တၞၚ်သဳ၊ ဂျာန္နဝါရဳ ၁၂
ပ္ဍဲရးတၞၚ်သဳ အပ္ဍဲသၞာံ ၂၀၂၃ ဒပ်ပၞာန်သီလဝ်အဝဵု အပ္ဍဲပွိုၚ်မွဲသၞာံဂှ် ညးဍုၚ်ကွာန်ကောန်အရာပ် ဟွံအောန်နူကဵု ၂၆၇ တၠ ဒးဒုၚ်ပြိုက်ဂစိုတ်လဝ်ရောၚ် ဂွံတီကေတ် အတိုၚ်တၚ်လလောၚ်တြး ဂကောံသုတေသန FE5 Tanintharyi ရ။
ကောန်အရာပ်ချိုတ်အာတံဂှ်ဝွံ ဒပ်ကံၚ်ဇြဳပၞာန် ကေုာံ ဂကောံပျူသဝ်ထဳတံ ဂစိုတ်လဝ်ဂှ် ၃၆ တၟံကၠံ၊ ဂကောံဒပ်စဵုဒၞါညးဍုၚ်ကွာန် PDF တံ ဂစိုတ်လဝ်ဂှ် ၂၇ တၟံကၠံ၊ ဂကောံရပ်လွဟ်ဟွံတီယၟုတံ ဂစိုတ်လဝ်ဂှ် ၃၇ တၟံကၠံ နွံလဝ်ရောၚ် သ္ဂးလဝ်ရ။
ပ္ဍဲကဵုလၟေၚ်ဒဒှ်ကောန်အရာပ်ချိုတ်အာ နူကဵုကောန်ဂကောံဒပ်ကံၚ်ဇြဳပၞာန်တံ မကလိလောန်ဂှ် အခိၚ်ထ္ပက်ကၠုၚ်ကရောၚ်ပၞာန် ပ္ဍဲကွာန်တံဂှ် ရပ်ဒက်ဂစိုတ်လဝ် ညးဒေသတံကီု၊ ပလေံလဝ်ဇွတံကီု နွံလဝ်တုဲ ဟိုတ်နူပရေၚ်ပန်ပှော်လွဟ်ဇၞော်တံတုဲ ဒးချိုတ်အာတံလေဝ် နွံလဝ်ရ။
သ္အာၚ်နူဂှ်ပၠန် ဂကောံသၟဝ်တဲကံၚ်ဇြဳပၞာန်ဂမၠိုၚ် ပျူသဝ်ထဳ၊ (သွေးသောက်) ၊ (စွန်ရဲ) တံဂှ်လေဝ် စွံပွန်ဂစိုတ်လဝ် ညးသၟတ်ကတိုၚ်ကၟဟ်တံ၊ ဂြောဝ်ဂတာ ကောန်ဂကောံဒပ် PDF တံ ကေုာံ ကောန်ဗော် NLD တံလေဝ် နွံလဝ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
အတိုၚ်တၚ်နၚ် ဂကောံဒပ်စဵုဒၞါညးဍုၚ်ကွာန်ဒေသတံ လလောၚ်ပ္တိတ်လဝ် ဗွဲမလုပ်သၞောဝ်ဂှ်မ္ဂး ပြိုက်ဂစိုတ်လဝ် ညးကဵုပရိုၚ် ဒပ်ပၞာန်၊ (သွေးသောက်) ၊ ပျူသဝ်ထဳတံ ပါလုပ်သီုကဵုသ္ကိုပ်အုပ်ဓုပ် ကေုာံ သၞာဲဒဴလ္ၚဵုတံရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပ္ဍဲကဵုလၟေၚ်ဒဒှ်လ္ၚဵုတံဂှ် မ္ၚးနူကဵုဗၠေတ်မှာတုဲ ဒးဒုၚ်ပန်ဂစိုတ်လဝ်တံ၊ ဇီုကပိုက်ချိုတ်အာလဝ် သီုကဵုကောန်ဇာတ်ဂြောဝ်ဂတာတံဂှ် ညးဍုၚ်ကွာန်အာတရဴလ္ၚဵုတံဂှ်လေဝ် ဟိုတ်နူပန်ပှော်ဒးဗၠေတ်မှာအာတုဲ ဒးဒုၚ်ပန်ဂစိုတ်လဝ်ဂှ်ရ ချိုတ်အာလဝ်တံ နွံလဝ်ဂှ် FE5 Tanintharyi သ္ဂးလဝ်ရ။
အတိုၚ်လိက်ဒုၚ်စဳရေၚ် ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPP တံ လလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၁၀ တေံဂှ်မ္ဂး အလုံမွဲကၟိန်ဍုၚ် အပ္ဍဲကာလသီအဝဵုဏံ ဟိုတ်နူကံၚ်ဇြဳပၞာန်တုဲ ကောန်အရာပ် ၄၃၀၀ ပြၚ် ချိုတ်အာလဝ်ရောၚ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Twitter