ကအ်ကြိက်၊ ဒဳဇြေမ်ဗာ ၇
တွဵုရးကရေၚ်၊အပ္ဍဲပေါဲဗ္တိုက်ဍုၚ်ကအ်ကြိက်ဂှ် ဂကောံဇြဟတ်ပၠန်ဂတးတံ ကေုာံ ညးရီုဗၚ်ဟံၚ်ပြာ်ပရေၚ်မၞိဟ်တံ အာစိုပ်ရီုပ္တိတ်လဝ် ညးဍုၚ်ကွာန်ဒေသတံကဵု ညးဒဳယာန် အာကၠုၚ်ဟွံဂွံ နွံဒၟံၚ်လ္တူဍုၚ်တံကဵု လ္တူဂၠံၚ်ဇၞော်အာယှတံဂှ် ဂွံတီကေတ် ဇရေၚ်ညးဒေသကအ်ကြိက်တံရ။
ပေါဲဗ္တိုက်ဍုၚ်ကအ်ကြိက် မစက္တဵုဒှ်လဝ် ပ္ဍဲဂိတုဒဳဇြေမ်ဗာ ၁ နူဂယးပြဟ်ဂှ်ဝွံ ပ္ဍဲကဵုတ္ၚဲဂိတုဒဳဇြေမ်ဗာ ၆ မရနုက်ကဵု ၆ တ္ၚဲဂှ်လေဝ် ပ္ဍဲကဵုဗ္ဒါဲဂၠံၚ်ဇၞော်အာယှ ဍုၚ်ကအ်ကြိက်ဂှ် ပေါဲဗ္တိုက်ၜါလ္ပာ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ ဆက်သ္ကာတ်မြဟ်ဒၟံၚ်ရ။
ဟိုတ်နူပေါဲဗ္တိုက်တုဲ ညးဒေသသှ်ေဒၟံၚ် အပ္ဍဲဍုၚ်တံတုဲ သ္ဂောံတိတ်စ္ဍးနွံဒၟံၚ်တံဂှ် ညးရီုဗၚ်ဟံၚ်ပြာ်တံ အာစိုပ်ရီုဗၚ်ပလံၚ်ဗစိုပ်ကဵုလဝ် ဒၞါဲဒေသသၟိက်မိက်ဂွံအာတံဂှ်တုဲ မၞိဟ်ဒဳယာန် အာကၠုၚ်ဟွံဂွံ နွံဒၟံၚ်လ္တူဂၠံၚ်ဇၞော်အာယှတံဂှ်လေဝ် ဂကောံဇြဟတ်ပၠန်ဂတးတံ ရီုဗၚ်ဟံၚ်ပြာ်ပ္တိတ်ကဵုလဝ်ရောၚ်ဂှ် ညးဒေသတံ ဟီုရ။
ဟိုတ်နူပေါဲဗ္တိုက်ကအ်ကြိက်တုဲ ညးဍုၚ်ကွာန်ဒေသတံဝွံ ဂြိပ်ဒဴပါဲဒလေတ်ဒၟံၚ် လ္ပာ်နဘူ၊ ကြုၚ်ဒဵု၊ သာမည၊ ဘာအၚ်တံတုဲ သွက်ညးဍုၚ်ကွာန်ဒေသ ဂြိပ်ဒဴပါဲဒလေတ်ကၠုၚ်တံဂှ် ဒးဂဗဒၟံၚ် အခက်အခုဲဗွဲမဂၠိုၚ်ဂၠေၚ်တုဲ နွံပၟိက်ဒၟံၚ်ကဵု အရီုဗၚ်တံရောၚ်ဂှ် ဂွံတီကေတ်ရ။
ပေါဲဗ္တိုက်ဍုၚ်ကအ်ကြိက် လအ်ကၠုၚ် ဗ္ဒါဲမွဲသတ္တာဟဂှ်ဝွံ ပရေၚ်ဇီုကပိုက်ချိုတ်ဂျိုၚ် ၜါလ္ပာ်တံ နွံဒၟံၚ်တုဲ ဒၞါဲကံၚ်ဇြဳပၞာန်တံ ဖျေံလဝ်ဒပ်တံဂှ် ဂကောံဇြဟတ်ပၠန်ဂတးတံ သီဂွံလဝ်တုဲ အပ္ဍဲအခိၚ်ကာလပေါဲဗ္တိုက်ဂှ် ဒပ်ကံၚ်ဇြဳပၞာန် ကၠောန်သ္ပလဝ် ပရေၚ်ဗ္တိုက်တရဴကျာ လ္တူဍုၚ် ဂၠိုၚ်ၚ်ကဵုဝါရ။
သ္အာၚ်နူဂှ်ပၠန် ဂၠံၚ်ဇၞော်အာယှ ဂၠံၚ်တရဴသွံရာန်ဗၞိက် ပယျဵုသေံ−ဗၟာဂှ်လေဝ် ဆက်ဒးကၟာတ်လဝ်တုဲ ပ္ဍဲဒၞါဲဂၠံၚ်ကာလ္တူဒဵု ထိုအ်ကဝ်ကိုဝ်−မြဝတဳ သၟဝ်ကျာပွိုၚ်ဍုၚ်ကအ်ကြိက်ဂှ်လေဝ် ကဵုလဝ်အခေါၚ် ယာန်ဖ္ဍိုက်ညးအာတရဴဍောတ်တ်သၟးရတုဲ ယာန်ဇၞော်ဇၞော်တံဂှ် လ္ပာ်သၞေဟ်ကၚ် BGF တံ ဟွံကဵုအခေါၚ်တတ်ကၠောံအာကၠုၚ်ပုဟ်ဂှ် ဂွံတီကေတ်ရ။
ဟိုတ်နူပေါဲဗ္တိုက်ဍုၚ်ကအ်ကြိက်တုဲ ညးဍုၚ်ကွာန်ဒေသဗွဲမဂၠိုၚ်ဂၠေၚ် ဇီုကပိုက်ချိုတ် ကလိဂွံလဝ်ဝပ်တံ နွံဒၟံၚ်တုဲ မၞိဟ်ဂၠိုၚ်ကဵုဠက် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
အတိုၚ်စရၚ်လၟိဟ်မၞိဟ်သ္ဂာဗ္တံ ၂၀၁၄ တေံဂှ်မ္ဂး ဍုၚ်ကအ်ကြိက် လၟိဟ်မၞိဟ် ဗ္ဒါဲ ၅၀၀၀၀ မံၚ်တန်တဴဒၟံၚ်ဂှ်ဝွံ ဟိုတ်နူပေါဲဗ္တိုက်တုဲ ကှ်ကေဲသ္ၚိတ်ဇြဒၟံၚ်တုဲ မၞိဟ်မံၚ်စံၚ်စဵုကဵုဟွံမွဲ အောန်ကြဳဒၟံၚ်တုဲ ဒှ်ကၠုၚ်ဒၟံၚ် အကာဲအရာဍုၚ်လီုလီုဂှ်လေဝ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai