၟိဟ် ၂၅ ဝါ၊ လၟိဟ်မ ၈၆ မရ။
ဟိုတ်နူပန်ဖျေံလဝ်လွဟ်ဇၞော်ဗီုဏံတုဲ လွဟ်ဇၞော်စှ်ေ ပါ်ခတိုဟ်လဝ် ပ္ဍဲကွာန် ၁၉ ကွာန် ပါလုပ်သီုကွာန် ထဝ်လူခိုဝ်၊ ဝိုၚ်ကျောန်၊ ယျေဖျူကာန်၊ ပျေန်ယျေ၊ ဂွေကုမ်၊ ကောက်မေအ်ဒူ၊ ဇျှုမ်အေန်၊ ချောၚ်ဝ၊ ကွေန်ဒလဂျဳ၊ ဝိုၚ်တေတ်ဇြုက်၊ ပျေန်ယျေဂဳ၊ တိတ်ဂေဝ်ကုမ်၊ အေန်ဗလာ၊ ကွဳသေဝ်လဝ်ရဂှ် လလောၚ်တြးလဝ်ရ။
ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ မၞိဟ်တြုံ နူကွာန်ချောၚ်ဝ အယုက် (၅၂) သၞာံ မွဲတၠ ဒးလဝ်ဘဲလွဟ်မကမ် ဒးချိုတ်လဝ်တုဲ ဟိုတ်နူပညောတ်ခ္တဝ်လွဟ်ဇၞော်စှ်ေလဝ်ဂှ် ညးဗြဴအယုက် (၅၄) သၞာံ ဒၟံၚ်ကွာန်ဝိုၚ်တေတ်ဇြုက် (၁) တၠ ကောန်ကၟံညိၚ် ဒးချိုတ်လဝ်တုဲ ကောန်အရာပ် (၃) တၠ ပါလုပ်သီုကောန်ၚာ် အယုက် (၇) သၞာံ နူကွာန် ဂွေကုမ်မွဲတၠ ဒးလဝ်ဘဲဝပ်လွဟ်မကမ်ရ။
သ္အာၚ်နူဂှ်ပၠန် သ္ၚိဒၟံၚ် ၁၀ မ၊ ကွဳလိုန်ဓာတ် ၁ ဖ္ဍိုက်သီု စက်အေန်ဂျေန် ၁ မ ဒးလီုလာ်လဝ်တုဲ ပ္ဍဲမပ္တံကဵုကွာန်ကလဝ်ခဳ၊ ထဳခေလဝ်၊ ထိုဝ်ခေပူ၊ ဝါတဝ်ဂျဳကဵု ကျောက်တာန်တအ်ဂှ် ဒပ်ကံၚ်ဇြဳပၞာန် ပန်ပှော်လဝ်ကဵုက္ၜၚ်ကျာ (၉) အလန်တုဲ ညးဗြဴဴ အယုက် (၆၅) သၞာံမွဲတၠ ဒးချိုတ်လဝ်တုဲ သ္ၚိဒၟံၚ် (၃) မ ဒးလီုလာ်လဝ်ရဂှ် ဓမံက်လဝ် ပ္ဍဲတၚ်လလောၚ်တြးရ။
ဒပ်ကံၚ်ဇြဳပၞာန် ပ္ဍဲပွိုၚ်ဍုၚ်ယှိုဲကျေန်ဂှ် ရပ်ဒက်ဒၟံၚ်လ္တူကောန်ဒေသ ညးဍုၚ်ကွာန်တအ်တုဲ အာတ်မိက်ကေတ်ဒၟံၚ်သြန် နူကောန်ဒေသ ညးဍုၚ်ကွာန်တအ်ရဂှ်လေဝ် KNU လလောၚ်တြး ဟီုဂးလဝ်ရ။
ပ္ဍဲပွိုၚ်ဍုၚ်ယှိုဲကျေန် KNU ဂှ် ဟိုတ်နူပရေၚ်ဒပ်ပၞာန် ဖံက်ပ္ကဝ်အခေါၚ်အရာမၞိဟ်တအ်တုဲ ကောန်အရာပ်ညးဒေသ နူကွာန် (၃၁) ကွာန် ၂၉၈၀၀ ပြၚ် ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ် အတိုၚ်တၚ်လလောၚ်တြး ဗဟဵု KNU ရ။
ပရိုၚ် – သြၚ်လောန်တိုၚ်မ်
ဗီု – KNU
sanlontai