မတ်မလီု၊ ဂျာန္နဝါရဳ ၅
ပၞာန်ထ္ပက်ဂကောံဇြဟတ်ပၠန်ဂတး အလုံဍုၚ်တံဂှ်ဝွံ ဗ္တိုက်ဒၟံၚ်အပ္ဍဲအကြာဂြိုပ်သၟးဟွံသေၚ်ရတုဲ ဗွိုၚ်ပေါဲဗ္တိုက်ဂှ် သၠဲလးကၠုၚ် စဵုကဵုလ္တူဍုၚ်တံရဂှ် က္ဍိုပ်သ္ကိုပ်ပၞာန် ဒုၚ်ဝန်ဟီုဂးလဝ်ရ။
ပ္ဍဲကဵုအခန်ကၞာ ဒပ်ကံၚ်ဇြဳပၞာန် ပအပ်ပြာပ်ကဵုတဆိပ်ကြာဂုဏ်တၟေၚ် စပ်ကဵုအစောံသတ္တိ နဒဒှ်စၟတ်သမ္တီ တ္ၚဲဗၠးၜး မရနုက်ကဵု ၇၆ ဝါဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ကဵုလဝ်သတိ ကုဂကောံဒပ်ညးရ။
က္ဍိုပ်သ္ကိုပ်ပၞာန်ဂှ် ပေါဲဗ္တိုက် က္တဵုဒှ်ဒၟံၚ်လၟုဟ်ဝွံ ဗ္တိုက်ဒၟံၚ်အပ္ဍဲအကြာဂြိုပ်တေံသၟးဟွံသေၚ်ရတုဲ ဗ္တိုက်ကၠုၚ်ဒၟံၚ် စဵုကဵုလ္တူဍုၚ်တံဂှ် ဂွံဆဵုကေတ်ဒၟံၚ်ဂှ်ရ တိဍာ်မုက်ပၞာန်တံ သာသၠဲလးကၠုၚ်ဂှ် ဟီုရ။
အကာဲအရာသာ်ဏံဂှ် ဒုၚ်ဂိုၚ်ကေတ် ဓဝ်ပတှ်ေ “ၜိုန်မၞိဟ်ချိုတ် ယၟုဟွံချိုတ်” ဂှ်တုဲ မၞိဟ်လုပ်လဝ်ပေါဲဗ္တိုက် နကဵုစိုတ်ဓာတ်ပသဲဍာၚ်တံဂှ်ဝွံ ဒှ်ကောန်သ္ဂံၚ်အာဇာနဲဍာံစၟတ်တံရောၚ်ဂှ် သ္ဂးလဝ်ရ။
သ္အာၚ်နူဂှ်ပၠန် ကောန်ဇာတ်ဂြောဝ်ဂတာ သ္ဂံၚ်ဗြဴ မဒှ်ဇြဟတ်အရန် ဒပ်ပၞာန်အဓိကဂှ်ဝွံ ပၟိက်ဒှ်မ္ဂး ဟိုတ်နူဒှ်ရဲမၚ်မွဲ ဂုဏ်သိက္ခာဒပ်ပၞာန် ကေုာံ ဂုဏ်သိက္ခာဂြောဝ်ဂတာတံ နကဵုဇၟူခိုဟ်ဟ်တံဂှ်တုဲ သွက်ဂွံဆက်ထိၚ်အာ စိုတ်ဓာတ်ဆာန်ဂကူမဍာံပြဂှ် က္ဍိုပ်သ္ကိုပ်ပၞာန် ဗ္တိုက်ဖ္အောဝ်လဝ်ရ။
ဒပ်ပၞာန်ဗၟာဝွံ အပ္ဍဲကာလဒပ်ပၞာန်သီအဝဵု ကြပ်ပေၚ်ပိသၞာံဏံ ဟိုတ်နူပရေၚ်ဗ္တိုက်တဝ်စၞေဟ် ဂကောံဇြဟတ်ပၠန်ဂတးတံတုဲ ဒးဆောံလေၚ်လဝ် ဍုၚ် ၂၀ ဟွံကတုဲ ဗ္ဒိုပ်ဒပ်ဍောတ်ဇၞော် ၅၀၀ ပြၚ် ဒးဒုၚ်သီလဝ်ရ။
ပ္ဍဲဂိတုဂျာန္နဝါရဳ ၄ တေံဂှ်လေဝ် ဌာန်ဂအုပ်ပၞာန်ကောပ်ကာဲဒေသ − လံက်ကိုၚ် ( ဒကစ) မဒှ်ဌာန်ဂအုပ်ပၞာန်ဒပ်ကံၚ်ဇြဳပၞာန် ဇၞော်အိုတ် မဗပေၚ်လဝ်ဇြဟတ် ကေုာံ လွဟ်ဇၞော် သွက်ပၞာန်ဒုၚ် ဗွဲမဂၠိုၚ်ဂၠေၚ်ဂှ်ဝွံ ဖျေံလွဟ် ဇရေၚ်ဂကောံကဝ်က MNDAA တုဲ ကလေၚ်ဆုတ်အာလဝ် လ္ပာ်လာယှိုဝ်ဂှ် ဂွံတီကေတ် အတိုၚ်ပရိုၚ်အပ္ဍဲဒေသတံရ။
တုဲကၠုၚ် ပ္ဍဲဂိတုဂျာန္နဝါရဳ ၃ တေံဂှ်လေဝ် ပ္ဍဲကဵုပေါဲဗ္တိုက်ကွာန်(သံဘို) ပွိုၚ်ဍုၚ်နံၚ်ချိုဝ်၊ တွဵုရးသေံဂှ် ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ ရပ်ဂွံလဝ် ဒုသ္ကိုပ်ဗိုလ်ဇၞော် သ္ကိုပ်ကရောၚ်ပၞာန် ဒပ်ကံၚ်ဇြဳပၞာန် တိတ်အံၚ် (သက်အောၚ်) ဂျိုၚ်ၚ်ရ။
ပရိုၚ်−သြၚ်လောန်တိုၚ်(မ်)
ဗီု−MOI