သွက်ဂွံသောၚ်ကလးအာ နနဲပရေၚ်ဍုၚ်ကွာန်ဂှ် က္ဍိုပ်သ္ကိုပ်ပၞာန် စဗြုကၠုၚ်

နေဗျဳဒဝ်၊ ဒဳဇြေမ်ဗာ ၆

က္ဍိုပ်သ္ကိုပ်ပၞာန်သီအဝဵု မဒးကျဗြံဒၟံၚ် အပ္ဍဲပေါဲဗ္တိုက်အလုံဍုၚ်မွဲဂှ် နကဵုဂကောံဒပ်ရပ်လွဟ်ဂမၠိုၚ် သွက်ဂွံသောၚ်ကလး နကဵုနဲကဲပရေၚ်ဍုၚ်ကွာန်အိုတ်ဂှ် ဟီုပ္တိတ်ကၠုၚ် အပ္ဍဲကောံဓရီုကံၚ်ဇြဳပၞာန် မကၠောန်ဗဒှ်လဝ် ပ္ဍဲဂိတုဒဳဇြေမ်ဗာ ၄ တေံရ။

ဟိုတ်နူပရေၚ်ဗ္တိုက် ဂကောံဇြဟတ်ပၠန်ဂတးတံ အလုံဍုၚ်မွဲဂှ်ကီု သီုကဵုပရေၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံတံဂှ်တုဲ ဒးဆောံလေၚ်လဝ်ဍုၚ် ဟွံအောန်နူကဵု ၁၈ ဍုၚ်ဂှ်ကီု၊ ဒးဆောံလေၚ်လဝ် ဗ္ဒိုပ်ဒပ်ဂၠိုၚ်ကဵုကၠံဂှ်ကီု၊ အခိၚ်လုပ်စိုပ်ဖျေံကၠုၚ်လွဟ် အတိုၚ်တမ်ဒပ်မွဲတံ နွံကၠုၚ်ဂှ် က္ဍိုပ်သ္ကိုပ်ပၞာန် ဟီုပ္တိတ်ကၠုၚ် သာ်ဏံရ။

က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် နကဵုဂကောံဒပ်ရပ်လွဟ်ဂမၠိုၚ် ယဝ်ရဆက်ဒိုဟ်ဓီုဒၟံၚ်မ္ဂး ဘဲဒဏ်တံဏံဂှ် ညးဍုၚ်ကွာန်တံရဟေၚ် ဒးဒုၚ်စသိုၚ်ဏောၚ်တုဲ ဒးသောၚ်ကလးအာ နကဵုနဲကဲပရေၚ်ဍုၚ်ကွာန်ဂှ် နွံပၟိက်ရောၚ် ပါဲကၠေံဒုဟ်ညးတံတုဲ ဟီုဂးလဝ်ရ။

ဆ္ဂး ဂလာန်က္ဍိုပ်သ္ကိုပ်ပၞာန် ဟီုဂးကၠုၚ် သွက်ဂွံသောၚ်ကလး နကဵုနဲကဲပရေၚ်ဍုၚ်ကွာန်ဂှ်ဝွံ စပ်ကဵုသ္ဂောံသဳကၠဳအာ နကဵုဗီုပြၚ်သာ်လဵု အကာဲအရာသာ်လဵုတံဂှ်ကီု ဂလာန်ပ္တိုန်တၟိတၟိတံဂှ်လေဝ် ဟွံဂွံဆဵုကေတ်လဝ်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်၊ ပရေၚ်ပၞာန် ဥူတာန်သဵုနာၚ်ဂှ် ဂလာန်မဟီုဂးဒၟံၚ် သွက်ဂွံသောၚ်ကလး နကဵုနဲကဲပရေၚ်ဍုၚ်ကွာန်ဂှ်ဝွံ နကဵုဂကောံပၞာန် အခိၚ်ဒှ်ဒၟံၚ်အကြေပ်အဂြတ် ဂၠံၚ်တိတ်ဟွံမွဲဂှ် ဒှ်အရာပ္တိတ်ဇြဟတ် သွက်ဂွံဂွံပၞော်တိတ်ဏောၚ်တုဲ နကဵုညးဍုၚ်ကွာန်တံ ပတှ်ေတုဲ ညံၚ်ဂၠံၚ်ဂွိုအ်ဗၠေတ်အာဂှ် နွံပၟိက်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“တၠအဝဵုပၞာန်တံဂှ် ဒှ်ကၠုၚ်အကြေပ်အဂြတ် ဂၠံၚ်တိတ်ဟွံမွဲတှ်ေ ဗြုကၠုၚ်သာ်ဏံအိုတ်ရ။ လ္တူဏံဂှ် နကဵုညးဍုၚ်ကွာန်ပိုယ်တံ အရာဍေံတံဟီုလဝ်ဂှ် ပတှ်ေတုဲ ညံၚ်ဂွိုအ်ဗက်ဒးဂၠံၚ်ဗၠေတ်အိုတ်ဂှ် ပၟိက်ဇၞော်ရ။ တမ်ရိုဟ် ဒုက္ခ၊ သုက္ခ မဒှ်ဒၟံၚ် ပ္ဍဲဍုၚ်ဗၟာလၟုဟ်ဏံ သီုဖအိုတ်ဂှ် ဟိုတ်နူပြဝပကီုပရာပ် ဥက္ကဌကံၚ်ဇြဳပၞာန် မေန်အံၚ်လှာၚ်ကဵု ကောန်ဂကောံကံၚ်ဇြဳပၞာန် မွဲက္ဍိုပ်တံ ပရေၚ်ဂစိုတ်ဂယိုၚ် ဟွံမွဲကဵုသၞောဝ်ဓဝ်တံ၊ ပရေၚ်ဗ္တိုက်တံဂှ်တုဲ ဒှ်ဒၟံၚ်ဏောၚ်ဂှ် ဒးကၠိုဟ်လဝ်ဏောၚ်။ တုဲပၠန် ညံၚ်ဂွိုအ်ကဵုဒး က္ဍိုပ်သ္ကိုပ်ပၞာန် ပၞော်တိတ်ပရေၚ်ဍုၚ်ကွာန်ဂှ်လေဝ် ပၟိက်ဇၞော်ရ။ အခိၚ်လၟုဟ် ကံၚ်ဇြဳပၞာန်သီုဖအိုတ် ပါလုပ်သီုကဵုညးဂှ် ပ္တိုန်ရုၚ်သၞောဝ်ဓဝ်ညးဍုၚ်ကွာန်တုဲ သွက်ဂွံစဳရေၚ်ဂဗုတ်မာန်ဂှ် နူကဵုသွာၚ်နာနာ သွက်ဂွံဘိုၚ်ရီုဗၚ် ပၠန်ဂတးက္ညၚ်ဏံအိုတ်ဂှ် နွံပၟိက်ရောၚ် အဲညာတ်ကေတ်ရ“ သာ်ဝွံသ္ဂးရ။

က္ဍိုပ်သ္ကိုပ်ပၞာန်ဂှ် ဒဒှ်ရဒတဴလိုၚ် သၟဝ်သၞောဝ်သ္ဇိုၚ်ဒက်ပ္တန် ၂၀၀၈ ကေုာံ တာလျိုၚ်ပိတၚ်ဂှ်ကီု ကေုာံ ပ္ဍဲကဵုသၞောတ်ကၟိန်ဍုၚ်ပံၚ်ကောံ မဒုၚ်သ္ဇိုၚ်ကဵု ဒဳမဝ်ကရေဇြဳ ကေုာံ ဖေဝ်ဒရေဝ် ဂၠံၚ်ဒပ်ပၞာန်ဗၟာ မကွာ်ဒၟံၚ်ဂှ် တၚ်နၚ်ဂကောံရပ်လွဟ်တံအာတ်မိက်လဝ်သီုဖအိုတ် ပါလုပ်ဒၟံၚ်ရောၚ် ဟီုဂးလဝ်ရ။

ဥူကျဳမျေတ် ညးရေၚ်တၠုၚ်ဓဗုတ်ကၠတ်ထဝ်သၞောဝ်ဓဝ်ဝှ်ကြံၚ်ဂှ် ဂလာန်က္ဍိုပ်သ္ကိုပ်ပၞာန် ဟီုဂးလဝ်ဂှ်ဝွံ ဒဒှ်မကျဒၟံၚ် ပ္ဍဲပရေၚ်ပၞာန်တံဂှ် ဟိုတ်နူမိက်ဂွံသ္ပကၠေံမၛ္ဇဟ်ဂှ်တုဲ သွက်ဂွံသဳကၠဳ သၟဝ်သၞောဝ်သ္ဇိုၚ် ၂၀၀၈ ဂှ် ဒှ်ဟွံမာန်ပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ကျဒၟံၚ်ဂှ်လေဝ် မိက်ဂွံပညံၚ်ဟွံတီ။ မွဲလ္ပာ်တေံဂှ်လေဝ် ပလေဝ်ဒၟံၚ် သွက်ဂွံဂြိပ်တိတ်။ ဒးဒုၚ်ကၟာတ်လဒဵုဒၟံၚ် နူကဵုသွာၚ်ဇဳယျ။ သာ်လဵုပတုဲ ဂွံအာသဳကၠဳ သၟဝ် ၂၀၀၈ ဂှ်ရော။ ပိုယ်တံဂှ် ဗ္တိုက်ဒၟံၚ် ၂၀၀၈ ဂှ်ဏောၚ်။ တွဵုရးတံကီု၊ EAO တံကီု ၊ ပိုယ်တံကီု သီုဖအိုတ်ဂှ် ဗ္တိုက်ဒၟံၚ် ၂၀၀၈ ဏံဂှ်ဏောၚ်။ အေ ဇှ်ဂှ် သဳကၠဳအာ သၟဝ် ၂၀၀၈ ဏောၚ်ဟီုဂှ် ကြအ်ဒၟံၚ်ဟာရ။ ညအ်ဂှ် ပိုယ်တံ ဗက်ဟီုဒၟံၚ်ဂှ်လေဝ် ဟွံဂွံပုဟ်။ သၟဝ် ၂၀၀၈ ဂှ် သ္ဇက်ဂွံဒးသဳကၠဳ မုဟွံမွဲပုဟ်။ ၝဏံကြအ်ဒၟံၚ်ယျဏောၚ်။ ယဝ်ရပိုယ်သဳကၠဳတှ်ေ ပရေၚ်ဍုၚ်ကွာန်ဂှ် ချိုတ်အာဏောၚ်။ သဳကၠဳဟွံဂွံပုဟ်၊ အခိၚ်လၟုဟ်ဂှ် ဒးဗ္တိုက်ဒဵုကဵုဇၞးဏောၚ်“ သာ်ဝွံ သ္ဂးရ။

အပ္ဍဲကောံဓရီုကံၚ်ဇြဳပၞာန်ဂှ် က္ဍိုပ်သ္ကိုပ်ပၞာန် ဟီုလဝ် အရာဟွံညိၚ်ဝတ် ပ္ဍဲတွဵုရးရခေၚ်ဂှ်ဝွံ ဒှ်ဟိုတ်နူဒပ်ပၞာန်ရခေၚ် AA တုဲ စမြိုၚ်သ္ၚိဒၟံၚ် လ္တူဍုၚ်လွိုၚ်ကဝ် တွဵုရးကရေၚ်ဍာဲတံ ဒးလီုလာ်အာဂှ်ဝွံ ဟိုတ်နူဗော်တောတက်ကောန်ဂကူကရေၚ်ဍာဲ KNPP ဏောၚ်ဂှ် စောဲစပ်လဝ်တုဲ လၞုက်ထောံလဝ် ပရေၚ်ဗ္တိုက်တရဴကျာ ဂကောံပၞာန်တံဂှ်တုဲ ဟီုဂးလဝ်ရ။

အလုံမွဲကၟိန်ဍုၚ် အပ္ဍဲကာလသီအဝဵုဏံ ဟိုတ်နူပရေၚ်ဗ္တိုက်တရဴကျာတံတုဲ ကောန်အရာပ် ၄၀၀၀ ပြၚ် ဒးချိုတ်အာလဝ်ရောၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP လလောၚ်ပ္တိတ်လဝ်ရ။

သ္အာၚ်နူဂှ်ပၠန် ဟိုတ်နူကောန်ဒပ်ကံၚ်ဇြဳပၞာန် ကေုာံ ဂကောံပျဳတုသေတ်တံ စံၚ်ပလီုပလာ်လဝ်တုဲ စမြိုၚ်သ္ၚိဌာန် အပံၚ် ၈၆၀၀၀ ပြၚ် ပၟတ်တူလီုလာ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး ဂကောံသုတေသန ISP-Myanmar ရ။

မွဲလ္ပာ်ပၠန်ဂှ် ဟိုတ်နူပရေၚ်ဗ္တိုက် ဂကောံဇြဟတ်ပၠန်ဂတးတံတုဲ ကံၚ်ဇြဳပၞာန် မ္ဒးဆေၚ်ဒၟံၚ်မုက် ကုဇြဟတ်လေၚ်ဒိုက်တံဂှ်ဝွံ စဵုကဵုဒးကလေၚ်ဒုၚ်တဲ ရဲဂြိပ်နူဒပ်ပၞာန်တံဂှ် ဒးဆေၚ်ဒၟံၚ်မုက် ကုဇြဟတ်ဍိုန်လျတံရ။

ပရိုၚ်−သြၚ်လောန်တိုၚ်(မ်)

ဗီု−MOI