မတ်မလီု၊ ဂျာန္နဝါရဳ ၁၀
ကံၚ်ဇြဳပၞာန် မဒးကျဗြံကၠုၚ်ဒၟံၚ် ပ္ဍဲကဵုပရေၚ်ပၞာန်တံဂှ် ပ္ဍဲကဵုဍုၚ်၊ ကွာန် မ္ဒးဗလးလဝ်တဲတံဂှ် ဗ္တိုက်ဂြာတ်ကၠုၚ်ဒၟံၚ်မခတိုဟ် နကဵုက္ၜၚ်ကျာတံ အဆက်က်ဂှ် တၚ်နၚ်ဗလးတိဂမၠိုၚ် ထ္မံက်ထ္ၜးဒၟံၚ်ရ။
နကဵုကံၚ်ဇြဳပၞာန် အခိၚ်သီအဝဵုကြပ်ပေၚ်ပိသၞာံဂှ် အလုံဒေသကဝ်ကမွဲပါလုပ်ဂှ် ပ္ဍဲကဵုရးသေံသ္ကုတ်သၟဝ်ကျာ၊ သက်ကိုၚ် ကေုာံ ချေၚ်တံဂှ် ဟွံအောန်နူကဵု ၂၈ ဍုၚ်၊ ဗ္ဒိုပ်ဒပ်ဂၠိုၚ်ကဵုကၠံ ဒးဗလးလဝ်တဲရ။
အပ္ဍဲအကြာတ္ၚဲတံဏံ ကံၚ်ဇြဳပၞာန် ဒၞါဲဒးပန်ပှော်ဗ္တိုက် အပ္ဍဲပေါဲဗ္တိုက်တံ နကဵုပွန်ပရေၚ်ပၞာန်ဂှ် လၟိဟ်ကၠုၚ်စိုပ်ဗ္တိုက်လဝ် ကောန်အရာပ်တံ၊ ကွာန်အရာပ်တံဂှ် သာဂၠိုၚ်ဒၟံၚ်ရောၚ် ဂကောံမဟာမိတ်ကောဒေံပိဂကောံ လလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၉ တေံရ။
အကာဲအရာဏံဂှ် ကံၚ်ဇြဳပၞာန် ဟိုတ်နူဗ္တိုက်ဂြာတ်မခတိုဟ် ဍုၚ်၊ ကွာန် ဂကောံဒပ်ပၠန်ဂတး ကေုာံ ဂကောံရပ်လွဟ်ကောန်ဍုၚ်အရၚ်တံ မထိၚ်ဒက်လဝ်တံ နကဵုက္ၜၚ်ကျာဂှ်တုဲ လၟေၚ်ဒဒှ်ကောန်အရာပ်ဇီုကပိုက်ချိုတ်တံလေဝ် နွံဒၟံၚ်တၟာဂလိုၚ်ရ။
အတိုၚ်တၚ်လလောၚ်တြး ဂကောံကဝ်က MNDAA ဂှ်မ္ဂး နူစအခိၚ်ပရေၚ်ပၞာန် ၁၀၂၇ စထ္မံက်ရုပ်ရဴတေံ စဵုကဵုဂိတုဂျာန္နဝါရဳ ၇ ဂှ် ဟိုတ်နူပရေၚ်ဗ္တိုက်တရဴကျာ ကံၚ်ဇြဳပၞာန် အပ္ဍဲတိဍာ်ဒေသတၟေၚ် ၁ ဂှ်တုဲ ကောန်အရာပ် ၇၀ ပြၚ် ချိုတ်လဝ်တုဲ ၇၃ တၠ ကလိဂွံလဝ်ဝပ်ဂှ် ဂွံတီကေတ်ရ။
လအာတုပ်သာ်ဂှ်ကီု ပ္ဍဲကဵုကွာန်ကနာန် မၞုံဍုၚ်ခါန်ပါတ်၊ ပွိုၚ်ဍုၚ်တမူ၊ ရးသက်ကိုၚ်တံဂှ်လေဝ် ပ္ဍဲဂိတုဂျာန္နဝါရဳ ၇ အခိၚ်နူဂယးဂှ် နကဵုက္ၜၚ်ကျာ ကံၚ်ဇြဳပၞာန်တံ ဗ္တိုက်ဂြာတ်လဝ်မခတိုဟ် ကုကောန်အရာပ် မသ္ပဒၟံၚ်ဝတ်ပ္ဍဲဘာကျာ်တံဂှ်တုဲ ဇီုကပိုက်ချိုတ်တံ နွံလဝ်ရ။
အတိုၚ်စရၚ် အလဵုအသဳညဳသၟဟ်ဂကူ NUG သ္ပဒတန်လလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၉ တေံဂှ်မ္ဂး ဟိုတ်နူပရေၚ်ဗ္တိုက်ဂြာတ်ဗုမ်ဂှ်တုဲ ကောန်ၚာ်သၟတ် နူအာယုက် ၅ သၞာံ အကြာ ၁၇ သၞာံ ၉ တၠ ပါလုပ်ဂှ် ကောန်အရာပ်အပံၚ် ၁၇ တၠ ဒးချိုတ်အာလဝ်တုဲ ကလိဂွံဝပ် ၁၉ တၠ နွံလဝ်ရောၚ် ဂွံတီကေတ်ရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန် ဟိုတ်နူကလိလောန်လဝ် ပရေၚ်ဗ္တိုက်တရဴကျာတံ ၅၈၀ ဝါပြၚ်ဂှ်တုဲ ကောန်အရာပ်ဒးချိုတ်အာ ဗ္ဒါဲ ၉၀၀ ၊ စမြိုၚ်ဘာသာ ၇၆ မ ကေုာံ ဘာဗ္တောန်လိက် ၅၂ မ လီုလာ်အာလဝ်ရောၚ် သ္ဂးရ။
ပ္ဍဲကဵုပရေၚ်ဍုၚ်ကွာန်၊ ပရေၚ်ပၞာန်၊ ပရေၚ်ကလုတ်တမာန်တံဂှ် ဒပ်ကံၚ်ဇြဳပၞာန် သာကျဗြံကၠုၚ်ဗက် သၠုၚ်ပ္တိုန်ကၠုၚ် ပရေၚ်ဗ္တိုက်တရဴကျာ ကုကောန်အရာပ်တံတုဲ ပွမဒ္ဂေတ်ဗက်ရှ်ေသှ်ေ တၚ်တုပ်စိုတ်အာဇြဳယာန်၊ တၚ်သ္ဂုတ်သွာတ်ပရေၚ်ဍုၚ်ဗၟာ ကံၚ်ဇြဳဂီုကၠီုကုလသမဂ္ဂ ၂၆၆၉ တံ ဟွံမွဲရပုဟ်ဂှ် NUG ထံက်ထ္ၜးလဝ်ရ။
မွဲလ္ပာ်ဂှ်ပၠန် ညးစၞးကမ္မတဳပ္ညဳပ္ညပ်ပရေၚ်ၜိုဟ်လလမ် ကံၚ်ဇြဳပၞာန်ဂှ် ဍုၚ်၊ ကွာန် ဂကောံရပ်လွဟ်ကောန်ဍုၚ်အရၚ်တံ သီလဝ်တံဂှ် စကာလွဟ်လက်နက်တၟေၚ်ၚ်တံတုဲ ဂြာတ်အာမခတိုဟ်လၟိုန်ဏောၚ်ဂှ် ဘပဠလဝ်ရ။
အကြာပ်ဒပ်ဇၞော် ဇြေယျ မသ္ပလဝ် CDM နူကဵုဒပ်ကျာဂှ် နကဵုဂကောံ မထိၚ်ဒက်လဝ် ဍုၚ်ကွာန်တံ သွက်ဘဲတရဴကျာတံဂှ်တုဲ ဒးသိုၚ်ခၞံကဵုလဝ်ဂဒုက်တံ သၞောတ်ကဵုသတိတံ ကုကောန်အရာပ်မၞုံဒၟံၚ်ဒေသတံဏံဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“သွက်ဂွံစဵုဒၞါဲဘဲတရဴကျာဂှ် ဒးကၠောန် Alarm Systems ဒးကဵုသတိဘဲတရဴကျာတံဂှ်ဏောၚ်။ က္ၜၚ်ကျာကၠုၚ်လ္ပာ်ပါဲတှ်ေ ပ္တဝ်ကၠုၚ်က္ဍိုပ်လ္ပာ်ပါဲယျဟီုတှ်ေ ဒးကဵုသတိ အလုံဍုၚ်မွဲဂှ်ဏောၚ်။ ဂဒုက်ဗာန်ကာတံဂှ်ဟီုမ္ဂး ဇၟာပ်သ္ၚိ ဟွံၜံက်ဟွံဂွံ ဒးဖ္တိုက်ဖ္အောဝ် စန်ဒက်ဏောၚ်။ သာ်ဏံဟွံဂွံမ္ဂး ကဵုအမိၚ် By Force တုဲ ဒးကၠောန်တွဵုဏောၚ်။ ဒၞါဲညးဍုၚ်ကွာန်ဂမၠိုၚ် အာကၠုၚ်တံ၊ ပ္ဍဲကဵုဖျာတံဂှ် နူကဵုဂကောံဂမၠိုၚ် ကေတ်တာလျိုၚ်တုဲ အခိၚ်ထောံမခတိုဟ် သွက်ဂွံအောပ်မာယာယဳ ညးတာလျိုၚ်တံလေဝ် ဒးသိုၚ်ခၞံလဝ်ကဵု ဗာန်ကာတံဏောၚ်။ ညအ်ဂှ် အဓိကရဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် သွက်ဂွံစဵုဒၞါဘဲတရဴကျာတံဂှ် ယဝ်ရလွဟ်ဘပဠ ပရေၚ်ထောံမခတိုဟ်ကဵုက္ၜၚ်ကျာ ဒပ်ကံၚ်ဇြဳပၞာန်တံ နွံမ္ဂး သာခိုဟ်ဏောၚ်တုဲ တၚ်နွံပၟိက်သ္ဇိုၚ် မပ္တံကဵုဗာန်ကာတံ၊ သၞောတ်ကဵုသတိတံ ကၠောန်မှဟေၚ် စဵုဒၞါညးဍုၚ်ကွာန်တံမာန်ဏောၚ်ဂှ် ညးထံက်ထ္ၜးလဝ်ရ။
ညးမၞုံအခေါၚ်ဟီုဂး ဂကောံညးဗြဴတအာၚ် TWO ဖျေံသ္ဇိုၚ်ရးသေံသ္ကုတ်သၟဝ်ကျာဂှ်လေဝ် ကံၚ်ဇြဳပၞာန် မကျဒၟံၚ်ပၞာန် အပ္ဍဲပရေၚ်ပၞာန် ၁၀၂၇ ဏံဂှ်ဝွံ ပ္ဍဲကဵုဍုၚ်ကွာန် ဒးဒုၚ်သီလဝ်တံဂှ် ပေါဲဗ္တိုက်ဟွံမွဲမွဲသာ် ကလိလောန်ကၠုၚ် ပရေၚ်ဗ္တိုက်တရဴကျာ စွံပွန်ကုညးဍုၚ်ကွာန်ကောန်အရာပ်တံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အပ္ဍဲကာလပရေၚ်ပၞာန် ၁၀၂၇ ဏံ နူကဵုကံၚ်ဇြဳပၞာန် ပကီုပရာပ်ဂှ် ပ္ဍဲကဵုပွိုၚ်ဍုၚ် ဍေံတံကျအာ ဂကောံရပ်လွဟ်ကောန်ဍုၚ်အရၚ်တံ မထိၚ်ဒဝ်လဝ်တံဂှ်လေဝ် ကလေၚ်ကၠောန်သ္ပ ဗ္တိုက်ဒၟံၚ်တရဴကျာတံ မွဲဏှမွဲဏှရ။ အဓိက လ္ပာ်နမ္မတူ၊ နသာန်တံဂှ်ဟီုမ္ဂး ပေါဲဗ္တိုက်ဟွံဒှ်မွဲသာ် နကဵုတၚ်ရန်တၟံနွံနွံ သုၚ်စောဲပရေၚ်ဗ္တိုက်တရဴကျာ အပ္ဍဲကွာန်တံတုဲ ပ္တဝ်က္ဍိုပ်ပန်ဒၟံၚ် ကောန်အရာပ်တံလေဝ် နွံဒၟံၚ်ရ” သာ်ဝွံ သ္ဂးရ။
သ္အာၚ်နူဂှ်ပၠန် လွဟ်ဇၞော် မပန်ပှော်နၚ် နူကဵုဗ္ဒိုပ်ဒပ်ဖျေံသ္ဇိုၚ် ဒပ်ကံၚ်ဇြဳပၞာန်တံဂှ်ဝွံ ဒၞါဲပေါဲဗ္တိုက်က္တဵုဒှ်တံဂှ် ဟွံစိုပ်မွဲသာ် ဒတုံဗ္တိုဟ်ထ္ကးအာ အပ္ဍဲဍုၚ်ကွာန်တံနွံတုဲ ဒးသ္ၚိကောန်အရာပ်တံတုဲ ဗ္တိုဟ်ထ္ကးအာတံလေဝ် နွံဒၟံၚ်တၟာဂလိုၚ်ဂှ် ညးဟီုရ။
အတိုၚ်စၟတ်သမ္တီ TWO ဂှ်မ္ဂး အပ္ဍဲပရေၚ်ပၞာန် ၁၀၂၇ ပွိုၚ် ၂ ဂိတုဂှ် ပ္ဍဲရးသေံသ္ကုတ်သၟဝ်ကျာဂှ် ဟိုတ်နူပရေၚ်ဗ္တိုက်တရဴကျာ ကေုာံ ပရေၚ်ပန်ပှော်လွဟ်ဇၞော်တံတုဲ စမြိုၚ်ဆေၚ်စပ်ကဵုညးဍုၚ်ကွာန်ဂမၠိုၚ် ၄၆၀ ပြၚ် ဒးလီုလာ်အာလဝ်သၟးဟွံက ကောန်အရာပ် ၁၂၀ ပြၚ်ချိုတ်တုဲ ဗ္ဒါဲ ၂၄၀ တၠ ဇီုကပိုက်ကလိဂွံလဝ်ဝပ်ဂှ် ထ္မံက်ထ္ၜးလဝ်ရ။
NUG ဂှ်တှ်ေ ပ္ဍဲကဵုဍုၚ်မသီဂွံလဝ်တံဂှ် သွက်ဂွံၜံက်ခါဲဥမၚ် ဂွံစဵုဒၞါဘဲတရဴကျာတံကဵု သၞောတ်ဒစးဒုၚ်ကဵုသတိတံဂှ် ဂကောံအုပ်ဓုပ်၊ ဂကောံစဵုဒၞါတံ စၞောန်ထ္ၜးဒၟံၚ်ကဵုနွံဂှ် ညးမၞုံအခေါၚ်ဟီုဂး ရုၚ်သမ္မတ ဥူကျဝ်ဇြဝ် သှ်ကဵုလဝ် သြၚ်လောန်တိုၚ်(မ်) ပ္ဍဲဂိတုဒဳဇြေမ်ဗာ ၄ တုဲကၠုၚ်တေံရ။
လအာတုပ်သာ်ဂှ်ကီု ပ္ဍဲတွဵုရးချေၚ်ဂှ်လေဝ် သွက်ဘဲတရဴကျာတံဂှ် မ္ၚးနူကဵုပရေၚ်ဆက်စၠောံပရိုၚ်တံဂှ် ဂၠံၚ်ဍာန်သ္ဂောံစဵုဒၞါ ကောန်အရာပ်မၞုံအပ္ဍဲဒေသတံ နူကဵုဘဲတရဴကျာတံဂှ် ကဵုလဝ်သမ္တီ အရာမဒးကၠောန်ထေက်တံရောၚ်ဂှ် ညးမၞုံအခေါၚ်ဟီုဂး CNF သလိုၚ်ထက်နဳ ဟီုဂးလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
နကဵု MNDAA မသီဂွံလဝ် အလုံဒေသကဝ်ကမွဲဂှ် စပ်ကဵုအစဳဇန် သ္ဂောံစဵုဒၞါ ကောန်အရာပ်မၞုံအပ္ဍဲဒေသတံ နူကဵုဘဲတရဴကျာဂှ်တုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံလဝ် ညးမၞုံအခေါၚ်ဟီုဂး လဳကျာဝေန်ကီုလေဝ် ကလေၚ်လဝ်ပရိုၚ်ဂှ် ဟွံမွဲရ။
သုတေသဳပရေၚ်ပၞာန်လ္ၚဵုတံဂှ် နကဵုဂကောံပၠန်ဂတးပံၚ်ကောံဂမၠိုၚ် ပါလုပ်သီုကဵုဂကောံရပ်လွဟ်ကောန်ဍုၚ်အရၚ်တံ သွက်ဂွံထိၚ်ဒက်အာ ဍုၚ်၊ ကွာန် မသီဂွံလဝ်တံ ဍာ်ဇမၠိၚ်မာန် လွဟ်လက်နက်ပၞာန် သ္ဂောံစဵုဒၞါဘဲတရဴကျာတံဂှ် နွံပၟိက်ရောၚ် ထံက်ထ္ၜးလဝ်အိုတ်ရ။
ပရိုၚ်−သြၚ်လောန်တိုၚ်(မ်)
ဗီု−The Kokang