နေဗျဳဒဝ်၊ ဂျာန္နဝါရဳ ၉
အေလောန်ကဳရိုဝ် ကေတ်တဳဟံၚ် ဒးဒုၚ်ခါန်ကၞက်လဝ် နဒဒှ်ညးစၞးတၟေၚ်အာဇြဳယာန် စပ်ကဵုဍုၚ်ဗၟာ က္တဴက္တဴလဴလဴဂှ် ပ္ဍဲဂိတုဂျာန္နဝါရဳ ၁၀ ဏံ ဆဵုဂဗအာကဵု ဂကောံရပ်လွဟ်ကောန်ဍုၚ်အရၚ် ၅ ဂကောံတံ ပ္ဍဲဍုၚ်နေဗျဳဒဝ်ဏောၚ်ဂှ် ဂွံတီကေတ် နူကဵု PPST ရ။
အခိၚ်ဍုၚ်လာအိုဝ် ကေတ်တာလျိုၚ် နဒဒှ်ဥက္ကဌဒးအလန်အာဇြဳယာန်ဂှ် ညးစၞးတၟေၚ်အာဇြဳယာန် စပ်ကဵုဍုၚ်ဗၟာဂှ် စိုပ်ကၠုၚ်ဍုၚ်ဗၟာ ကၠာအိုတ်တုဲ သွက်ဂွံဆဵုဂဗ ကုဂကောံရပ်လွဟ်ကောန်ဍုၚ်အရၚ် ဒေါအ်ပန်ပှော်တံ မွဲဂကောံတုဲမွဲဂကောံဂှ် ဘိက်ပၟိက်လဝ်ရောၚ် သ္ဂးရ။
ပ္ဍဲကဵုဂကောံဒေါအ်ပန်ပှော်ဂှ် ဂအုပ်ဂကောံဗၠးၜး ကောန်ဂကူပအိုဝ် (PNLO) ၊ ကံၚ်ဇြဳပရေၚ်ၜိုဟ်လလမ်ကရေၚ် (KNU/ KNLA-PC) ၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် (DKBA) ၊ ဗော်ဗၠးၜးဍုၚ်ရခေၚ် (ALP) ကေုာံ ဗော်သွးဒဳမဝ်ကရေတ်တေတ်လာဟူ (LDU) တံ အာစိုပ်ဏောၚ် မဒှ်ရ။
EAO ဒေါအ်လဝ်ပန်ပှော်သှ်ေဒၟံၚ် ကံၚ်ဇြဳကလေၚ်ဒက်ပ္တန်ရးသေံ (RCSS) ကဵု ဗော်ဍုၚ်မန်တၟိ (NMSP) တံဂှ် အခိၚ်လၟုဟ် ဟိုတ်နူအခက်အခုဲညးတံတုဲ ဂွံအာဂှ် ဟွံဒှ်ဒတုဲဏီပုဟ်ဂှ် ညးမၞုံအခေါၚ်ဟီုဂး PPST သ္ကိုပ်ဗိုလ်ဇၞော် သဝ်ကျဝ်ညောအ် ဟီုရ။
ပ္ဍဲကဵုပရေၚ်ဆဵုဂဗ ညးစၞးတၟေၚ်အာဇြဳယာန်ကဵု ဂကောံဒေါအ်ပန်ပှော် ၅ ဂကောံဂှ် သဳကၠဳအာ ကိစ္စပရူပရာလဵုဏောၚ် အစဳဇန်သာ်လဵုနွံဏောၚ်ဟီုဂှ် ဟွံဂွံတီကေတ် ချိုတ်တ်ပၠိုတ်တ်ပုဟ်ဂှ် သ္ကိုပ်ဗိုလ်ဇၞော် သဝ်ကျဝ်ညောအ် ဟီုရ။
“ဟိုတ်နူဒှ်လၟေၚ်တရဴ ညးစၞးဒးအလန်အာဇြဳယာန် အလန်ကိုပ်ကၠာအိုတ်တုဲ ချိၚ်ခယျကေတ်ဂှ်တှ်ေ လၟေၚ်ကမၠောန်သ္ဂောံဆဵုဂဗသဳကၠဳ အေန်ဒိုဝ်နဳယှာကၠောန်ဒၟံၚ်ကၠာတေံ ကမၠောန်သ္ဂောံထ္မံက်ရုပ်ရဴမွဲရဏောၚ်ဂှ် နကဵုအဲညာတ်ရ။ ဆ္ဂး ညအ်ဂှ် ဒှ်ပေါဲဆဵုဂဗ အာကဵုပရိုဝ်ဖိုၚ်ဏောၚ်တုဲ သဳကၠဳအာညးသ္ကအ် က္ဍိုပ်လိက်လဵုရော၊ အစဳဇန်သာ်လဵုနွံရောဟီုဂှ် ချိုတ်တ်ပၠိုတ်တ်ဂှ် ပိုယ်တံလေဝ် ဟွံဂွံတီကေတ်ပုဟ်” သာ်ဝွံ သ္ဂးရ။
နကဵုအာဇြဳယာန် ပ္ဍဲဍုၚ်ဗၟာ နူကဵုသၞာံ ၂၀၂၁ ဒပ်ပၞာန်သီအဝဵု စဵုကဵုသၞာံ ၂၀၂၄ ဏံ ဥက္ကဌဒးအလန် ပြံၚ်လှာဲအာ ပန်အဆက်တုဲ အခိၚ်အေန်ဒိုဝ်နဳယှာ ဒှ်ကၠုၚ်ဥက္ကဌဒးအလန်တုဲကၠုၚ်တေံဂှ် ကၠောန်ကၠုၚ်လဝ်ဆဵုဂဗသဳကၠဳ ကုညးမဆက်စပ်သီုဖအိုတ် မာန်လဝ်ရ။
နကဵုညးစၞးတၟေၚ် အာဇြဳယာန်စပ်ကဵုဍုၚ်ဗၟာလၟုဟ်ဂှ် ပ္ဍဲကဵုလၟေၚ်တရဴဍုၚ်ဗၟာညးတဂှ် မ္ၚးနူကဵုဂကောံရပ်လွဟ်ကောန်ဍုၚ်အရၚ် ဒေါအ်ပန်ပှော်တံဂှ် ကဵုဗော်ပရေၚ်ဍုၚ်ကွာန်တံလေဝ် သွက်ဂွံဆဵုဂဗတၞဟ်ခြာ ပ္ဍဲဂိတုဂျာန္နဝါရဳ ၁၂ ဂှ် နွံဒၟံၚ်ရ။
အလဵုအသဳလာအိုဝ် မကေတ်လဝ်တာလျိုၚ် နဒဒှ်ဥက္ကဌဒးအလန်အာဇြဳယာန်ဂှ် ရုဲစှ်ခါန်ကၞက်လဝ် အေလောန်ကဳရိုဝ် မကေၚ်ယိုက်ဂၠေၚ်လဝ်တာလျိုၚ် ကလုတ်လာအိုဝ် စပ်ကဵုကုလသမဂ္ဂ နဒဒှ်ညးစၞးတၟေၚ်အာဇြဳယာန် စပ်ကဵုဍုၚ်ဗၟာရ။
ပရိုၚ်−သြၚ်လောန်တိုၚ်(မ်)
ဗီု−AFP