မတ်မလီု၊ ဒဳဇြေမ်ဗာ ၃၁
အပ္ဍဲကာလဒပ်ပၞာန်သီအဝဵု သၞာံ ၂၀၂၃ ပွိုၚ်မွဲသၞာံဂှ် ကောန်ထံၚ်ပရေၚ်ဍုၚ်ကွာန် ဒးဒုၚ်ဂစိုတ်လဝ် ပ္ဍဲထံၚ် ဟွံမွဲကဵုဗဗွဲသၞောဝ်ဂှ် နွံကၠုၚ် စဵုကဵု ၁၈ တၠရောၚ် ထ္မံက်ထ္ၜးလဝ် ပ္ဍဲကဵုလိက်ဒုၚ်စဳရေၚ်ကၞောတ်သၞာံ ဇာဇၞိက်ကောန်ထံၚ်ပရေၚ်ဍုၚ်ကွာန် စပ်ကဵုအလုံဍုၚ်မွဲရ။
ဒပ်ကံၚ်ဇြဳပၞာန်ဝွံ စနူအခိၚ်သီအဝဵုတုဲ ဂစိုတ်ဒၟံၚ်ကောန်ထံၚ်ပရေၚ်ဍုၚ်ကွာန် ရပ်ဒက်လဝ်ဟွံဗဗွဲကဵုသၞောဝ်တံ ဟွံမွဲကဵုသၞောဝ်ဓဝ်ဂှ်ကီု၊ ဟွံကဵုအခေါၚ်လွဳယဲ ကေုာံ ဍဵုဍိုက်ပျဲပျာံဒၟံၚ်တံ ကၠောန်သ္ပဒၟံၚ်ရောၚ် သ္ဂးလဝ်ရ။
အတိုၚ်လိက်ဒုၚ်စဳရေၚ်ဂှ်မ္ဂး မၞိဟ်ဒးဒုၚ်ဂစိုတ် အပ္ဍဲဍုၚ် ဟွံဗဗွဲကဵုသၞောဝ်ဂှ် ၁၈ တၠ၊ ဟွံဂွံပရေၚ်မၚ်မွဲလွဳလွတ်ယဲတံတုဲ ကောန်ထံၚ်ပရေၚ်ဍုၚ်ကွာန် ဒးချိုတ်အာလဝ်ဂှ် ၁၆ တၠ၊ ဒးဒုၚ်ဍဵုဍိုက်ပျဲပျာံဂှ် ၇၁၁ တၠ၊ ဒးဒုၚ်ပြံၚ်ထံၚ်ဂှ် ၈၈၃ တၠ ၊ ဒးဒုၚ်ကၟာတ်တိုက်ဂှ် ၂၁၈ တၠ ကေုာံ ကောန်ထံၚ်ဗြဴ သၠးလဝ်ဂဝ်တၟိတၟိဂှ် ၁၅ တၠ နွံရောၚ် ထ္မံက်ထ္ၜးလဝ်ရ။
တၚ်နၚ်တံဏံဝွံ ဒှ်စရၚ် နူကဵုဇာဇၞိက်ကောန်ထံၚ်အလုံဍုၚ်ဗၟာ ဆက်စၠောံကလိဂွံလဝ် နူကဵုထံၚ် ၃၆ ထံၚ်သၟးတုဲ ပ္ဍဲအကာဲအရာဗလးတိဏံဂှ် ပရေၚ်ဝးပ္ကဝ်အခေါၚ်အရာမၞိဟ်တံ သာဂၠိုၚ်မာန်ဏောၚ်ဂှ် ကဵုလဝ်သမ္တီရ။
ကောန်ထံၚ်ပရေၚ်ဍုၚ်ကွာန် ဒပ်ကံၚ်ဇြဳပၞာန် ရပ်ထိၚ်လဝ်တံဂှ်ဝွံ အခိၚ်စဒးဒုၚ်ရပ်ကီု၊ ပ္ဍဲဒၞါဲစၟဳတ်တံကီု ကေုာံ ပ္ဍဲကဵုထံၚ်စာတ်တံဂှ် ဒးဒုၚ်ဝးပ္ကဝ်ဒၟံၚ် အခေါၚ်အရာမၞိဟ် မသ္ကဵုဇီုကပိုက်ကဵုဂုဏ်သိက္ခာမၞိဟ်တံဂှ်ရောၚ် သ္ဂးလဝ်ရ။
ပ္ဍဲကဵုဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPP ဂှ် ကြဴနူဒပ်ပၞာန်သီအဝဵုတုဲ ကောန်ထံၚ်ပရေၚ်ဍုၚ်ကွာန် ဒးဒုၚ်ရပ်ထိၚ်လဝ်ဂှ် နွံဒၟံၚ် ဗ္ဒါဲ ၂၆၀၀၀ ယျဂှ် ထ္မံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−PPNM