ပ္ဍဲပလေဝ် ပျူသဝ်ထဳမွဲတၠ လုပ်ကၠုၚ်ဖျေံလွဟ် ဇရေၚ် ABSDF သီုလွဟ်လက်နက်မကမ် အလန်ကၠာအိုတ်

ပလေဝ် – ဒဳဇြေမ်ဗာ (၆)

ပျူသဝ်ထဳ နူပွိုၚ်ဍုၚ်ပလေဝ်၊ ရးသက်ဂါၚ်မွဲတၠဂှ် သီုကဵုလွဟ်လက်နက်မကမ် လုပ်ကၠုၚ်ဖျေံလဝ်လွဟ် ဇရေၚ် ABSDF အလန်ကိုပ်ကၠာအိုတ်ရဂှ် ညးတာလျိုၚ်လလောၚ်ပရိုၚ် ABSDF Column – 3 ဟီုကဵု ဌာန်ပရိုၚ်သြၚ်လောန်တိုၚ်မ်ရ။ 

ပ္ဍဲဂိတုဒဳဇြေမ်ဗာ တုဲကၠုၚ် စၟတ်တ္ၚဲ (၃) တေံဂှ် လုပ်ကၠုၚ်ဖျေံလဝ်လွဟ် ဇရေၚ်ဒပ်ပၠတရဴကွးဘာအလုံကၟိန်ဍုၚ်ဗၟာ (ဒပ်ပၞာန်ကွးဘာ) ကရောၚ်ပၞာန် စၟတ် ၃ ၊ တံဒပ် ၁၄ ဒေသချေန်တွောန်ရ။ 

ဒၟာနူဂွံတီကေတ် ပျူသဝ်ထဳတအ်လေဝ် ဒးဒုၚ်ဒၟံၚ်ဘဲဒဏ်ဒပ်ကံၚ်ဇြဳပၞာန် အကာဲအရာပရေံပရေံဂှ်တုဲ လုပ်ကၠုၚ်ဖျေံလဝ်လွဟ် ဗီုလၟုဟ်ဏံဂှ် ဒှ်ပရေၚ်ရုဲစှ် ဍာံစၟတ်ရဂှ် ညးနွံယၟု ကိုဝ်ပျိဖျိုဝ်ဂျဝ် ဟီုဂးလဝ်ရ။ 

“အဓိကဂှ် မၞိဟ်တြုံနွံပ္ဍဲကွာန်တအ်ဂှ်တှ်ေ ဒေါံဟွံဂွံ ဒးလုပ်ဒၟံၚ် နဒဒှ်ပျူသဝ်ထဳညးသ္ကအ်ရ။ ဂိတုဒဳဇြေမ်ဗာ စၟတ်တ္ၚဲမွဲ အခိၚ်ညးတေံတိတ်ကၠုၚ်ဂှ် ဆက်စၠောံလဝ်ကဵု မၞိဟ်ဍုက်ကေဝ်ဒဒှ်ေဒယှ်ကဵုညး မွဲတၠ။ အခိၚ်ဗ္တံ အကြာဒ္စာံနာဍဳကဵု စှ်နာဍဳ အခိၚ်ညးဒးကၚ်ဂှ် တိတ်ကၠုၚ်သီလွဟ်လက်နက်ရ” ဂှ် ညးတာလျိုၚ်လလောၚ်ပရိုၚ် ABSDF Column – 3 ဟီုဂးလဝ်ရ။ 

သ္အာၚ်နူဂှ်ပၠန် နူကဵုသၟဝ်တဲကံၚ်ဇြဳပၞာန် ညးမိက်ဂွံလုပ်ကၠုၚ်ဖျေံလွဟ်တအ်ဂှ်လေဝ် သွက်ဂွံမၚ်ဒုၚ်တဲ ဒုၚ်အာတၠုၚ် ဂီုဂီုကၠီုကၠီု စဳဇန်ဒၟံၚ်ရဂှ် ညးဟီုလဝ်ဏီရ။ 

သၟတ်ပျူသဝ်ထဳ လုပ်ကၠုၚ်ဖျေံလဝ်လွဟ်ဂှ် သ္ကိုပ်ကရောၚ်ပၞာန် ဒပ်ပၞာန်ကွးဘာ ကရောၚ်ပၞာန် (၃) သ္ဂံၚ်မေန်ထိုဲ ဒုၚ်တၠုၚ်တုဲ ပလံၚ်ဗစိုပ်လဝ် ပ္ဍဲဒၞာဲဂီုကၠီုရဂှ် ဂွံတီကေတ်ရ။ 

သၟတ်ပျူသဝ်ထဳဂှ် ကေတ်နၚ်လဝ် လွဟ်ဂကူ Type- 81 (၁) ဒကိုအ်၊ ဖျေဲကမ် (၂) မ၊ မကမ် ၇.၆၂ မဳလဳမဳတာ (၈၆) မ၊ ၅.၅၆ မဳလဳမဳတာ (၁၄) မ၊ ဗုမ်ကၠဟ် (၁) မကဵု စက်ဟီုအရေတ် (၁) မတုဲ အပ်ပြာပ်ကဵုလဝ် ဇရေၚ်သ္ဂံၚ်ဇြေယျ သ္ကိုပ်တံဒပ် ၁၄ ရဂှ် ဂွံတီကေတ်ရ။ 

ပ္ဍဲကဵုဂိတုအံက်တဝ်ဗာ သ္ကုတ်လကြဴ တုဲကၠုၚ်တေံလေဝ် ညးဍုၚ်ကွာန် (၉) တၠတအ်ဂှ် ဟိုတ်နူဟွံမိက်မံၚ် သၟဝ်တဲ ပျူသဝ်ထဳတအ်တုဲ လုပ်ကၠုၚ်ဗ္ဒာဲဒလာဲလဝ် ဇရေၚ် ABSDF ရဂှ် ဂွံတီကေတ်ရ။ 

ပရိုၚ် – သြၚ်လောန်တိုၚ်မ်

ဗီု – ABSDF Column – 3