ဇြဟတ်ဒပ်ပၞာန် ဍိုန်လျစှ်ေကၠုၚ် စဵုကဵုဒးကလေၚ်ဒုၚ်ဒၟံၚ်တဲ ရဲဂြိပ်တိတ်နူဒပ်ပၞာန်တံ

နေဗျဳဒဝ်၊ ဒဳဇြေမ်ဗာ ၆

ဟိုတ်နူပေါဲဗ္တိုက် မက္တဵုဒှ်ဒၟံၚ် အလုံဍုၚ်တံဂှ်တုဲ ဒပ်ကံၚ်ဇြဳပၞာန် ဇြဟတ်ဍိုန်လျစှ်ေကၠုၚ်ဒၟံၚ် စဵုကဵုဒးကလေၚ်ဒုၚ်ဒၟံၚ်တဲ ကုရဲဂြိပ်တိတ်နူဒပ်ပၞာန်တံ၊ ကောန်ပၞာန်တြေံတြေံ ဒေါအ်ဇူလဝ်တံ ကေုာံ သီုကဵုညးမဂွံလဝ်အခေါၚ်ဂဥုဲတံဂှ်ရ။

ဒပ်ကံၚ်ဇြဳပၞာန် လေပ်ကေတ်တဴအရေဝ် ကုညးမဂြိပ်တိတ်နူကဵုဒပ်ပၞာန်တံ သ္ကာတ်တ်မြဟ်ဟ်ဂှ်ဝွံ ကုရဲဂြိပ်ပၞာန် မိက်ဂွံယိုက်ဂၠေၚ်တာလျိုၚ် ပ္ဍဲဒပ်ပၞာန်တံဂှ် ကဵုအခေါၚ်ဗၠးၜးနူဒုဟ်ဒဏ်တုဲ ပ္ဍဲကဵုဒပ် မကြပ်တံဂှ် ကလေၚ်ဒုၚ်အာတဲဏောၚ်ဂှ် ပ္ဍဲဂိတုဒဳဇြေမ်ဗာ ၃ တေံ လလောၚ်တြးလဝ်ရ။

ပ္ဍဲဂိတုဒဳဇြေမ်ဗာ ၃ ဂှ် မၞိဟ်ဒးဒုၚ်လလောၚ်တြးလဝ် ဟွံအာတ်အခေါၚ်မွဲသာ်တာလျိုၚ်လီုလဝ် ကၠာကၠာတေံဂှ် ယဝ်ရကလေၚ်စဴ နကဵုတၚ်ရန်တၟံ သွက်ဂွံယိုက်ဂၠေၚ်တာလျိုၚ်ပၞာန် ပ္ဍဲဒပ်တံဂှ်မ္ဂး ဟွံစၟတ်အာ နဒဒှ်ရဲဂြိပ်နူဒပ်ပၞာန်မွဲသာ် စၟတ်သမ္တီအာ နဒဒှ်တာလျိုၚ်လီုလဝ် ဟွံအာတ်အခေါၚ်သၟးရဂှ်တုဲ ဒုၚ်အာတဲကောန်ပၞာန်တံ သွက်ဂွံယိုက်ဂၠေၚ်တာလျိုၚ်ပၞာန်ဏောၚ်ဂှ် ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ဗိုလ်ဇြဝ်မေန်ထောန် သ္ဂးရ။

လ္ဂောံကဵုသၞောဝ်အက်ဥပဒေဒပ်ပၞာန်မ္ဂး သွက်ဂြိပ်တိတ်နူဒပ်ပၞာန် ကေုာံ ရီုဗၚ်ကဵုဇြဟတ်တံဂှ် ၝောံပိုဒ် ၃၇၊ သွက်တာလျိုၚ်လီု ဟွံအာတ်အခေါၚ်တံဂှ် ၝောံပိုဒ် ၃၈ စၞောန်ပျးလဝ်တုဲ ဒုဟ်ဒဏ်လၟေၚ်ၚ်တံဂှ်မ္ဂး အောန်အိုတ် ဒဏ်ထံၚ် နူကဵု ၂ သၞာံ စဵုကဵု ၇ သၞာံ ဖျေံစၟတ်ကေတ်အရေဝ်မာန်ဂှ် ထ္မံက်ထ္ၜးလဝ်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဒံက်တာလှကျဝ်ဇြဝ်ဂှ် အကာဲအရာဏံဝွံ ပ္ဍဲကဵုဒပ်ပၞာန်ဂှ် လ္ဂောံကဵုလၟိဟ်ကီု လ္ဂောံကဵုဍာ်ဒကေဝ်ကီုဂှ် ယအ်စှ်ေဒၟံၚ်တၟာဂလိုၚ်ဂှ်ရ နကဵုဒပ်ပၞာန် စသရိုဟ်ဒၟံၚ်ယျဂှ် သ္ၚဳဂၠိပ်လဝ်ရ။

“ပ္ဍဲကဵုဒပ်ပၞာန်ဂှ်လေဝ် ရဲဗ္တိုက်ချိုတ်တ်ပၠိုတ်တ်မာန် ရဲမၞုံကဵုအစောံစရာဲဍာ်ဒကေဝ်တံဂှ် စဵုကဵုဟွံမွဲ အောန်ဒၟံၚ်ယျ။ အေ ဂှ်တှ်ေ ဗွဲမဂၠိုၚ်ဂှ်လေဝ် သ္ကိုပ်ဒပ်တံ သ္ကိုပ်ဗိုလ်တံ မုတံဂှ်ပၠန်လေဝ် ၜိုတ်ဂွံဂှ် ကၟောန်စုတ်ဒၟံၚ်ထိုၚ်ပဠောံသၟးဂှ်ရ ဒပ်ပၞာန်ဂှ်တှ်ေ ရံၚ်အာလ္ပာ်လၟိဟ်ဂှ်ပၠန်လေဝ် အောန်စှ်ေဒၟံၚ်ကွေံကွေံယျ။ အစောံစရာဲဍာ်ဒကေဝ်တံဂှ်ပၠန်လေဝ် ယအ်ဒၟံၚ်ယျ။ ဒပ်ပၞာန် စသရိုဟ်ဒၟံၚ်ယျဂှ် ဟီုဂွံရ” သာ်ဝွံ သ္ဂးရ။

နကဵုဒပ်ကံၚ်ဇြဳပၞာန် ကုဂကောံရပ်လွဟ်ကောန်ဍုၚ်အရၚ် EAO တံ သီုကဵုဂကောံဒပ်စဵုဒၞါညးဍုၚ်ကွာန် PDF မမံက်ဂတဝ်ကၠုၚ် အလုံဍုၚ်မွဲ အပ္ဍဲပရေၚ်သီအဝဵုဗ္ဒါဲပိသၞာံဏံဂှ် က္တဵုဒှ်လဝ်ပေါဲဗ္တိုက် စဵုကဵု ၁၂၂၀၀ ဝါပြၚ်ရောၚ် ဂွံတီကေတ် နူကဵု ISP-Myanmar ရ။

အကာဲအရာဏံဂှ် နကဵုကောန်ဒပ်ကံၚ်ဇြဳပၞာန်ဂမၠိုၚ် မ္ၚးနူကဵုဇီုကပိုက်ချိုတ် အပ္ဍဲပေါဲဗ္တိုက်တံ၊ သ္ပ CDM တံဂှ် ဟိုတ်နူပရေၚ်ပၞာန် ၁၀၂၇ တုဲ အတိုၚ်တမ်ဒပ်မွဲ ကောန်ပၞာန်ၜါကၠံပြၚ် ဖျေံကၠုၚ်လွဟ် ပြံၚ်လှာဲကၠေံ ဝၚ်ဒပ်ပၞာန်မွဲပ္ၚံက်ဂှ်လေဝ် နွံဒၟံၚ်ပၠန်ရ။

သ္ကိုပ်ဗိုလ်ဇြဝ်မေန်ထောန် ညးမၞုံအခေါၚ်ဟီုဂးကံၚ်ဇြဳပၞာန်ဂှ် ကေၚ်ဒှ်လဝ်ကောန်ပၞာန်မွဲဝါမ္ဂး နကဵုစိုတ်ဓာတ် ကောန်ပၞာန်မွဲအာယုက် ညးမဂြိပ်လဝ်နူဒပ်ပၞာန်တံ၊ ကောန်ပၞာန်တြေံတြေံဒေါအ်ဇူလဝ်တံ၊ ဟိုတ်နူအကာဲအရာပရေၚ်ထတ်ယုက်တုဲ ကေတ်လဝ်အခေါၚ်တံ သွက်ဂွံယိုက်ဂၠေၚ်တာလျိုၚ် ပ္ဍဲဒပ်ပၞာန်မာန်ဂှ် မၞိဟ်ဆက်စၠောံကေတ်ကၠုၚ်အဆက်တံ နွံကၠုၚ်ဂၠိုၚ်ကဵုလ္ၚီယျဂှ် သ္ဂးရ။

ပ္ဍဲကဵုဏံ မၞိဟ်ဇၞော်ဇၞော်တံလေဝ် ပါလုပ်ဒၟံၚ်ဂှ်ရ ဟိုတ်နူအာယုက် ကေုာံ အကာဲအရာပရေၚ်ထတ်ယုက်တံတုဲ ကဵုအာတာလျိုၚ် ဂီုကၠီုသၟးရဂွံဏောၚ်ဂှ် ဂလာန်သ္ကိုပ်ဗိုလ်ဇြဝ်မေန်ထောန် ဟီုဂးလဝ်ဂှ် ပ္ဍဲဂိတုဒဳဇြေမ်ဗာ ၅ တေံ ထ္မံက်ထ္ၜးလဝ် ပ္ဍဲကဵုလိက်ပရိုၚ် တြးဝါဒဒပ်ပၞာန်တံရ။

အခိၚ်လၟုဟ် နကဵုဂကောံဒပ် တမ်ဒပ်တံဂမၠိုၚ် သွက်ဂွံကလေၚ်ထ္ပက်အဇာ ဒဒှ်မကောန်ပၞာန် မဒးဆောံလေၚ်ဒၟံၚ်တံဂှ်တုဲ တဲဍိုန် မွဲဂိတု ကောန်ပၞာန်မွဲတၠ၊ မွဲသၞာံ ကောန်ပၞာန် ၁၂ တၠ ညံၚ်ဂွံပကောံဂွံဂှ်ကဵု ယဝ်ရပကောံပကေဝ်ဟွံဂွံမ္ဂး ကေတ်အာအရေဝ်ဏောၚ် တၚ်စၞောန်ဓလုက် ကံၚ်ဇြဳပၞာန်တံ မံက်တိတ်ဒၟံၚ်ရ။

သၞာဲဒဴဒပ်ပၞာန် မသ္ပလဝ် CDM တံဂှ် တၚ်လလောၚ်တြး ကလေၚ်ဒုၚ်တဲ ရဲဂြိပ်နူဒပ်ပၞာန်တံဂှ်ဝွံ ပ္ဍဲဝၚ်ဒပ်ပၞာန်ဗၟာဂှ် ဟွံကေၚ်နွံလဝ်မွဲလှ်ေတုဲ လၟေၚ်ဒဒှ်ဏံဝွံ ပ္ဍဲဒပ်ပၞာန်တေံ ကောန်ပၞာန်အောန်ဒၟံၚ်ကွေံကွေံယျဟီုဂှ် ထ္ၜးဒၟံၚ်ရောၚ် ဟီုဂးဒၟံၚ်တံ နွံဒၟံၚ်ရ။

အခိၚ်လၟုဟ် ဒပ်ကံၚ်ဇြဳပၞာန်ဝွံ ပ္ဍဲကဵုဒေသသေံသၟဝ်ကျာ၊ သက်ကိုၚ်၊ ချေၚ်၊ ကရေၚ်ဍာဲ၊ ရခေၚ်၊ သက်ကိုၚ်၊ ကရေၚ် ကေုာံ ပ္ဍဲကဵုဒေသဗဂေါတံဂှ် ဒးဒုၚ်ဒၟံၚ် ပၞာန်ထ္ပက်ဗလးတိ ဂကောံဒပ်ပံၚ်ကောံ PDF ကေုာံ ဂကောံရပ်လွဟ်ကောန်ဍုၚ်အရၚ် EAO တံရ။

ပ္ဍဲကဵုအကာဲအရာသာ်ဏံဂှ် ဒပ်ပၞာန်မစကာဒၟံၚ် အရီုဗၚ်တရဴကျာတံ လောန်နူသၞောတ်ဗ္ၜတ်ဂှ် အပ္ဍဲပေါဲဗ္တိုက်အလုံဍုၚ်မွဲဂှ် ဒးဒုၚ်ဗ္တိုက်ဒၟံၚ် နကဵုဇြဟတ်မဂၠိုၚ်ဂၠေၚ်ရောၚ် ပ္ဍဲကောံဓရီုကံၚ်ဇြဳပၞာန် သတ္တာဟတုဲကၠုၚ်တေံ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ကရောတ်တသဝ်လဝ်ဏီရ။

ပရိုၚ်−သြၚ်လောန်တိုၚ်(မ်)

ဗီု−CJ