ယှိုဲကျေန်၊ ဂျာန္နဝါရဳ ၇
ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် အပ္ဍဲပွိုၚ်ဍုၚ်ယှိုဲကျေန် တိဍာ်အုပ်ဓုပ် ဒပ်မဟာ (၃) ဗော်သွးကောန်ဂကူကရေၚ် KNU တံဂှ်တုဲ သီုကဵုကောန်ၚာ်တံပါလုပ်ဂှ် ကောန်အရာပ် ၄ တၠ ချိုတ်အာလဝ်တုဲ ၁၆ တၠ ကလိဂွံလဝ်ဝပ်ဂှ် KNU ဗဟဵု လလောၚ်ပ္တိတ်လဝ်ရ။
တုဲကၠုၚ် ပ္ဍဲဂိတုဂျာန္နဝါရဳ ၅ အခိၚ်နူဂယးတေံ နူကဵုဒပ်ကံၚ်ဇြဳပၞာန် ခမရ (၂၀) ဖျေံသ္ဇိုၚ်ညံၚ်လေဝ်ပေန် ကေုာံ ခလရ (၂၆၄) ဖျေံသ္ဇိုၚ်(ပိန်းဇလုပ်) တံဂှ် ပေါဲဗ္တိုက်ဟွံမွဲမွဲသာ် ပန်ပှော်စုတ်လဝ် လွဟ်ဇၞော် အပ္ဍဲကွာန်ယျေဖျူကာန် ကေုာံ ကွာန်(ကောက်မယ့်သူ) ပွိုၚ်ဍုၚ်ယှိုဲကျေန်ဂှ် ဟွံအောန်နူကဵု ၁၀ လစုတ်ရ။
မကမ်လွဟ်ဇၞော် ဒပ်ကံၚ်ဇြဳပၞာန် မပန်ပှော်လဝ်လက္ကရဴအိုတ်ဂှ်ဝွံ ဟိုတ်နူဒတုံဗ္တိုဟ်ထ္ကးအာလဝ် လ္တူသ္ၚိကမ္မဌာန် ကွာန်ယျေဖျူကာန်ဂှ်တုဲ ကောန်ၚာ်အာယုက် ၁၄ သၞာံမွဲတၠပါလုပ်ဂှ် ကောန်အရာပ် ၄ တၠ ဇီုကပိုက်ချိုတ်အာလဝ်ရ။
သ္အာၚ်နူဂှ်ပၠန် ကောန်ၚာ်အာယုက် ၅ သၞာံမွဲတၠပါလုပ်ဂှ် ညးဍုၚ်ကွာန်ကောန်အရာပ် ၁၆ တၠလေဝ် ဒးမကမ်လွဟ်ဇၞော် ကလိဂွံလဝ်ဝပ်နာနာဂှ် ဂွံတီကေတ် အတိုၚ်တၚ်လလောၚ်တြး KNU ရ။
ပ္ဍဲကဵုတ္ၚဲဂှ် အခိၚ်ဇိုၚ်သဝ်တ္ၚဲဂှ်လေဝ် ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်(ပုဇွန်မြောၚ်း) ပွိုၚ်ဍုၚ်ယှိုဲကျေန်ဂှ်ဝွံ ပန်ပှော်စုတ်လဝ် မဗုမ် ၆ မ နကဵုဒရုၚ် ပ္ဍဲကွာန်ညံၚ်ပေန်ကျဳတြေံဂှ် KNU သ္ဂးရ။
အတိုၚ်ဂလာန် ညးဒေသယှိုဲကျေန်တံဂှ်မ္ဂး ဒပ်ကံၚ်ဇြဳပၞာန်ဝွံ စနူသၞာံဏံမံက်တုဲ ကၠောန်သ္ပပန်ပှော်ဗ္တိုက်ကၠုၚ်လွဟ်ဇၞော် အပ္ဍဲကွာန် ဒၞါဲညးဍုၚ်ကွာန်ကောန်အရာပ်တံမံၚ်တံ ဂၠိုၚ်ကၠုၚ်ဂှ် ဂွံတီကေတ်ရ။
ပ္ဍဲကဵုတိဍာ်အုပ်ဓုပ် KNU ဂှ် ပါဲနူကဵုပေါဲဗ္တိုက် အပ္ဍဲအခိၚ်သီအဝဵုဏံဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံတုဲ ညးဍုၚ်ကွာန် ၈ ကိုဋ်ပြၚ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ဂှ် ဂွံတီကေတ် အတိုၚ်တၚ်လလောၚ်တြး KNU ရ။
ပရိုၚ်−သြၚ်လောန်တိုၚ်(မ်)
ဗီု−KNU