ပံၚ်၊ ဂျာန္နဝါရဳ ၂
တွဵုရးဍုၚ်မန်၊ ပွိုၚ်ဍုၚ်ပံၚ်၊ ပ္ဍဲကွာန် မတ္တမကျဲချာန် ပ္ဍဲဂိတုဒဳဇြေမ်ဗာ ၃၁ အခိၚ်ဗ္တံ ၜိုတ် ၆ နာဍဳဂှ် မၞိဟ်တြုံ ဖ္ဍိုက်နၚ် တၞးဘိၚ်မွဲတၠ ဒးဒုၚ်ရပ်ဒက်ပန်ဂစိုတ်ကဵု သေနာတ်တုဲ ချိုတ်အာလဝ်ဂှ် ဂွံတီကေတ် ဇရေၚ်ညးဒေသတံရ။
ပ္ဍဲသ္ကုတ်ဂၠံၚ် ပံၚ်−သဓီု ကွာန်မတ္တမကျဲချာန်ဂှ် ကွဳစက်ဟိုက်ဂျက် ကေုာံ ကွဳလိုန်ဓာတ်မွဲဖ္ဍိုက် မဖ္ဍိုက်ပ္တိုန်နၚ် တၞးဘိၚ်တံဂှ် ကောန်ဒပ်ဗၠာဲသၟိၚ် ကံၚ်ဇြဳပၞာန်တံ ဂ္စါန်ကၟာတ်လဒဵုရပ်ဒက်လဝ်ရ။
ဆ္ဂး ညးမဖ္ဍိုက်ပ္တိုန်နၚ်တၞးဘိၚ်တံဂှ် ဟွံဒေါအ်ကဵုကွဳစက်မွဲသာ် ဇီုဏာကောန်ဒပ်ဗၠာဲသၟိၚ်မွဲတၠတုဲ ဒဳဓရိပ်ဏာဂှ်ရ ဗက်ပန်ပှော်ရပ်ဒက်လဝ်ကဵု သေနာတ်တံရ။
ဟိုတ်နူဒးဒုၚ်ရပ်ဒက်ပန်ဂစိုတ်လဝ် ကဵုသေနာတ်တုဲ မၞိဟ်တြုံ ဒဳကၠုၚ်ကွဳလိုန်ဓာတ်မွဲတၠဂှ် ဒးအာမကမ်ပ္ဍဲသၟိပ် ကလိဂွံအာဝပ်တုဲ ချိုတ်အာလဝ် ပ္ဍဲကဵုဒၞါဲဂှ်ရ။
မၞိဟ်တြုံ ၂ တၠ ပါလုပ်သီုကဵုညးဒဳယာန်ဟိုက်ဂျက် မဖ္ဍိုက်နၚ် တၞးဘိၚ်ဂှ် ထောံကၠေံကွဳစက်တုဲ ဂြိပ်ဗၠးအာဂှ် ညးမစုက်လုက်ကဵု ကံၚ်ဇြဳပၞာန်တံ ဟီုရ။
အပ္ဍဲလၟေၚ်ဒဒှ်ဏံ ဂွံဆဵုကေတ်လဝ် တၞးဘိၚ်လ္တူကွဳစက်ဟိုက်ဂျက်ဂှ် ၁၃ ဓုပ်တုဲ မၞိဟ်တြုံမချိုတ်အာဂှ် ပလံၚ်ဗစိုပ်လဝ် ဇရေၚ်ရုၚ်ဂဥုဲပွိုၚ်တိုက်မတ္တမဂှ် ဂွံတီကေတ်ရ။
ပ္ဍဲပွိုၚ်ဍုၚ်ပံၚ်ဂှ် အပ္ဍဲကာလသီအဝဵုဏံ ၜိုန်ရပရေၚ်သွံရာန်ရပ်စပ် ဂဥုဲၜူမာဲ WY တံကဵု တၞးဘိၚ်တံ သၠုၚ်တိုန်ဒၟံၚ်ကီုလေဝ် ပွမကေတ်အရေဝ်ထ္မံက်ပ္တိတ်တံ စဵုကဵုဟွံမွဲ အောန်ဒၟံၚ်တုဲ ပ္ဍဲကဵုလၟေၚ်ဒဒှ်လ္ၚဵုတံဂှ်မ္ဂး အလဵုကောန်ဒပ်ဗၠာဲသၟိၚ်တံ ပါလုပ်ဆက်စပ်ဒၟံၚ်ဂှ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ