ကအ်ကြိက်၊ ဂျာန္နဝါရဳ ၁၁
တွဵုရးကရေၚ် လ္တူဍုၚ်ကအ်ကြိက်ဂှ် အကြာဒပ်ကံၚ်ဇြဳပၞာန်ကဵု ဂကောံဒပ်ပံၚ်ကောံ KNLA PDF တံ ပေါဲဗ္တိုက်ၜါလ္ပာ် ဆက်က္တဵုဒှ်ဒၟံၚ်တုဲ သ္ၚိဒၟံၚ်ပၟတ်တူလီုလာ်တံကဵု ကောန်အရာပ်ချိုတ်ဂျိုၚ်တံ ဆက်နွံဒၟံၚ်ရောၚ် ဂွံတီကေတ် နူကဵုညးဒေသတံရ။
ပေါဲဗ္တိုက်ကအ်ကြိက် မက္တဵုဒှ်ကၠုၚ်လဝ် လလအ်ပွိုၚ်မွဲဂိတုပြၚ်ဂှ်ဝွံ ပ္ဍဲဂိတုဂျာန္နဝါရဳ ၉ တေံ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံဂှ် ပေါဲဗ္တိုက်အပ္ဍဲဍုၚ်တံ က္တဵုဒှ်ဒၟံၚ်ရ။
အပ္ဍဲပေါဲဗ္တိုက်ဂှ် ညးဍုၚ်ကွာန် ဒၟံၚ်ဂၠံၚ်ဇိုၚ်ၜဳ ဍုၚ်ကအ်ကြိက် ဟိုတ်နူကလေၚ်စဴကၠုၚ်ကေတ်ကပေါတ်တံ ဒးဒုၚ်ပန်ဂစိုတ်လဝ် ကဵုသေနာတ်ဂှ်တုဲ မွဲတၠချိုတ်တုဲ မွဲတၠကလိဂွံလဝ်ဝပ်ဂှ် ညးဒေသကအ်ကြိက်တံ ဟီုရ။
သ္အာၚ်နူဂှ်ပၠန် ညးဍုၚ်ကွာန်ဒေသမွဲတၠ နူကဵုအရာပ် စၟတ် ၆ ဍုၚ်ကအ်ကြိက်ဂှ်လေဝ် ဒးသေနာတ်တုဲ ချိုတ်အာလဝ်ဂှ် ဂွံတီကေတ် နူကဵုညးဒေသကအ်ကြိက်တံရ။
ညးဒေသတံကဵု ရဲရေၚ်တၠုၚ်ရီုဗၚ်ပရေၚ်မၞိဟ်တံဂှ် ပ္ဍဲကဵုကာလပရေၚ်ပၞာန်က္တဵုဒှ်ဒၟံၚ်ဂှ် ညံၚ်ဂွိုအ်ကလေၚ်လုပ်စိုပ် အပ္ဍဲဍုၚ်ကအ်ကြိက်တံဂှ် ကဵုလဝ်သတိကီုလေဝ် ညးဒေသလ္ၚဵုတံဂှ် စဴကၠုၚ်ဌာန်ဒၟံၚ်တံ နွံဒၟံၚ်ရောၚ် ဂွံတီကေတ်ရ။
အပ္ဍဲပေါဲဗ္တိုက် ဍုၚ်ကအ်ကြိက်ဂှ် လ္ပာ်ဒပ်ကံၚ်ဇြဳပၞာန် ပန်ပှော်စုတ်လဝ် အပ္ဍဲအရာပ်ဂမၠိုၚ် နကဵုလွဟ်ဇၞော်တုဲ သ္ၚိဒၟံၚ်ညးဍုၚ်ကွာန်ဒေသတံ ပၟတ်တူလီုလာ်အာတံ နွံဒၟံၚ်တုဲ လၟိဟ်ချိုတ်တ်ပၠိုတ်တ်ဂှ် ဟွံဂွံတီကေတ်ဏီပုဟ်ဂှ် ဂွံတီကေတ် အတိုၚ်ဂလာန် ညးဒေသတံရ။
စနူဂိတုဒဳဇြေမ်ဗာ ၁ တုဲကၠုၚ်တေံတုဲ ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA PDF တံ လုပ်စိုပ်ဗ္တိုက်လဝ် ဒၞါဲဒပ်ကံၚ်ဇြဳပၞာန်တံ ဖျေံလဝ်သ္ဇိုၚ် လ္တူဍုၚ်ကအ်ကြိက်ဂှ်တုဲ လ္တူဍုၚ်ဂှ် ပေါဲဗ္တိုက်ၜါလ္ပာ်တံ က္တဵုဒှ်လဝ် သ္ကာတ်တ်မြဟ်ဟ်ရ။
ဟိုတ်နူပေါဲဗ္တိုက်ဂှ်တုဲ ပ္ဍဲကဵုသ္ကုတ်ဂၠံၚ်အာယှ ကအ်ကြိက်−ဗြဝတဳဂှ်လေဝ် ဒးဒေါအ်လဝ် ပရေၚ်အာကၠုၚ်တံတုဲ ညးဍုၚ်ကွာန်ဒေသ ဂၠိုၚ်ကဵုဠက် ဒးဂြိပ်ဒဴပါဲဒလေတ်ဒၟံၚ်ဖိုဟ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ