ထဝါဲ၊ ဂျာန္နဝါရဳ ၉
ကောန်ထံၚ်ပရေၚ်ဍုၚ်ကွာန် မဒးဒုၚ်ရပ်ဖျေံလဝ်ထံၚ် နကဵုၝောံပိုဒ်ပရေၚ်ဍုၚ်ကွာန် ပ္ဍဲကဵုထံၚ်စာတ်ထဝါဲ၊ ရးတၞၚ်သဳတံဂှ် ဟွံဂွံအခေါၚ်လွဳယဲမွဲသာ် ရပ်စပ်နဲကဲနာနာတုဲ ဒးဒုၚ်ဍဵုဍိုက်ဒၟံၚ်ရောၚ် ဂွံတီကေတ် နူကဵုဇာဇၞိက်ကောန်ထံၚ်ပရေၚ်ဍုၚ်ကွာန်ထဝါဲ DPPN ရ။
ကောန်ထံၚ်ပရေၚ်ဍုၚ်ကွာန် နူကဵုထံၚ်စာတ်ထဝါဲတံဝွံ ပၞောဝ်ကဵုကောန်ထံၚ်အပ္ဍဲထံၚ်ဂမၠိုၚ် လ္တူကောန်ထံၚ်ပရေၚ်ဍုၚ်ကွာန်တံဂှ် နကဵုတၚ်ရန်တၟံနွံနွံ လေပ်ကၠောန်သ္ပတဴ ပွပကီုပရာပ်တံဂှ်နွံတုဲ ပါ်ကဆံၚ်တုဲဆက်ဆောံဒၟံၚ်တံလေဝ် နွံဒၟံၚ်ဂှ် DPPN ဟီုရ။
ဟိုတ်နူဟွံဂွံအခေါၚ်လွဳယဲတုဲ ကောန်ထံၚ်ပရေၚ်ဍုၚ်ကွာန် ဥူထောန်ဝေ အာယုက် ၅၇ သၞာံဂှ်ဝွံ မတ်ဒးကၠက်အာလဝ်ဂှ် ပ္ဍဲဂိတုဂျာန္နဝါရဳ ၈ တေံ DPPN လလောၚ်ပ္တိတ်လဝ်ရ။
ဥူထောန်ဝေဝွံ ဟိုတ်နူယဲမတ်ကၞအ်တုဲ လောန်ကၠုၚ်နူကဵု ၆ ဂိတုတေံ ဂွံလွဳယဲမ္ၚးဏံဂှ် ၜိုန်ရအာတ်မိက်ပ္တိုန်ထ္ၜးလဝ် ဇရေၚ်သၟိၚ်တၠအဝဵုထံၚ်စာတ်တံကီုလေဝ် ဟွံဂွံအခေါၚ်လွဳယဲတုဲ အပ္ဍဲဂိတုဂျာန္နဝါရဳလၟုဟ်ဏံ မတ်ကၠက်အာလဝ်ရောၚ် သ္ဂးရ။
အပ္ဍဲသၞာံ ၂၀၂၁ တုဲကၠုၚ်တေံ ဒပ်ကံၚ်ဇြဳပၞာန် ကြဴနူကၠုၚ်စိုပ်ရပ်ဒက်ဏာလဝ် ဥူထောန်ဝေ ဒၟံၚ်အရာပ်(ကြက်စားပြၚ်) ဍုၚ်ထဝါဲတုဲဂှ် နကဵုၝောံပိုဒ် ၅၂ (က) ကေုာံ ၅၀၅ (က) သၞောဝ်ဗ္တိုက်သ္အးပွပကီုပရာပ်တံဂှ် ဖျေံလဝ်အမိၚ် ဒဏ်ထံၚ် ၉ သၞာံရ။
အပ္ဍဲထံၚ်စာတ်ထဝါဲဂှ် နကဵုကောန်ထံၚ်ဂမၠိုၚ် ယဝ်ရဒှ်ကၠုၚ်ကိစ္စပရေၚ်ထတ်ယုက်မ္ဂး ဒးလွဳဒၟံၚ် နကဵုဂဥုဲ ရုၚ်ဂဥုဲထံၚ်တံ ညိညဂှ်ရတုဲ ယဲက္ဍၚ်မ္ဂးလေဝ် အခေါၚ်လွဳယဲ ပ္ဍဲကဵုရုၚ်ဂဥုဲမ္ၚးဏံ ဟွံမွဲပုဟ်ဂှ် ဂွံတီကေတ် အတိုၚ်ဂလာန် ညးမကလေၚ်ဗလးကၠုၚ်တံရ။
တုဲကၠုၚ် ပ္ဍဲဂိတုအံက်တဝ်ဗာတေံဂှ်လေဝ် ကောန်ထံၚ်ပရေၚ်ဍုၚ်ကွာန် ဥူကျဝ်တုၚ် ဒးဒုၚ်ဖျေံလဝ်ထံၚ်သၞာံဂၠိၚ် ပ္ဍဲကဵုထံၚ်ထဝါဲဂှ်ဝွံ ဍောၚ်တိုန်တုဲ နူကဵုရုၚ်ဂဥုဲအပ္ဍဲထံၚ်မွဲကဆံၚ် အခိၚ်ပလံၚ် ရုၚ်ဂဥုဲထဝါဲဂှ် ဒးချိုတ်အာလဝ်ရ။
ပ္ဍဲကဵုထံၚ်စာတ်ထဝါဲဂှ် ကောန်ထံၚ်ပရေၚ်ဍုၚ်ကွာန် ဒးဒုၚ်ဖျေံလဝ်ထံၚ်တံ နွံဒၟံၚ် ဗ္ဒါဲ ၄၀၀ တုဲ ဒးဒုၚ်ဍဵုဍိုက်ပကီုပရာပ်ဒၟံၚ် ကုသၟိၚ်တၠအဝဵုထံၚ်တံ၊ ဒးဒုၚ်ဍဵုဍိုက်ၜုၚ်တက်တံဂှ် ဒးဒုၚ်စဒၟံၚ်သိုၚ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Dawei Watch