မတ်မလီု၊ ဒဳဇြေမ်ဗာ (၆)
ကၠောန်ရေၚ်တၠုၚ်အာ ပရေၚ်ဗတိုက်ပန် ပ္ဍဲဌာန်ဂအုပ်ပၞာန်ရး ဒိုဟ်အဂၞဲကံၚ်ဇြဳပၞာန် ဖျေံသ္ဇိုၚ်ဍုၚ်မတ်မလီု တွဵုရးဍုၚ်မန် သာသ္ကာတ်မြဟ်ရောၚ်ဂှ် ညးတာလျိုၚ် ဒပ်စဵုဒၞာညးဍုၚ်ကွာန် တွဵုရးတအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဌာန်ဂအုပ်ပၞာန်ရတခ မၞုံအရာပ်ကုန်ရခေၚ် ဍုၚ်မတ်မလီု ဗ္ဂပ်လဝ်သၞောတ်ပလီုဒရုမ် ဗွဲမဂၠိုၚ်ဂှ် ပ္ဍဲဂိတုဒဳဇြေမ်ဗာ စၟတ်တ္ၚဲ (၄) တုဲကၠုၚ်တေံ အခိၚ်တ္ၚဲစေၚ် ၜိုတ် (၂) နာဍဳဂှ် ဒပ်ပံၚ်ကောံ ဂကောံဇြဟတ်ပၠန်ဂတးတအ် ထပ်အာဗတိုက်လဝ်ကဵုဒရုမ် ပ္ဍဲကဵုဂိတုဏံ အလန်ဒုတိယရ။
ပ္ဍဲပရေၚ်ဗတိုက်ပန်ဏံ မဗုမ်ဒရုမ်မွဲမဂှ် ဒတုံံစှ်ေပါ်ခတိုဟ်လဝ် ပ္ဍဲသၠာတ်က္ၜၚ်ကျာသၞေၚ်ဝဲ ဗ္ဒာဲသ္ၚိသ္ကိုပ်ရးတုဲ အကာဲအရာဇီုကပိုက်ဒးလဝ် သောဲသောဲဗြောဲဗြောဲဂှ်မ္ဂး ဌာန်ပရိုၚ်သြၚ်လောန်တိုၚ်မ် သ္ပဒ္တန်တၞဟ်ခြာ ဟွံမာန်ဏီရ။
ဌာန်ဂအုပ်ပၞာန်ရတခဂှ် ပ္ဍဲကဵုဂိတုဒဳဇြေမ်ဗာ စၟတ်တ္ၚဲ (၁) တုဲကၠုၚ်တေံ အခိၚ်ၜိုတ် (၉) နာဍဳဂှ်လေဝ် ဂကောံပံၚ်ကောံ ဒပ်နဲကဲကွတ်ပညာ ယှာထူဝဝ် (ဒပ်လ္ပာ် Alpha bats) ကဵု ဒပ်စဵုဒၞာညးဍုၚ်ကွာန် တွဵုရးဍုၚ်မန် ပကဖ၊ တံဒပ် (၆) KNDO တအ် ပံၚ်တောဲ ဗတိုက်လဝ်ကဵုဒရုမ်ရ။
ညးတာလျိုၚ်ပကဖတွဵုရးဍုၚ်မန် ကိုဝ်သဝ်ထူအောၚ်ဂှ်မ္ဂး သုၚ်စောဲနဲကဲကွတ်ပညာစုၚ်တုဲ သွက်ဂွံဗတိုက်အာ ဌာန်ဂအုပ်ပၞာန်ရတခ သ္ကာတ်မြဟ်လ္တူနူဏံ နွံဒၟံၚ်ဂှ်ရ နကဵုညးဍုၚ်ကွာန်တအ် သတိပရေၚ်ပၞာန် ကဵုဂွံနွံဒၟံၚ်ဗွဲတၟေၚ်ဂှ် ဗတိုက်ဖ္အောဝ်လဝ်ရ။
ဌာန်ဂအုပ်ပၞာန်ရတခဂှ် ဒှ်ဌာန်ဂအုပ်ပၞာန် ကံၚ်ဇြဳပၞာန် ကေတ်လဝ်တာလျိုၚ် ရေၚ်တၠုၚ်ဒၟံၚ် စပ်ကဵုကိစ္စဆေၚ်ကဵု ပရေၚ်စဵုဒၞာ၊ ပရေၚ်ဂီုကၠီု သီုပရေၚ်ချဳဒရာၚ်ပၞာန် တွဵုရးဍုၚ်မန်ကဵု တွဵုရးကရေၚ်ဗွဲအဓိက မွဲဌာနတုဲ ပ္ဍဲကဵုပေါဲဗတိုက် ဒှ်ဒၟံၚ် ပ္ဍဲကအ်ကြိက်ကဵု လှာဒကှ်တအ်ဂှ် ဒှ်ဒၞာဲစဗတိုက်လဝ်ကဵုက္ၜၚ်ကျာ မွဲဒၞာဲလေဝ်ဒှ်ရ။
ဌာန်ဂအုပ်ပၞာန်ရတခဂှ် ဟိုတ်နူဒးဒုၚ်ဗတိုက်ကၠုၚ်ဒၟံၚ်သိၚ်သိၚ်တုဲ နူဗျူဟာကံၚ်ဇြဳပၞာန်မုဟ်ဍုၚ် ဟိုတ်နူပန်ဖျေံဒၟံၚ်လွဟ်ဇၞော် ပ္ဍဲကဵုကွာန် မၞုံပွိုၚ်ဍုၚ်ကျာ်မြဟ် သီုတ္ၚဲသီုဗ္တံတုဲ အကြာညးဒေသတအ် ပရေၚ်ဒှ်ဓဝိၚ်ဂွိၚ်ဂွာဲ ဂၠိုၚ်တိုန်ဒၟံၚ်ရ။
အခိၚ်လၟုဟ်လေဝ် ကံၚ်ဇြဳပၞာန်ဂှ် ပ္ဍဲကဵုပွိုၚ်ဍုၚ်ကျာ်မြဟ်၊ မုဟ်ဍုၚ်ကဵု မတ်မလီု ဒၞာဲလုပ်စိုပ်ကၠုၚ် ဇရေၚ်ဌာန်ဂအုပ်ပၞာန်ရတခ မာန်တအ်ဂှ် သၠုၚ်ပ္တိုန်လဝ် ပရေၚ်ဂီုကၠီုတုဲ ပ္ဍဲကဵုဒၞာဲလုပ်တိတ်ဍုၚ်တအ်ဂှ်လေဝ် ဆက်ကၠောန်ရေၚ်တၠုၚ်ဒၟံၚ် ပရေၚ်ကၟာတ်ဒၞာစၟဳစၟတ် ဆက်က်ရဂှ် ဂွံတီကေတ် အတိုၚ်ညးဒေသတအ် ဟီုထ္ၜးလဝ်ရ။
ပရိုၚ် – သြၚ်လောန်တိုၚ်မ်
ဗီု -Google
sanlontai