ကျာ်မြဟ်၊ ဂျာန္နဝါရဳ ၃
တွဵုရးဍုၚ်မန်၊ ပွိုၚ်ဍုၚ်ကျာ်မြဟ်၊ ဗ္ဒါဲကွာန်ကအ်ပၞဟ် ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ ရပ်ဂွံလဝ် ၂ တၠ ပါလုပ်သီုကဵုဒုသ္ကိုပ်ဗၠာဲသၟိၚ် CID မဇက်လဝ်ကွဳစက်ဟွံမွဲကဵုလာၚ်ဇြေန်တံဂှ် ဂၠိုက်ဂၠါဲဂွံတီကေတ် နူကဵုညးမစုက်လုက်ကဵု ဂကောံဒပ်ဗၠာဲသၟိၚ်တံရ။
ပ္ဍဲဂိတုဒဳဇြေမ်ဗာ ၃၀ တေံ ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ အခိၚ်ကၟာတ်လဒဵုစၟဳတ်ဒၟံၚ် ဒုသ္ကိုပ်ဗၠာဲသၟိၚ် ဂကောံဒပ်ဗၠာဲသၟိၚ်အမှုရာဇဝတ်အၚ်စိၚ် CID ညုၚ်ဆာန်ကဵု အ္စာပလေဝ်ကွဳစက် ၂ တၠတံတုဲ ဒးဒုၚ်ရပ်ဒက်လဝ်ရ။
အတိုၚ်ဂလာန် ညးမစုက်လုက်ကဵု ဂကောံဒပ်ဗၠာဲသၟိၚ်တံဂှ်မ္ဂး ဒုသ္ကိုပ်ဗၠာဲသၟိၚ် CID ညုၚ်ဆာန်ဝွံ အာကေတ်လဝ် ကွဳစက်လာၚ်ဇြေန်ဟွံမွဲ ပ္ဍဲဗြဝတဳတုဲ ဂၠံၚ်စဴဂှ် အခိၚ်စၟဳတ်ရပ်ဒက်ဒၟံၚ်ဂှ် ဒဒှ်ရဒှ်ကောန်ဒပ်ဗၠာဲသၟိၚ် ဂွံဆဵုကေတ်သက်သဳတံဂှ်တုဲ ဒးဒုၚ်ရပ်ဒက်လဝ်ရောၚ် ဂွံတီကေတ်ရ။
ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံဂှ် ဒဵုကဵုအခိၚ်လၟုဟ် စပ်ကဵုပရေၚ်ရပ်ဒက်ပရေၚ်ၜိုဟ်လလမ် ဒုသ္ကိုပ်ဗၠာဲသၟိၚ် CID ဂှ်တုဲ လလောၚ်ပ္တိတ်လဝ်မွဲမွဲ ဟွံမွဲဏီကီုလေဝ် ဒဒှ်ရရပ်ဒက်လဝ်ဍာံပြဂှ် သ္ပဒတန် ကုသြန်လောန်တိုၚ်(မ်) ရ။
ဒုသ္ကိုပ်ဗၠာဲသၟိၚ်ညုၚ်ဆာန်ဝွံ ကၠာတေံ ဒှ်မၞိဟ်ကေၚ်ဒးလဝ်တာလျိုၚ် ပ္ဍဲဗၠာဲသၟိၚ်ၝောံဍုၚ်မုဟ်ဍုၚ်မွဲတၠတုဲ အခိၚ်လၟုဟ် စှ်ေဒၟံၚ်တာလျိုၚ် ပ္ဍဲကဵု CID အၚ်စိၚ်တုဲ ဒှ်မၞိဟ်လေပ်ကၠောန်တဴ ကမၠောန်ကေတ်ဏာနၚ်ကွဳစက်ဟွံမွဲကဵုလာၚ်ဇြေန်တံဂှ် ဂွံတီကေတ်ရ။
ပ္ဍဲကဵုထလဳဂရာမ်ရဲထံက်ဂလာန်ဒပ်ပၞာန်တံဂှ် ဒုသ္ကိုပ်ဗၠာဲသၟိၚ် CID ညုၚ်ဆာန်ဝွံ အခိၚ်စဴကၠုၚ် ဇရေၚ်သမ္ဘာညး အ္စာၝောံဗ္တောန်လိက် မစှ်ေဒၟံၚ်တာလျိုၚ် ပ္ဍဲကျာ်မြဟ်ဂှ် ဒးဒုၚ်ရပ်လဝ် ကု PDF တံရောၚ် ချူပ္တိုန်ထ္မံက်ထ္ၜးဒၟံၚ်အိုတ်ရ။
အပ္ဍဲကာလသီအဝဵုဏံ နူကဵုပယျဵုသေံ−ဗၟာ ဗြဝတဳဂှ်မွဲကဆံၚ် ပ္ဍဲအရာပလံၚ်ဗစိုပ် ကွဳစက် ကေုာံ ကွဳလိုန်ဓာတ် လာၚ်ဇြေန်ဟွံမွဲတံ ပ္ဍဲတွဵုရးဍုၚ်မန် သီုကဵုရးဒေသ ကေုာံ တွဵုရးတၞဟ်ဟ်တံဂှ် သၞာဲဒဴဒပ်ကံၚ်ဇြဳပၞာန်တံလေဝ် ပါလုပ်ဆက်စပ်ဒၟံၚ်တံ နွံဒၟံၚ်ဂှ် ဂၠိုက်ဂၠါဲဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media