ရေဝ်၊ ဂျာန္နဝါရဳ ၁၁
ကောန်ဒပ်ကံၚ်ဇြဳပၞာန် မၞုံအပ္ဍဲပွိုၚ်ဍုၚ်ရေဝ် တွဵုရးဍုၚ်မန်တံ သွက်ဂွံလုပ်ဖျေံလွဟ်ဂှ် ဂကောံဇြဟတ်ပၠန်ဂတးတံ တြးလဝ်လိက် ဖ္တိုက်ဖ္အောဝ်ဆဝ်မ္ၚုဟ် ပ္ဍဲဂိတုဂျာန္နဝါရဳ ၁၀ အခိၚ်နူဂယးပြဟ်ဂှ် ဂွံတီကေတ် အတိုၚ်ဂလာန် ညးဒေသတံရ။
ပ္ဍဲကဵုဖျာဇိုၚ်ၜဳ ဍုၚ်ရေဝ်ကီု ပ္ဍဲကဵုဒၞါဲမၞိဟ်ကောံဂၠိုၚ်တံသၟးဟွံက သီုကဵုလ္ပာ်ကွာန်အၜဝ် ကေုာံ ကွာန်ဘာတံဂှ် ဂကောံဇြဟတ်ပၠန်ဂတးတံ ဗက်ကာတ်လဝ်လိက် ကေုာံ ဗက်တြးလဝ်လိက် ကောန်ဒပ်ကံၚ်ဇြဳပၞာန်တံ သွက်ဂွံလုပ်ဖျေံလွဟ်အိုတ်ရ။
ပ္ဍဲကဵုလိက်ဖ္တိုက်ဖ္အောဝ်ဏံဂှ် ကောန်ဒပ်ကံၚ်ဇြဳပၞာန်တံ သွက်ဂွံလုပ်စိုပ်ဖျေံလွဟ်ဗွဲမပြဟ်ဂှ်ကီု၊ သွက်ဂွံပံၚ်တောဲကဵု ညးဍုၚ်ကွာန်တံကီု၊ ကောန်ပၞာန် လုပ်စိုပ်ကၠုၚ် နကဵုလွဟ်တံဂှ် ဒဒှ်ရဖျေံအာလာဘ်သြန်ဒ္ကေဝ်ဏောၚ်ဂှ် တြးလဝ် နကဵုဘာသာမန်၊ ဗၟာ ၜါဘာသာရ။
ကြဴနူဗက်တြးလဝ်လိက်ဖ္တိုက်ဖ္အောဝ် သွက်ဂွံဖျေံလွဟ်တုဲ ဟွံလအ်ဂှ် ဒပ်ကံၚ်ဇြဳပၞာန်၊ ဂကောံဒပ်ဗၠာဲသၟိၚ် ကေုာံ ဂကောံအုပ်ဓုပ်တံ ဗက်သီဂိုၚ်လဝ်တၟာလှ်ေဂှ် ဂွံတီကေတ် အတိုၚ်ဂလာန်ညးဒေသတံရ။
အခိၚ်ဗက်သီဂိုၚ်ဒၟံၚ် လိက်ဖ္တိုက်ဖ္အောဝ် သွက်ဂွံလုပ်ဖျေံလွဟ်ဂှ် ဒပ်ကံၚ်ဇြဳပၞာန်ဝွံ သီုကဵုစၟဳတ်သၟာန်သၟုက်လဝ် ညးဍုၚ်ကွာန်ဒေသလ္ၚဵုတံဂှ်ရောၚ် ညးဒေသတံ ဟီုဂးလဝ်အိုတ်ရ။
သ္ကိုပ်စၟဳတ် ကရောၚ်ပၞာန်ဒဝ်န မချဳဒရာၚ်ဒၟံၚ်ပရေၚ်ပၞာန် ပ္ဍဲပွိုၚ်ဍုၚ်ရေဝ်ဂှ် အပ္ဍဲကာလခြာဟွံလအ်ဏံ သွက်ဂွံသၠုၚ်ပ္တိုန်အသိၚ်ပၞာန်နွံဒၟံၚ်ဂှ်ရ ကောန်ဒပ်ကံၚ်ဇြဳပၞာန်တံ တီကၠိုဟ်ကေတ်ဓဝ်ဍာံတုဲ မိက်ဂွံကဵုကၠုၚ်ပံၚ်တောဲ ကုညးဍုၚ်ကွာန်တံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သ္အာၚ်နူဂှ်ပၠန် ပၠန်ဂတးညးဍုၚ်ကွာန် ညံၚ်သၞောတ်တၠအဝဵုပၞာန် ဂွံသရိုဟ်စှ်ေ ဂှ်ဝွံ ဟိုတ်နူဒှ်ဒၟံၚ်သွက်ဂွံသရိုဟ်ဖျေံသၞောတ်ဂှ်ရ ကောန်ဒပ်ကံၚ်ဇြဳပၞာန်တံ သွက်ဂွံကၠုၚ်စိုပ်ပံၚ်တောဲကဵုဗွဲမပြဟ်အိုတ်ညိဂှ် ဖ္တိုက်ဖ္အောဝ်လဝ်ရ။
ဍုၚ်ရေဝ်ဂှ် လ္ပာ်ဂကောံဒပ်ပံၚ်ကောံပၠန်ဂတးတံ သွက်ဂွံထ္မံက်ရုပ်ရဴ ပေါဲဗ္တိုက်သီဍုၚ်၊ သီဗ္ဒိုပ်ဂှ် ပရိုၚ်မံက်တိတ်ဒၟံၚ်တုဲ ဒပ်ကံၚ်ဇြဳပၞာန်တံ သၠုၚ်ပ္တိုန်လဝ်ပရေၚ်ဂီုကၠီုတုဲ ပလေဝ်ပလေတ်လဝ်သွက်ပၞာန်ဒုၚ် ဗွဲမဗိုန်ခိုၚ်ရ။
အပ္ဍဲသၞာံ ၂၀၂၄ ဏံ အလုံတွဵုရးဍုၚ်မန် ပါလုပ်သီုကဵုပွိုၚ်ဍုၚ်ရေဝ်ဂှ် သၠုၚ်ပ္တိုန်အာပရေၚ်ပၞာန်ဏောၚ် ဂကောံဒပ်ပံၚ်ကောံပၠန်ဂတးမန်တံ ကဵုလဝ်သမ္တီ ပ္ဍဲဂိတုဒဳဇြေမ်ဗာ ၃၁ တုဲကၠုၚ်တေံရ။
ပရိုၚ်−သြၚ်လောန်တိုၚ်(မ်)
ဗီု−ကရောၚ်ပၞာန်ဒဝ်န