မတ်မလီု၊ ဂျာန္နဝါရဳ ၂
သၞာံ ၂၀၂၄ ဏံ ညံၚ်သၞောတ်တၠအဝဵုပၞာန် ဂွံအိုတ်အးအာမာန် သွက်ဂွံပတုဲဒှ်ထောံ တၚ်ဒတူလိုၚ် တၚ်ဒုၚ်ဂိုၚ်ကေတ်ပရေၚ်ဍုၚ်ကွာန် မနွံပၟိက်ဒၟံၚ်ဍာံဍာံတံဂှ်ကဵု တၚ်တုပ်စိုတ်ဂမၠိုၚ် ညဳညဳသာသာအိုတ်ဂှ် ဗော်သွးကောန်ဂကူကရေၚ် KNU ဖ္တိုက်ဖ္အောဝ်လဝ်ရ။
ပ္ဍဲကဵုဂလာန်ပြၚ်တဲသွက်သၞာံတၟိ ဂကောံရပ်လွဟ်ကောန်ဍုၚ်အရၚ်ဝှ်ကြံၚ် KNU ဇရေၚ်ညးဍုၚ်ကွာန်တံဂှ် ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳ ဖ္တိုက်ဖ္အောဝ်လဝ် ဂကောံမရေၚ်တၠုၚ်ဒၟံၚ် ညံၚ်သၞောတ်တၠအဝဵုပၞာန် ဂွံသုန်ဂြာံအာတံဂှ်ရ။
“လ္ပာ်ပိုယ်တံ ဒးဟီုမ္ဂး အခါလုပ်ဒၟံၚ်ပေါဲဗ္တိုက်တ္ၚဲဏံ အခိၚ်ဗ္တိုက်ဒၟံၚ်သၞ နကဵုဇြဟတ်ပရေၚ်ပၞာန်ဂှ် ဟွံဒးဟီုဂး တၟေၚ်ၚ်တၟဟ်ဟ်ကီုလေဝ် အနာဂတ်ဂတဏံ ဂကောံဟွံတုပ်သၟဟ်ဂမၠိုၚ် ဂွံဖအိုတ်ကၠေံ သၞောတ်တၠအဝဵုပၞာန်ဏံ ညဳညဳသၟဟ်ဟ်မာန်ဂှ် ပ္ဍဲသၞာံ ၂၀၂၄ ဏံ လညာတ်လစွံစိုတ် ကေုာံ တၚ်ဒတူလိုၚ်ပရေၚ်ဍုၚ်ကွာန်၊ တၚ်ဒုၚ်ဂိုၚ်ကေတ်ပရေၚ်ဍုၚ်ကွာန် မနွံပၟိက်ဒၟံၚ်ဍာံဍာံတံဂှ် နွံပၟိက်ဒးကၠောန်အာ ညဳညဳသာသာအိုတ်ဏောၚ်ဟီုဂှ် မိက်ဂွံကဵုသမ္တီ ကုညးဍုၚ်ကွာန်တံရ“ သာ်ဝွံ ပဒိုဝ်သဝ်တဝ်နဳ ဟီုလဝ်ရ။
သ္အာၚ်နူဂှ်ပၠန် စပ်ကဵုပရေၚ်ပၞာန်တုဲ အခါကလိဂွံကၠုၚ် ပေါဲအံၚ်ဇၞးတံဂှ် ကိစ္စမဍံၚ်ပါဗက်ကၠုၚ် ကရောံပေါဲအံၚ်ဇၞးဂှ် ဒှ်ပရေၚ်အုပ်ဓုပ်တုဲ သွက်ဂွံအုပ်ဓုပ် ဍုၚ်ကွာန် ဗွဲမညိၚ်ဝတ်မာန်ဂှ် နကဵု KNU ပလေဝ်ပလေတ်လဝ် ချိုတ်တ်ပၠိုတ်တ်ရောၚ် ကဵုလဝ်သမ္တီရ။
ဒပ်ပၞာန် တိတ်နူပရေၚ်ဍုၚ်ကွာန်တုဲ ပြံၚ်လှာဲလွေဟ်ဒပ်ပၞာန်တုဲ ဒးမံၚ်သၟဝ်အုပ်ဓုပ် ညးဍုၚ်ကွာန်ကောန်အရာပ်ဂွံဒုၚ်ရုဲစှ်လဝ်တံဂှ်ဏောၚ် မဒှ်တၚ်ဒတူလိုၚ်ပရေၚ်ဍုၚ်ကွာန် KNU တၚ်မ္ဒးဒုၚ်တဲဂမၠိုၚ်တံ ပါလုပ်ဂှ် နကဵုပန်တၚ် KNU ကဵုလဝ်သတိ ကုကံၚ်ဇြဳပၞာန်ရ။
နဒဒှ်ဒုၚ်လျိုၚ် ပြဝဍောတ်ဇၞော် ဒပ်ပၞာန်မကလိလောန်လဝ်တံဂှ်တုဲ ဒးဒုၚ်အာတဲ ကုဓဝ်ဍာံအခိၚ်ကာလပြံၚ်လှာဲလွေဟ်တံဂှ်ဏောၚ်တုဲ ညးလဵုမွဲမှလေဝ် ပြဝမကလိလောန်လဝ်သာ်ဏံတံဂှ် ကဵုအခေါၚ်ဗၠးအာဟွံသေၚ်တုဲ တၚ်ဏံဂှ် ပၟိက်ဇၞော်တုဲ ဒးဒုၚ်တဲဏောၚ်ဂှ် ပဒိုဝ်သဝ်တဝ်နဳ ဟီုရ။
“နကဵုပိုယ်တံ အခေါၚ်ဂျိုၚ်တဴလမျီု မၞိဟ်ကလိလောန်လဝ်သာ်ဏံတံကဵု ကပေါတ်ကညောတ် မကေတ်ဏာလဝ် ဟွံမွဲကဵုသၞောတ်ဗ္ၜတ်တံဂှ် သွက်ဒတုဲဖဵုညးဍုၚ်ကွာန်တံတုဲ သာ်လဵုဂွံကောပ်ကာဲအာရောဟီုဂှ် လ္ပာ်ပိုယ်ဒးဆက်ကၠောန်အာတံ နွံဒၟံၚ်ဏောၚ်“ သာ်ဝွံ ညးသ္ဂးရ။
သ္အာၚ်နူဂှ်ပၠန် ယဝ်ရဒက်ပ္တန်ကၟိန်ဍုၚ်ပံၚ်ကောံဖေဝ်ဒရာတုဲဒှ်မ္ဂး သၞောဝ်သ္ဇိုၚ်ဒက်ပ္တန်တၟိဂှ် ဒးဓဇက်အာဏောၚ်တုဲ သွက်ဂွံချူခၞံသာ်ဏံမာန် နကဵုတၠအဝဵုပၞာန် ဒးဒုၚ်အာတဲဏောၚ်ဂှ် KNU ဟီုဂးလဝ်ရ။
ပ္ဍဲသၞာံ ၂၀၂၄ ဏံ ညံၚ်ဂကောံပၞာန် ဂွိုအ်ယာက္ဍိုပ်မာန်ကီု ပ္ဍဲပရေၚ်ပၞာန်တံဂှ် ညံၚ်ဂွိုအ်ကၠောန်ကၠုၚ်လ္တူနူကဵုဏံမာန်ဂှ် နကဵုဗွိုၚ်ဍုၚ်သ္အာၚ်တံ သွက်ဂွံကေတ်ကဵုအရေဝ် လ္တူဂကောံပၞာန်တံ သ္ကာတ်တ်မြဟ်ဟ် သာနူဏံဂှ်ကီု၊ ဍံၚ်ပါဗက်ကၠုၚ် ကရောံညးဍုၚ်ကွာန်တံတုဲ သွက်ဂွံဘိုၚ်ပူဗိုၚ်ရီုဗၚ်ကဵုဂှ် KNU ဖ္တိုက်ဖ္အောဝ်လဝ်ရ။
အပ္ဍဲကာလသီအဝဵုဏံ အပ္ဍဲတိဍာ်အုပ်ဓုပ် ဗော်သွးကောန်ဂကူကရေၚ် KNU ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပေါဲဗ္တိုက်ဂမၠိုၚ် က္တဵုဒှ်လဝ် စဵုကဵုမွဲဠက်ဝါပြၚ်တုဲ ညးဍုၚ်ကွာန်ပါဲဒဴဘဲပၞာန် စဵုကဵု ၈ ကိုဋ်ပြၚ် နွံကၠုၚ်ဂှ် ဂွံတီကေတ် အတိုၚ်တၚ်လလောၚ်တြး KNU ရ။
ကံၚ်ဇြဳကဵုကသပ်ပရေၚ်ညဳသၟဟ်ဂကူ NUCC ကေုာံ အလဵုအသဳညဳသၟဟ်ဂကူ NUG ဂှ် သၞာံ ၂၀၂၄ ဝွံ သွက်ညးဍုၚ်ကွာန်ဍုၚ်ဗၟာတံဂှ် ညံၚ်ဂွံဒှ်သၞာံ ကလိဂွံပေါဲအံၚ်ဇၞးမာန်ဂှ် ပ္တိတ်အာဇြဟတ် ဗွဲမသၟဟ်အစောံဏောၚ်ဂှ် ပ္ဍဲဂိတုဂျာန္နဝါရဳ ၁ တေံ ပံၚ်တောဲလလောၚ်တြးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−KNU