မတ်မလီု၊ ဂျာန္နဝါရဳ ၇
ဒပ်ကံၚ်ဇြဳပၞာန်သီအဝဵု ဗွဲကြဴဏံ စၞးဒးပံက်ဂဗုတ်ကေတ်အရေဝ် ကုညးဍုၚ်ကွာန်ဒေသ ကေုာံ ညးချဳဒရာၚ်ကတိုၚ်ကၟဟ်ပရေၚ်ဒဳမဝ်ကရေဇြဳ မဒးဒုၚ်ရပ်လဝ်တံ နကဵုၝောံပိုဒ်ပရေၚ်ဍုၚ်ကွာန်ဂှ် ရပ်စပ်ကၠုၚ် ၝောံပိုဒ်ပကီုပရာပ် ဒးဒုၚ်ထံၚ်သၞာံဂၠိၚ်မာန်တံ ဂၠိုၚ်ကၠုၚ်ဂှ် ညးမရေၚ်တၠုၚ်ရီုဗၚ်ကဵု ကေၚ်ကာကောန်ထံၚ်ပရေၚ်ဍုၚ်ကွာန်တံ ဟီုရ။
ဟိုတ်နူပရေၚ်ဗ္တိုက်ပၞာန်ထ္ပက် ဂကောံဇြဟတ်ပၠန်ဂတး အလုံဍုၚ်တံတုဲ မ္ၚးနူကဵုဇြဟတ်ဒပ်လေၚ်ဒိုက်တံဂှ် ကံၚ်ဇြဳပၞာန် ဒးဆေၚ်ဒၟံၚ်မုက်ကျဟောံဗြံ သီုကဵုဆုတ်ယုတ်လီုလာ်စှ်ေကၠုၚ်ဒၟံၚ် ဒိုဟ်ဇဳဂှ်ဝွံ ဗွဲကြဴဏံ စောဲကၠုၚ်ဂဗုတ် နကဵုၝောံပိုဒ် ၅၀၅ (က) သၞောဝ်ရာဇသာတ်ဇၞော် မၞိဟ်တီဂၠိုၚ် ၝောံပိုဒ်ပရေၚ်ဍုၚ်ကွာန်ဂှ် စဵုကဵုဟွံမွဲ အောန်ကၠုၚ်ရ။
အတိုၚ်တၚ်နၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP တံ မပကောံပ္ကေဝ်ဂွံလဝ်ဂှ်မ္ဂး တုဲကၠုၚ်နူဂိတုဂျူလာၚ် စဵုကဵုဂိတုဒဳဇြေမ်ဗာ အပ္ဍဲပွိုၚ် ၆ ဂိတုဂှ် အလုံမွဲကၟိန်ဍုၚ် ညးချဳဒရာၚ်ကတိုၚ်ကၟဟ်ပရေၚ်ဒဳမဝ်ကရေဇြဳတံပါလုပ်ဂှ် ညးဍုၚ်ကွာန်ဟွံအောန်နူကဵု ၆၀၀ ဒးဒုၚ်ရပ်လဝ်ရ။
ပ္ဍဲကဵုညးဒးဒုၚ်ရပ်ဂမၠိုၚ် မၞိဟ်ဒးဒုၚ်စောဲဂဗုတ် နကဵုၝောံပိုဒ်ဗ္တိုက်သရိုဟ်ပကီုပရာပ် ၝောံပိုဒ် ၅၀ (ည) ကီု သီု ၅၂ (က) တံဂှ် နွံကၠုၚ်လဝ် ဗ္ဒါဲ ၉၀ တၟံကၠံတုဲ ၝောံပိုဒ် ၅၀၅ (က) ဂှ် ၜိုတ် ၁၀ တၟံကၠံရဟေၚ် နွံလဝ်ရ။
ကံၚ်ဇြဳပၞာန် စောဲကၠုၚ်ဂဗုတ်သာ်ဏံဂှ်ဝွံ တၞဟ်နသ္ဂောံပလန်တဲ ကုညးဍုၚ်ကွာန်မဒစဵုဒစးပၠန်ဂတးဒၟံၚ်တံတုဲ စၞးၝောံပိုဒ် ၅၀၅(က) ဂှ် သုၚ်စောဲကၠုၚ် ၝောံပိုဒ်ပကီုပရာပ်တံဂၠိုၚ်ကၠုၚ်ဂှ် စၟဳတ်ဂွံဆဵုကေတ်ဂှ် ညးတာလျိုၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကၠာတေံတှ်ေ ရပ်စပ်ကၠုၚ် နကဵုၝောံပိုဒ် ၅၀၅ ဂှ်ဂၠိုၚ်ဒၟံၚ်။ ဗွဲကြဴဏံ ရပ်ဒက်ကၠုၚ် နကဵု ၅၀၅ ဂှ် အောန်စှ်ေကၠုၚ်တုဲ ရပ်ကၠုၚ် နကဵုၝောံပိုဒ်ပကီုပရာပ်တံ။ ဟိုတ်ဍေံဂှ်တှ်ေ သောၚ်ၚ်ရဏောၚ်။ ဂကောံပၞာန်ဂှ် ကၠောန်ဒၟံၚ် နကဵုဗီုပြၚ် သ္ဂောံပၠန်တဲ ကုရဲပၠန်ဂတးဒစဵုဒစးဒၟံၚ်ကုဍေံတံဂှ်ဏောၚ်။ ကဵု ၅၀၅ ဂှ်တှ်ေ ဖျေံဒုဟ်ဒဏ်ဇၞော်ဇၞော်ဟွံဂွံပုဟ်။ ကဵုၝောံပိုဒ်ပကီုပရာပ်ဟီုတှ်ေ ဖျေံဒုဟ်ဒဏ်ဇၞော်ဇၞော်ဂွံမံၚ်။ ကၟာတ်လဒဵုသ္ၚိတံ၊ သီဂိုၚ်ပိုန်ဒြပ်တံဂှ်တှ်ေ လ္ပာ်ဍေံတံ ကၠောန်ဂွံရ။ ဟိုတ်ဂှ်ရ ဍေံတံစောဲဂဗုတ် နကဵုၝောံပိုဒ်ပကီုပရာပ်ဏံ။ လ္ၚဵုဂှ်တှ်ေ ဟွံဆက်စပ်ကဵု ပကီုပရာပ်တံမွဲသာ် စောဲကၠုၚ်ဂဗုတ် နကဵုၝောံပိုဒ်ညာတ်စဟွံဂွံတံ နကဵုၝောံပိုဒ်ပကီုပရာပ်တံဂှ် ဂွံဆဵုကေတ်ဒၟံၚ် ဒၞါဲဗွဲမဂၠိုၚ်ဂၠေၚ်ရ“ သာ်ဝွံ သ္ဂးရ။
ကံၚ်ဇြဳပၞာန်ဝွံ အခိၚ်လၟုဟ် ရပ်ဒက်ကၠုၚ် ညးဍုၚ်ကွာန်ဒေသတံ နကဵုတၚ်စောဲစပ် ထံက်ပၚ်သြန် ဂကောံဒပ်စဵုဒၞါညးဍုၚ်ကွာန် PDF ၊ လုပ်စိုပ်ချူလညာတ် သၟဝ်မုက်လိက်ဇာဇၞိက်ပရေၚ်မၞိဟ် ဂကောံဇြဟတ်ပၠန်ဂတးတံ၊ ကလေၚ်ပါ်ပရအ်တံဂှ် နကဵုသၞောဝ်ပကီုပရာပ်တံသၟးရ။
အတိုၚ်သၞောဝ်ဗ္တိုက်သရိုဟ်ပကီုပရာပ် လ္ပာ်ကံၚ်ဇြဳပၞာန်တံ မစောဲစပ်လဝ်ဂှ်မ္ဂး ယဝ်ရဒုဟ်ဒဏ်ပြာကတ်မ္ဂး အောန်အိုတ် ဒဏ်ထံၚ် နူကဵု ၇ သၞာံ စဵုကဵုဒဏ်ထံၚ်မွဲအာယုက် ဒးဒုၚ်ဖျေံဒုဟ်ဒဏ်မာန်တုဲ ကၟာတ်လဒဵုသီထောံလဝ် သီုကဵုသ္ၚိဒၟံၚ် ကေုာံ ပိုန်ဒြပ်အရပ်ရာတံရ။
ကိုဝ်တိုက်ထောန်ဥူ ညးဒုၚ်တာလျိုၚ် လလောၚ်ပရိုၚ် ဇာဇၞိက်ကောန်ထံၚ်ပရေၚ်ဍုၚ်ကွာန် စပ်ကဵုအလုံဍုၚ်ဗၟာတံဂှ်မ္ဂး ကံၚ်ဇြဳပၞာန် မကျဗြံကၠုၚ်ဒၟံၚ်ပရေၚ်ပၞာန်တံဂှ်ဝွံ ဗွဲကြဴဏံ စၞး ၅၀၅ (က) ဂှ် ရပ်စပ်ကၠုၚ် ၝောံပိုဒ်သၞောဝ်ပကီုပရာပ်တံ သၠဲသၠဲလးလးဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဗွဲကြဴဏံ ၝောံပိုဒ် ၅၀၅ ဂှ်ဟီုတှ်ေ က္တဵုဒှ်တိုန်ကိစ္စမွဲမွဲတှ်ေ ဍေံတံဒးဗလးကဵုဂှ် နွံကၠုၚ်။ မူဟိုတ်ရောတှ်ေ ၅၀၅ တံဏံနွံဒၟံၚ်ဂှ်လေဝ် သွက်ကံၚ်ဇြဳပၞာန်ဂှ် ရပ်စပ်သ္ပဒၞန် ပ္ဍဲပရေၚ်ဍုၚ်ကွာန်ဂွံမံၚ်။ အခိၚ်ဇြဟတ်ဂရိုဟ်ဍေံတံဂၠိုၚ်တှ်ေ တပ်စုတ်က္ဍိုပ်လိက် ၅၀၅ တုဲ နှဴကဵုဂဗုတ်တၞဟ်ဟ်တုဲ ဗလးကဵုတံလေဝ်နွံ။ ဆ္ဂး ဗွဲကြဴဏံ ဇြဟတ်ဂရိုဟ်ဍေံတံဂှ် ဟွံယအ်အာမွဲသာ် နူဒိုဟ်ဇဳဂှ်လေဝ် ကၟာတ်လဒဵုကၠုၚ် သီုကဵုပရေၚ်ပၞာန်တံတုဲ အခါခက်ခုဲကၠုၚ်ကွေံကွေံဂှ် ဗီုကၠာတေံ စၞး ၅၀၅ ဂှ် ညံၚ်ဂွိုအ်ဒးဗလးမၞိဟ်တံဏံ ဖျေံကၠုၚ်အမိၚ် ၝောံပိုဒ်ဟွံဗဗွဲကဵုဓဝ်တံ ပါလုပ်သီုကဵုၝောံပိုဒ်ပကီုပရာပ်တံဂှ် ကၠောန်ကၠုၚ်ရ“ သာ်ဝွံ သ္ဂးရ။
နကဵုကံၚ်ဇြဳပၞာန် ကၠောန်ၜိုတ်ကၠုၚ်သာ်ဏံဂှ်ဝွံ ညးဍုၚ်ကွာန်တံ စိုတ်ဂွိၚ်ဂွါဲလုပ်တုဲ ညံၚ်စိုတ်ဂွံလုပ်စ ပ္ဍဲပရေၚ်ဍုၚ်ကွာန် အောန်စှ်ေဂှ်တုဲ ညးဍုၚ်ကွာန်တံ ကဵုဇြဟတ်ကုညးမကၠောန်ဒၟံၚ်ပရေၚ်ပၠန်ဂတးတံ ညံၚ်ဂွံအောန်တုဲ စိုတ်ဂွံအိုတ်အာဂှ် ကၠောန်ဒၟံၚ်ရောၚ် ညးဆက်ဟီုရ။
ကံၚ်ဇြဳပၞာန်ဝွံ စနူသၞာံ ၂၀၂၂ တေံတုဲ မ္ၚးနူကဵုထံၚ်မွဲအာယုက်တံဂှ် စောဲကၠုၚ်ဂဗုတ် သီုတပ်စုတ်ၝောံပိုဒ်ပကီုပရာပ် မဖျေံစၟတ် သီုဒဏ်ဂစိုတ်မာန်တံဂှ်တုဲ ပ္ဍဲသၞာံ ၂၀၂၃ ဏံ ကၠောန်ကၠုၚ်သာပရေံနူဏံဂှ် ညးမရီုဗၚ်ရေၚ်တၠုၚ်ဒၟံၚ် ပရေၚ်ကောန်ထံၚ်ပရေၚ်ဍုၚ်ကွာန်တံ သ္ဂးအိုတ်ရ။
သ္အာၚ်နူဂှ်ပၠန် ဗွဲကြဴဏံလေဝ် ကံၚ်ဇြဳပၞာန် ပ္ဍဲအရာဖျေံစၟတ်ဒုဟ်ဒဏ် ကုညးမကၠောန်ဒၟံၚ်ပရေၚ်ဍုၚ်ကွာန်တံဂှ် ဖျေံစၟတ်ဒၟံၚ် ဒဏ်သၠုၚ်အိုတ်တံသၟးရဂှ်တုဲ မ္ၚးနူကဵုဒဏ်ထံၚ်မွဲအာယုက်ဂှ် မၞိဟ်ဒးဒုၚ်ကၠုၚ်ဒဏ်ဂစိုတ်တံလေဝ် ဂၠိုၚ်တိုန်ကၠုၚ်တီတီဂှ် ဂွံတီကေတ်ရ။
အတိုၚ်ဂလာန် ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPP ဂှ်မ္ဂး အပ္ဍဲကာလသီအဝဵုဏံ အလုံမွဲကၟိန်ဍုၚ် မၞိဟ်ဒးဒုၚ်ရပ် ဗ္ဒါဲ ၂၆၀၀၀ နွံတုဲ မၞိဟ်ကလေၚ်ဗၠးကၠုၚ် ၅၈၀၀ ပြၚ်၊ မၞိဟ်ဆက်တုဲဒးဒုၚ်ရပ်ထိၚ်လဝ် ဗ္ဒါဲ ၂၀၀၀၀ နွံဂှ် ဂွံတီကေတ် အတိုၚ်လိက်ဒုၚ်စဳရေၚ် လလောၚ်ပ္တိတ် ပ္ဍဲဂိတုဂျာန္နဝါရဳ ၄ တေံရ။
ပရိုၚ်−သြၚ်လောန်တိုၚ်(မ်)
ဗီု−AFP