ၜဳကလေၚ်၊ ဒဳဇြေမ်ဗာ (၇)
ဗၠာဲသၟိၚ်ထိၚ်ယာဉ် ရပ်ကွဳလိုန်ဓာတ်တုဲ ကရေပ်ဓရတ်အာတ်မိက်ဒၟံၚ်သြန် ပ္ဍဲဒဒန်ပသဲ အကြာကွာန်တောၚ်ဇြောန်ကဵု ကွာန်ကအ်ကဍောတ် ပွိုၚ်ဍုၚ်ၜဳကလေၚ်၊ တွဵုရးဍုၚ်မန်ဂှ် ဟိုတ်နူဒးဒုၚ်ဗတိုက်တုဲ ဒးချိုတ်လဝ် (၃) တၠ ဒးလဝ်ဘဲဝပ် (၂) တၠရဂှ် ဂွံတီကေတ် နူဇရေၚ်ပကဖတွဵုရးဍုၚ်မန်ရ။
ပ္ဍဲဂိတုဒဳဇြေမ်ဗာ စၟတ်တ္ၚဲ (၅) အခိၚ်ဇိုၚ်သဝ်တ္ၚဲ ၜိုတ် (၃) နာဍဳဂှ် ကောန်ဒပ်ဗၠာဲသၟိၚ်ကံၚ်ဇြဳပၞာန်ကဵု ဗၠာဲသၟိၚ်ထိၚ်ယာဉ်ကံၚ်ဇြဳပၞာန် ကၠုၚ်စိုပ်စၟဳစၟတ်တုဲ ရပ်ကေတ်ဒၟံၚ်ကွဳလိုန်ဓာတ် ဗ္ဒာဲဒဒန်ပသဲဂှ် ဂကောဇြဟတ်ပၠန်ဂတးတအ် ဗာမ်မာၚ် ဖံက်ခတိုဟ်ဗတိုက်လဝ်ရ။
ဗၠာဲသၟိၚ်တအ်ဏံ ကၠုၚ်ရပ်ကေတ်ဒၟံၚ်ကွဳလိုန်ဓာတ် ပ္ဍဲဗ္ဒာဲဒဒန်ပသဲလၟိုန်တုဲ ဟိုတ်နူဘပဠ ကရေပ်ဓရတ်အာတ်မိက်ဒၟံၚ် သြန်ဂှ်ရ စၟတ်သမ္တီကေတ် နဒဒှ်ဌာန်ပ္တဝ်ပၞာန်တုဲ ဗတိုက်လဝ်ရဂှ် ဒုညးတာလျိုၚ်ပကဖတွဵုရးဍုၚ်မန် ကိုဝ်သဝ်ထူအောၚ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကြဴဴနူဒးဒုၚ်ဖံက်ခတိုဟ်လဝ်မာၚ်တုဲဂှ် ဗၠာဲသၟိၚ် နူကဵုလ္ပာ်ကံၚ်ဇြဳပၞာန် ဟိုတ်နူပန်ပှော်လဝ် ကြာန်န်ဒၟာန်န်တုဲ ညးဍုၚ်ကွာန်အာတရဴတအ် ကလေၚ်ဂတးစဴ ကွဳစက်လ္ၚဵုဂှ် ဒးဒုၚ်ကၟာတ်ဂွံလဝ်ဗ္ဒာဲ မွဲနာဍဳရဂှ် ညးဒေသတအ် ဟီုလဝ်ရ။
အတိုၚ်ညးဒေသတအ်ဟီုလဝ်မ္ဂး ဟိုတ်နူဖံက်ခတိုဟ်လဝ်မာၚ်တုဲ ကောန်ဒပ်ကံၚ်ဇြဳပၞာန်ကဵု ဗၠာဲသၟိၚ်ထိၚ်ယာဉ် ဟွံအောန်နူ (၄) တၠ လောတ်စှ်ေလဝ် ၜိုန်ဂွံဆဵုကေတ်ကီုလေဝ် ဟွံဂွံတီကေတ် အကာဲအရာသောဲသောဲဗြောဲဗြောဲရဂှ် ဟီုထ္ၜးလဝ်ရ။
ပ္ဍဲကဵုဂိတုနဝ်ဝေမ်ဗာ တုဲကၠုၚ် စၟတ်တ္ၚဲ (၄) တေံလေဝ် ကောန်ဒပ်ဗၠာဲသၟိၚ် နူဗဒိုပ်ဗၠာဲသၟိၚ်ဝၚ်ကမွဲတၠ ကၠုၚ်သုၚ်အရက် ပ္ဍဲကဵုဆေၚ်အရက် ဇိုၚ်ဂၠံၚ်ကွဳစက် ကွာန်ဝၚ်က ပွိုၚ်ဍုၚ်ၜဳကလေၚ်ဂှ် ဟိုတ်နူဒးဒုၚ်ပန်တုဲ ဒးချိုတ်လဝ်ရ။
ဟိုတ်နူပရိုၚ် ဂကောံဇြဟတ်ပၠန်ဂတးတအ် ချဳဒရာၚ်ပေါဲဗတိုက်သီဍုၚ်တုဲ ပ္ဍဲပွိုၚ်ဍုၚ်ၜဳကလေၚ်ဂှ် ကံၚ်ဇြဳပၞာန် ပတေၚ်ဂြတ်လဝ် ပရေၚ်ဂိုကၠီုတုဲ ဂကောံသ္ၚိကၟိန်ညးယိုက်ဝန် မၞုံပ္ဍဲသ္ၚိသ္ဇိုၚ်ဝန်တအ်ဂှ်လေဝ် ဆုဲပြံၚ်မံၚ်တန်ကၠုၚ် ပ္ဍဲဍုၚ်နွံရ။
ပရိုၚ် – သြၚ်လောန်တိုၚ်မ်
ဗီု -CJ
sanlontai