ကျာ်ထဝ်၊ ဂျာန္နဝါရဳ ၂၁
သ္ကိုပ်အုပ်ဓုပ်တြေံ ကွာန်မုခ်ပြေၚ် (မုပ္ပလၚ်) ၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန် ဥူတေန်အေဝွံ ဂိတုဂျာန္နဝါရဳ ၁၉ အခိၚ်ဇိုၚ်သဝ်တ္ၚဲ ၜိုတ် ၃ နာဍဳ ဟိုတ်နူဒးဒုၚ်ပန်ဂစိုတ်လဝ်ကဵုသေနာတ်တုဲ ချိုတ်အာလဝ်ဂှ် ဂွံတီကေတ် ဇရေၚ်ညးဒေသတံရ။
သ္ကိုပ်အုပ်ဓုပ်တြေံ ဥူတေန်အေဝွံ သွက်ဂွံအာဒုၚ် ကောန်စဴညးပ္ဍဲဘာ အခိၚ်တိတ်နူသ္ၚိ ကဵုကွဳလိုန်ဓာတ်ဂှ် ဂကောံဇြဟတ်ပၠန်ဂတးကျာ်ထဝ် KRF ပန်ပသောၚ်လဝ်ရ။
ဟိုတ်နူဒးဒုၚ်ပန်ဂစိုတ်လဝ်ကဵုသေနာတ်ဂှ်တုဲ ဥူတေန်အေဝွံ ကလိဂွံလဝ်ဝပ်ပ္ဍဲဒူစး ၄ လစုတ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ်ရ။
ဥူတေန်အေ မဒှ်ကောန်ပၞာန်ပျဳတုသေတ် ကံၚ်ဇြဳပၞာန်ဂှ်ဝွံ သွက်ဂွံဒက်ပ္တန်ပျဳတုသေတ် ဟိုတ်နူဗက်စန်ဒက်ဒၟံၚ်တံ နွံဒၟံၚ်ဂှ်တုဲ ပန်ပှော်ပသောၚ်လဝ် နဒဒှ်ပွန်ပရေၚ်ပၞာန်ဂှ် ကောန်ဂကောံဒပ်စဵုဒၞါဒေသမွဲတၠ ဟီုရ။
ဂကောံဇြဟတ်ပၠန်ဂတးကျာ်ထဝ် KRF ဂှ် ဥူတေန်အေဝွံ ဂၠိုက်ဂၠါဲပရိုၚ် PDF တံတုဲ ကဵုဒၟံၚ်ပရိုၚ်ဇရေၚ်ကံၚ်ဇြဳပၞာန်တံသၟးဟွံက ဟိုတ်နူကဵုဒၟံၚ်ဒဒိုက် ကုညးဍုၚ်ကွာန်တံဂှ်ရ ပန်ပှော်ပသောၚ်ထောံလဝ်ဂှ် လလောၚ်ပ္တိတ်လဝ်ရ။
နူကဵုဒေသပၞာန်သ္ကုတ်သၠုၚ်ကျာ NUG ဒေသပၞာန်ပါ် စၟတ် (၂) ဂှ်လေဝ် ကုညးမပါလုပ်ဒၟံၚ် ပ္ဍဲကဵုကမၠောန်ဒက်ပ္တန်ပျဳတုသေတ် ကဵုဇြဟတ်ဂရိုဟ် ကုညးဍုၚ်ကွာန် အတိုၚ်ပၟိက်ကံၚ်ဇြဳပၞာန်တံသီုဖအိုတ်ဂှ် ကေတ်အာအရေဝ် ဗွဲမသ္ကာတ်မြဟ်ဏောၚ်ဂှ် လလောၚ်ပ္တိတ်ကဵုလဝ်သတိ ပ္ဍဲဂိတုဂျာန္နဝါရဳ ၁၈ တေံရ။
တုဲကၠုၚ်ပ္ဍဲဂိတုဂျာန္နဝါရဳ ၁၂ တေံဂှ်လေဝ် ဂကောံကံၚ်ဇြဳပၞာန် ပၟၚ်တိုက်သြန်အေန်ဝ လ္တူဂၠံၚ်ဗိုလ်ချုပ်၊ အရာပ်ကဂဝ် ဍုၚ်ကျာ်ထဝ် ဒးဒုၚ်ဗ္တိုက်တုဲ ပၞာန်ပျဳတုသေတ်မွဲတၠ ချိုတ်တုဲ ညးဍုၚ်ကွာန် ၁ တၠ ကလိဂွံလဝ်ဝပ်ဂှ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−ချာန်နေဝ်တြးဝါဒ ကံၚ်ဇြဳပၞာန်