ကျာ်ထဝ်၊ ဂျာန္နဝါရဳ ၆
အပ္ဍဲပရေၚ်ပန်ပှော် မက္တဵုဒှ်လဝ် ဗ္ဒါဲကွာန်မုခ်ပြေၚ် (မုပ္ပလၚ်) ပွိုၚ်ဍုၚ်ကျာ်ထဝ်၊ တွဵုရးဍုၚ်မန်ဂှ် ညးဍုၚ်ကွာန်ကောန်အရာပ် ညးဗြဴမွဲတၠ ကေုာံ ရဲကဵုပရိုၚ်ကံၚ်ဇြဳပၞာန်မွဲတၠ ချိုတ်အာလဝ်ဂှ် ဂွံတီကေတ် အတိုၚ်ဂလာန်ညးဒေသတံရ။
ဂိတုဂျာန္နဝါရဳ ၄ အခိၚ်လဒေါဝ်တ္ၚဲ ၜိုတ် ၁၂ နာဍဳဂှ် ရဲကဵုပရိုၚ်ကံၚ်ဇြဳပၞာန် ဥူညဳညဳလွေန် ကၠုၚ်ရာန်ဇဗၠုသွတ် ပ္ဍဲဗ္ဒါဲဖျာမုခ်ပြေၚ်ဂှ် မၞိဟ်တြုံဟွံတီယၟုၜါတၠ ကၠုၚ်ကဵုကွဳလိုန်ဓာတ်တုဲ ပန်ဏာလဝ် ကဵုသေနာတ်ရ။
အပ္ဍဲပရေၚ်ပန်ပှော်ဏံ ဥူညဳညဳလွေန် ကလိဂွံလဝ်ဝပ်သေနာတ် ၃ လစုတ်တုဲ အခိၚ်စိုပ်ရုၚ်ဂဥုဲ ဒးချိုတ်အာလဝ်တုဲ ဒဝ်နှေန်ယဳထိုဲ အခိၚ်ဒှ်ပရူ နွံဒၟံၚ်ဗ္ဒါဲဖျာဂှ်လေဝ် မကမ်ကၠိုဟ်လုပ်အာ ပၠက်ကဴလ္ပာ်ပါ် ကလိဂွံလဝ်ဝပ်တုဲ ချိုတ်အာလဝ် ပ္ဍဲကဵုဒၞါဲဂှ်ရ။
ညးဒေသတံဂှ် အပ္ဍဲပရေၚ်ပန်ပှော် ဥူညဳညဳလွေန်ဂှ် ဟိုတ်နူညးဗြဴ ဟွံဆက်စပ်ကဵုပရူဂှ် ဒးချိုတ်အာလဝ်ဂှ်တုဲ အောန်ဒၟံၚ်စိုတ်အိုတ်တုဲ သွက်လၟေၚ်ဒဒှ်ဏံ ပရေၚ်ကေတ်လျိုၚ်၊ ဒုၚ်လျိုၚ်တံ ဒးနွံဏောၚ် ဟီုဂးဒၟံၚ်တံလေဝ် နွံဒၟံၚ်ရ။
စပ်ကဵုပရေၚ်ပန်ပှော် ရဲကဵုပရိုၚ်ကံၚ်ဇြဳပၞာန် ဥူညဳညဳလွေန်ဂှ်တုဲ ဂကောံဒပ်ရပ်လွဟ် ဖျေံသ္ဇိုၚ်ကျာ်ထဝ်တံ လလောၚ်ပ္တိတ်လဝ်မွဲမွဲဂှ် ဟွံဂွံဆဵုကေတ်ဏီရ။
ဂကောံဇြဟတ်ပၠန်ဂတးကျာ်ထဝ် KRF ဂှ် ပရေၚ်ပန်ပှော်ဏံဂှ် ဂကောံညးတံ ကၠောန်သ္ပလဝ်ဟွံသေၚ်ဂှ်ကီု သွက်လၟေၚ်ဒဒှ်ပရေၚ်ပန်ပှော်ဏံဂှ် ဂၠိုက်ဂၠါဲဒၟံၚ်ဖိုဟ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဒဳဇြေမ်ဗာ ၃၀ တေံဂှ်လေဝ် ဥူတာန်လွေန် ညးဒုၚ်ကာ ဌာနက္ဍိုက်ပ်အကံက်ခေါန် ဒၟံၚ်ကွာန်မယာန်ချံၚ် ပွိုၚ်ဍုၚ်ကျာ်ထဝ်ဂှ်ကဵု သမ္ဘာညး ဒဝ်မျေတ်တ်ခိုၚ်တံၜါတၠ ဒးဒုၚ်ပန်လဝ် ကဵုသေနာတ်ဂှ် ဂွံတီကေတ် ဇရေၚ်ညးဒေသတံရ။
ပ္ဍဲပွိုၚ်ဍုၚ်ကျာ်ထဝ်ဂှ် အပ္ဍဲကာလသီအဝဵုဏံ ကောန်ဂကောံဒပ်ကံၚ်ဇြဳပၞာန်တံ၊ ဂကောံဒပ်ဗၠာဲသၟိၚ်တံ၊ ရဲကဵုပရိုၚ်ဂမၠိုၚ် ကေုာံ သ္ကိုပ်အုပ်ဓုပ်ကွာန်တံ ဒးဒုၚ်ပန်ဂစိုတ်ဒၟံၚ် မွဲဏှမွဲဏှ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−SBM