ညးပါဲဒဴဘဲပၞာန်ကျာ်မြဟ်တံ နွံပၟိက်ဒၟံၚ်ကဵု ဇွောံမစၞစ၊ ယာတ်လ္တက် ကေုာံ ဂၠိက်ယာတ် ကာတၟေၚ်

ကျာ်မြဟ်၊ ဒဳဇြေမ်ဗာ ၆

ဟိုတ်နူပေါဲဗ္တိုက် မက္တဵုဒှ်ဒၟံၚ် အပ္ဍဲပွိုၚ်ဍုၚ်ကျာ်မြဟ်၊ တွဵုရးဍုၚ်မန်ဂှ်တုဲ ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ်တံဝွံ နွံပၟိက်ဒၟံၚ်ကဵု ဇွောံမစၞစ၊ ယာတ်လ္တက် ကေုာံ ဂၠိက်ယာတ်တံ ကာတၟေၚ်ဂှ် ဂွံတီကေတ် အတိုၚ်ဂလာန်ညးဒေသတံရ။

ပပ္တံနူဂိတုနဝ်ဝေမ်ဗာ ၁၀ တုဲကၠုၚ်တေံတုဲ ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ် ဗ္ဒိုပ်ဗၠာဲသၟိၚ်တိဍာ် ကေုာံ သၞေဟ်ကၚ်ဒဒန်ၜါသွာၚ် ပွိုၚ်ဍုၚ်ကျာ်မြဟ်ဂှ်တုဲ ပေါဲဗ္တိုက်ၜါလ္ပာ်တံ က္တဵုဒှ်ဒၟံၚ်အရိုဟ်တ္ၚဲရ။

ပေါဲဗ္တိုက်တံဏံဝွံ ဗွိုၚ်ဍေံသၠဲလးကၠုၚ် စဵုကဵုကွာန်မၞုံဗ္ဒါဲဗ္ဒါဲ ဒဒန်ထီုမၠဵု ပွိုၚ်ဍုၚ်ကျာ်မြဟ်ဂှ်တုဲ ညးဍုၚ်ကွာန်ၜါဠက်ပြၚ် နူကဵုကွာန် ၂၀ ကွာန် ပါလုပ်သီုကဵုၜါသွာၚ်၊ မဂြောဝ်၊ ကအ်ပၞဟ်၊ ကအ်ဒုန်၊ လှာဂဇိုၚ်၊ ဝါဗ္ၚ၊ ကအ်ပရာင်၊ မိကတေတ်၊ (မီးသွေးကုန်း) ၊ တၟံဗြဴတံဂှ် ဒးဂြိပ်ဒဴပါဲဒလေတ်ဒၟံၚ်ရ။

ညးဍုၚ်ကွာန်ပါဲဒဴဘဲပၞာန် မဂြိပ်ဒဴပါဲဒလေတ်ကၠုၚ် ဗွဲမဂၠိုၚ်ဂှ်ဝွံ ဟိုတ်နူဒးပါဲမံၚ်ဒၟံၚ် ပ္ဍဲဘာလကျာ်၊ ကၠအ်ဂူတံ ကေုာံ ပ္ဍဲထီု(ပျားတောၚ်) တံဂှ်ရ တ္ၚဲဒးပါဲဘဲပၞာန် ဂၠိၚ်သ္ၚောဲကၠုၚ်ဗက် အရာမနွံပၟိက် ကုအရီုဗၚ်တံလေဝ် သၠုၚ်တိုန်ကၠုၚ်ဂှ် ညးဒေသပါဲဒဴဘဲပၞာန်တံ ဟီုဂးလဝ်ရ။

အတိုၚ်ဂလာန် ညးဒေသပါဲဒဴဘဲပၞာန် ၅ တၠဂှ်မ္ဂး ပြဟ်ဟ်ဏံ မပ္တံနူကဵုဇွောံမစၞစ၊ ဂဥုဲဇဗ၊ ပဠောံၜိုဟ်၊ ယာတ်လ္တက်တံကီု သီုကဵုကပေါတ်အရပ်စပ်ညးဗြဴလၟေၚ်ဂိတုတံဒှ်တမ် နွံပၟိက်ဒၟံၚ်တုဲ မၞိဟ်ကၠုၚ်စိုပ်ရီုဗၚ်ကဵုဒါန်တံလေဝ် စဵုကဵုဟွံမွဲအောန်ကြဳဒၟံၚ်ဂှ် ဟီုရ။

ဂကောံမန်ဂမၠိုၚ်ကီု ဂကောံမှာဇန်လ္ၚဵုတံကီု အာစိုပ်ကဵုဒၟံၚ်ဒါန် ကုညးပါဲဒဴဘဲပၞာန်တံ နွံကီုလေဝ် ကွာန်ပေါဲဗ္တိုက်က္တဵုဒှ်လ္ၚဵုတံ ဒဵုကဵုအခိၚ်လၟုဟ် ဟွံဂွံအရီုဗၚ်ဏီပုဟ်ဂှ် ဂွံတီကေတ်ရ။

စပ်ကဵုအခက်အခုဲ ညးဍုၚ်ကွာန်ပါဲဒဴဘဲပၞာန်ကျာ်မြဟ်တံဂှ်တုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်သၟုက်လဝ် ဒံက်တာအံၚ်မျာတ်ကျဝ်ဇြုၚ် ညးမၞုံအခေါၚ်ဟီုဂး ဂကောံအလဵုအသဳတွဵုရးဍုၚ်မန် ကံၚ်ဇြဳပၞာန်ခါန်ကၞက်လဝ်ဂှ် နကဵုဖုၚ်ကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။

ညးဒုၚ်ကာတွဵုရးဍုၚ်မန် ဟွံမိက်ထ္မံက်ယၟုမွဲတၠဂှ် ပ္ဍဲကဵုကံၚ်ဇြဳပၞာန်တွဵုရးဂှ် အစဳဇန်ဂွံရီုဗၚ်ကဵု ညးဍုၚ်ကွာန်ပါဲဒဴဘဲပၞာန်တံဂှ် ဟွံမွဲတုဲ သဳကၠဳဒၟံၚ် အပ္ဍဲကဵုကောံဓရီုတံလေဝ် ဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အတိုၚ်တၚ်လလောၚ်တြး ဂကောံသုတေသန ISP-Myanmar ဂှ်မ္ဂး ပရေၚ်ပၞာန် ၁၀၂၇ ဏံကီု ဟိုတ်နူပေါဲဗ္တိုက် အပ္ဍဲကာလသီအဝဵုဏံဂှ်တုဲ အလုံမွဲကၟိန်ဍုၚ် ညးထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံ ၄ ပြကောဋိကိုဋ်ပြၚ် နွံကၠုၚ်ဂှ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media