ၜဳကလေၚ်၊ ဂျာန္နဝါရဳ ၃
အပ္ဍဲပေါဲဗ္တိုက်သီဗ္ဒိုပ်ဝေန်တာပါန် ကံၚ်ဇြဳပၞာန် ဖျေံသ္ဇိုၚ်ကွာန်ဝေန်တာပါန်၊ ပွိုၚ်ဍုၚ်ၜဳကလေၚ်၊ တွဵုရးဍုၚ်မန် မက္တဵုဒှ်ဒၟံၚ် လလအ်ပွိုၚ်ၜါသတ္တာဟဂှ် ပရေၚ်ဇီုကပိုက်ချိုတ်ဂျိုၚ်ၜါလ္ပာ်တံ နွံဒၟံၚ်ရောၚ် ဂွံတီကေတ် အတိုၚ်ဂလာန် ဂကောံပံၚ်ကောံ ဂကောံဇြဟတ်ပၠန်ဂတးတံရ။
ဗ္ဒိုပ်ဝေန်တာပါန် ဒၞါဲကံၚ်ဇြဳပၞာန် ကေုာံ ဒပ်မၚ်ပယျဵု ဇြဟတ် ၆၀ ပြၚ် မဖျေံဒၟံၚ်ဒပ်ဂှ် စနူဂိတုဒဳဇြေမ်ဗာ ၁၃ တုဲကၠုၚ်တေံတုဲ ဂကောံဒပ်ပံၚ်ကောံ PDF ပါလုပ်သီုကဵုဒပ်ပၞာန်ဗၠးၜးကောန်ဂကူကရေၚ် KNLA တံ လုပ်ဒၟံၚ်ပေါဲဗ္တိုက်သီဗ္ဒိုပ်ရ။
အပ္ဍဲပေါဲဗ္တိုက်သီဗ္ဒိုပ်ဂှ် ကောန်ဂကောံဒပ်ပံၚ်ကောံ ဗ္ဒါဲ ၁၀ တၠ ဇီုကပိုက်ကလိဂွံလဝ်ဝပ်တုဲ လ္ပာ်ကံၚ်ဇြဳပၞာန်လေဝ် တဲဍိုန် ဟွံအောန်နူကဵု ၁၅ တၠ ဇီုကပိုက်ချိုတ်လဝ်ဂှ် ညးမၞုံတာလျိုၚ် ဂကောံဇြဟတ်ပၠန်ဂတးမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပေါဲဗ္တိုက်သီဗ္ဒိုပ် မသ္ကာတ်မြဟ်ဒၟံၚ်ဂှ် တုဲကၠုၚ်ပ္ဍဲဂိတုဒဳဇြေမ်ဗာ ၃၁ တေံ နူကဵုဒပ်ကံၚ်ဇြဳပၞာန် ဗ္တိုက်ဂြာတ်လဝ်မတိုဟ် နကဵုက္ၜၚ်ကျာ စဵုကဵု ၂ ဝါတုဲ ကဵုက္ၜၚ်ကျာသၞေၚ်ဝဲဂှ်လေဝ် ကၠုၚ်စိုပ်ပန်ပှော်လဝ်တံ နွံဒၟံၚ်ဂှ် ဂွံတီကေတ် ဇရေၚ်ဂကောံဒပ်ပၠန်ဂတးဗလးတိတံရ။
ဟိုတ်နူဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ ဗိုၚ်ကၟာတ်လဒဵုဗ္တိုက်လဝ် ဗ္ဒိုပ်ဝေန်တာပါန်ဂှ်တုဲ ဒပ်ကံၚ်ဇြဳပၞာန်တံ ပစူလဝ်အလာံဗုနွံဒၟံၚ်ကီုလေဝ် အခိၚ်ဂကောံဒပ်ပံၚ်ကောံတံ တိုန်အာဂှ် ကလေၚ်ပန်ပှော်လဝ်ရောၚ် သ္ဂးရ။
ဒပ်ကံၚ်ဇြဳပၞာန် မ္ဒးဒုၚ်ဗိုၚ်ကၟာတ်လဒဵုလဝ်ဂှ်ဝွံ ပန်ပှော်ဒၟံၚ်လွဟ်ဇၞော် သီုဗ္တံ၊ သီုတ္ၚဲတုဲ ဟိုတ်နူပရေၚ်ဗ္တိုက်ဒပ်ကံၚ်ဇြဳပၞာန် နကဵုလွဟ်ဇၞော် ကေုာံ ကဵုက္ၜၚ်ကျာတံဂှ်တုဲ ညးဍုၚ်ကွာန်ကောန်အရာပ် ဂၠိုၚ်ကဵုလ္ၚီ ဒးပါဲဒဴဒၟံၚ်ပၞာန်ရ။
ညးဍုၚ်ကွာန်ပါဲဒဴဘဲပၞာန်တံဝွံ တ္ၚဲဒးပါဲဒဴဘဲပၞာန်ဂၠိၚ်သ္ၚောဲကၠုၚ်ဗက် ဇွောံမစၞစသ္ဇိုၚ်၊ ဂဥုဲဇဗ၊ ယာတ်လ္တက်၊ ကၞဴ ကေုာံ ပဠောံၜိုဟ်တံဒှ်တမ် အရီုဗၚ်စပ်ကဵုပရေၚ်ဗ္စာရဏာမၞိဟ်တံ နွံပၟိက်ဂၠိုၚ်ကၠုၚ်ဂှ် ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်တံ ဟီုရ။
စပ်ကဵုပေါဲဗ္တိုက်ဗ္ဒိုပ်ဝေန်တာပါန်ဂှ်တုဲ မ္ၚးနူဗော်သွးကောန်ဂကူကရေၚ် KNU ၊ ဂကောံဒပ်စဵုဒၞါညးဍုၚ်ကွာန် PDF ဂှ် ကံၚ်ဇြဳပၞာန်တံလေဝ် လလောၚ်ပ္တိတ်လဝ်မွဲမွဲ ဟွံမွဲဏီရ။
ပရိုၚ်−သြၚ်လောန်တိုၚ်(မ်)
ဗီု−KNU