မတ်မလီု၊ ဂျာန္နဝါရဳ ၉
အပ္ဍဲသၞာံ ၂၀၂၃ တုဲကၠုၚ်တေံ ဒပ်ပၞာန်သီလဝ်အဝဵုဍုၚ်ဗၟာ ပွိုၚ်မွဲသၞာံဂှ် ဟိုတ်နူကံၚ်ဇြဳပၞာန်တုဲ ညးဗြဴ ၃၉၂ တၠ ချိုတ်အာလဝ်တုဲ ၅၄၁ တၠ ဒးဒုၚ်ရပ်လဝ်နွံဂှ် ဂွံတီကေတ် အတိုၚ်တၚ်လလောၚ်တြး သမဂ္ဂညးဗြဴဍုၚ်ဗၟာ BWU ရ။
ညးဗြဴ မဒးချိုတ်အာလဝ်တံဝွံ ဟိုတ်နူကံၚ်ဇြဳပၞာန် ပန်ပှော်လွဟ်ဇၞော် ကေုာံ က္ၜၚ်ကျာတံတုဲ ဗ္တိုက်ဂှ်ကီု၊ အပ္ဍဲပေါဲဗ္တိုက်ၜါလ္ပာ်ဂှ် ဒးဇီုကပိုက်ချိုတ်အာလဝ်ကီု၊ ကြဴနူဒးဒုၚ်ရပ်တုဲ ဟိုတ်နူဒးဒုၚ်ၜုၚ်တက်ပျဲပျာံဂစိုတ်လဝ်တံရောၚ်ဂှ် BWU သ္ဂးလဝ်ရ။
လ္ဂောံကဵုညးဗြဴမ္ဒးချိုတ်အာတံဂှ်မ္ဂး တုဲကၠုၚ်ပ္ဍဲဂိတုဒဳဇြေမ်ဗာ မွဲဂိတုဓဝ်ဂှ် ၃၃ တၠ ချိုတ်အာလဝ်တုဲ ရခေၚ်၊ ကရေၚ်၊ မာန္တလေဝ် ကေုာံ သက်ကိုၚ်တံ ပါလုပ်ဒၟံၚ်ဂၠိုၚ်အိုတ်ဂှ် ဂွံတီကေတ် အတိုၚ်တၚ်လလောၚ်တြး BWU ရ။
အတိုၚ်ဂလာန် ညးတာလျိုၚ် ဂကောံသမဂ္ဂညးဗြဴ BWU မွဲတၠဂှ်မ္ဂး ညးဗြဴဂမၠိုၚ်ဝွံ ဟိုတ်နူပရေၚ်ဗ္တိုက်လွဟ်ဇၞော် ကေုာံ က္ၜၚ်ကျာတံတုဲ ဒးချိုတ်အာလဝ်ဂၠိုၚ်အိုတ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုလၟေၚ်ဒဒှ်လ္ၚဵုတံဂှ် အခိၚ်ဒပ်ကံၚ်ဇြဳပၞာန် ထ္ပက်ကရောၚ်ပၞာန်ဂှ် ညးဗြဴသှ်ေသၟေဟ်ဒၟံၚ် အပ္ဍဲကွာန်တံဝွံ ဒးဒုၚ်သ္ပဒၟံၚ်အဓမ္မ ဂစိုတ်ဒၟံၚ် ကုကောန်ဒပ်ကံၚ်ဇြဳပၞာန်တံတုဲ လၟေၚ်ဒဒှ်တံဏံဝွံ က္တဵုဒှ်လဝ် ပ္ဍဲကဵုရးသက်ကိုၚ် ဂၠိုၚ်အိုတ်ဂှ် ဂွံတီကေတ် အတိုၚ်တၚ်နၚ် နူကဵုသြၚ်လောန်တိုၚ်(မ်) မကံက်ကပှ်ဂွံလဝ်တံရ။
အတိုၚ်ဂလာန် BWU ဂှ်မ္ဂး အပ္ဍဲပွိုၚ်မွဲသၞာံ ပ္ဍဲကဵုညးဗြဴဒးဒုၚ်ရပ်လဝ် ၅၄၁ တၠဂှ် ညးဗြဴဒးဒုၚ်ဖျေံဒဏ်ထံၚ် ၃၁၈ တၠနွံတုဲ ညးတံဝွံ ချူပါ်ပါဲ ဒပ်ကံၚ်ဇြဳပၞာန် ပ္ဍဲဇာဇၞိက်ပရေၚ်မၞိဟ်တံကီု၊ ဆက်စပ်ဒၟံၚ်ကဵု ဂကောံဇြဟတ်ပၠန်ဂတးတံကီုတုဲ ဒးဒုၚ်ရပ်ဒက်လဝ် နကဵုတၚ်စောဲစပ်ဏံရ။
BWU ဂှ် တၚ်နၚ်တံဏံဝွံ ၜိုန်ရကံက်ကပှ်လဝ် နူကဵုဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP တံကဵု ပရိုၚ်မဳဒဳယျာဗၠးၜးတံ မထ္မံက်ထ္ၜးလဝ်ဂှ်ကီုလေဝ် ဗလးတိဏံ ဂၠိုၚ်နူဏံမာန်ဂှ် ကဵုလဝ်သမ္တီရ။
နူစဒပ်ပၞာန်သီအဝဵု သၞာံ ၂၀၂၁ ဂိတုဖေဖဝ်ဝါရဳ ၁ စဵုကဵုသၞာံ ၂၀၂၃ ဂိတုဒဳဇြေမ်ဗာ ၃၁ ဂှ် ဟိုတ်နူကံၚ်ဇြဳပၞာန်တုဲ ညးဗြဴ ၇၀၅ တၠချိုတ်တုဲ ဗ္ဒါဲ ၃၃၀၀ ဒးဒုၚ်ရပ်ဒက်လဝ်ရောၚ် BWU လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media