ဘာပန်၊ ဂျာန္နဝါရဳ ၆
ပ္ဍဲကဵုခရိုၚ်ဘာပန် ဗော်သွးကောန်ဂကူကရေၚ် KNU ဂှ် ပ္ဍဲပေါဲဗ္တိုက် မက္တဵုဒှ်လဝ် အကြာဒပ်မဟာ ၅ KNLA ကဵု ဒပ်ကံၚ်ဇြဳပၞာန်တံ အပ္ဍဲပွိုၚ်မွဲသၞာံဂှ် လ္ပာ်ကံၚ်ဇြဳပၞာန် သ္ကိုပ်တမ်ဒပ်၊ သ္ကိုပ်ဒပ်စြေက်၊ ဒုသ္ကိုပ်ဒပ်စြေက်တံပါလုပ်ဂှ် ၈၀၀ ပြၚ် ချိုတ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြးပရိုၚ် ဒပ်မဟာ ၅ ရ။
ပ္ဍဲခရိုၚ်ဘာပန် KNU ဂှ် နူကဵုဂိတုဂျာန္နဝါရဳ ၁ သၞာံ ၂၀၂၃ စဵုကဵုဂိတုဒဳဇြေမ်ဗာ ၃၁ အပ္ဍဲပွိုၚ်မွဲသၞာံ အကြာဒပ်ကံၚ်ဇြဳပၞာန်ကဵု ဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA ဂှ် က္တဵုဒှ်လဝ်ပေါဲဗ္တိုက် ၁၈၇၅ ဝါတုဲ လ္ပာ်ကံၚ်ဇြဳပၞာန် ၈၆၉ တၠ ချိုတ်တုဲ ၆၀၉ တၠ ဇီုကပိုက်ကလိဂွံလဝ်ဝပ်ဂှ် ပါလုပ် ပ္ဍဲတၚ်လလောၚ်တြးဂှ်ရ။
လ္ပာ်ဒပ်ကံၚ်ဇြဳပၞာန် ပ္ဍဲကဵုညးမချိုတ်အာတံဂှ် သ္ကိုပ်တမ်ဒပ်မွဲတၠ၊ သ္ကိုပ်ဒပ်စြေက် ၃ တၠ၊ ဒုသ္ကိုပ်ဒပ်စြေက် ၃ တၠ၊ အကြာပ်ဒပ်ဇၞော် ၅ တၠ၊ အကြာပ်ဒပ် ၃ တၠ ပါလုပ်တုဲ ပ္ဍဲကဵုစရၚ်ကလိဂွံဝပ်ဇီုကပိုက်တံဂှ် သ္ကိုပ်ဒပ်စြေက် ၃ တၠ၊ ဗိုလ်မွဲတၠ၊ အကြာပ်ဒပ်ဇၞော် ၂ တၠ ကေုာံ ဒုအကြာပ်ဒပ်မွဲတၠ ပါလုပ်လဝ်ဂှ် ဒပ်မဟာ ၅ လလောၚ်ပ္တိတ်ကဵုလဝ်သမ္တီရ။
သ္အာၚ်နူဂှ်ပၠန် ပလီုဂွံလဝ် စမြိုၚ်ဗ္ဒိုပ်ပၞာန် ဒပ်ကံၚ်ဇြဳပၞာန် ၃၁ မတုဲ ယာန်ကွဳစက်ပၞာန် ၁၃ မဂှ်လေဝ် စံၚ်ပလီုပလာ်မာန်လဝ်တုဲ ဂစိုတ်ထောံလဝ် ချေံတၟက် ၁၁၄ တုဲ ရပ်ဂွံ ၆ ဂျိုၚ်ၚ်ဂှ် လလောၚ်ပ္တိတ်လဝ်ရ။
အပ္ဍဲပွိုၚ်မွဲသၞာံ ဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA ဗ္တိုက်သီဂွံလဝ် ဗ္ဒိုပ်ဒပ်အဓိက ဒပ်ကံၚ်ဇြဳပၞာန်တံ အလုံမွဲတုဲ ဒပ်ကံၚ်ဇြဳပၞာန် ထောံလသာဗ္ဒိုပ် ၂ ဗ္ဒိုပ်တုဲ ဂြိပ်တိတ်အာလဝ်ဂှ် ဂွံတီကေတ် အတိုၚ်တၚ်လလောၚ်တြးရ။
လ္ပာ်ဒပ်မဟာ ၅ KNLA ဂှ် ၄၅ တၠ ပြဟ်လလုဲလဝ်တုဲ ၁၈၃ တၠ ကလိဂွံလဝ်ဝပ်တုဲ ကောန်ဒပ်ကံၚ်ဇြဳပၞာန် ၃၀ တၠ ဖျေံလွဟ်လုပ်စိုပ်ကၠုၚ်ဂှ် ဒပ်မဟာ ၅ သ္ဂးလဝ်ရ။
ဒပ်ကံၚ်ဇြဳပၞာန်ဝွံ နူကဵုက္ၜၚ်ကျာဂှ်လေဝ် ပန်ပှော်ဗ္တိုက်ဒၟံၚ် ဟွံပိုတ်သ္ကုတ်တုဲ အပ္ဍဲပွိုၚ်မွဲသၞာံ ပ္ဍဲခရိုၚ်ဘာပန်ဂှ် ညးဍုၚ်ကွာန်ကောန်အရာပ် ၃၀ တၠ ချိုတ်တုဲ ၄၇ တၠ ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ် ကေုာံ စမြိုၚ် ဂၠိုၚ်ကဵုကၠံ လီုလာ်အာလဝ်ရ။
သ္အာၚ်နူဂှ်ပၠန် သြန်လှုဲ၊ ဖုၚ် ညးဍုၚ်ကွာန်ဒေသတံပိုၚ်ဂှ်လေဝ် ဒပ်ကံၚ်ဇြဳပၞာန် ပၠံၚ်ၜးကေတ်ဏာလဝ်ဂှ် ဂွံတီကေတ် နူကဵုတၚ်လလောၚ်တြးဂှ်ရ။
ပရိုၚ်−သြၚ်လောန်တိုၚ်(မ်)
ဗီု−KNU