ရေဝ်၊ ဂျာန္နဝါရဳ ၂၀
ဒပ်ကံၚ်ဇြဳပၞာန် ပန်ပှော်စုတ်လွဟ်ဇၞော် အပ္ဍဲကွာန်ကာန်နဳ ပွိုၚ်ဍုၚ်ရေဝ် တိဍာ်ထိၚ်ဒဝ်ဗော်ဍုၚ်မန်တၟိ မဒှ်ဂကောံရပ်လွဟ်ကောန်ဍုၚ်အရၚ်မန်ဝှ်ကြံၚ်ဂှ်တုဲ ဒတုံဗ္တိုဟ်ထ္ကးအာလဝ် အပ္ဍဲကၠအ်သတ်တံဂှ် ဂွံတီကေတ် ဇရေၚ်ညးဒေသတံရ။
နူကဵုဒပ်ခမရ ကံၚ်ဇြဳပၞာန် စၟတ် (၅၉၁) ဖျေံသ္ဇိုၚ်ကွာန်ဘာ ပွိုၚ်ဍုၚ်ရေဝ်ဂှ် ပ္ဍဲဂိတုဂျာန္နဝါရဳ ၁၈ အခိၚ်ဗ္တံ ၜိုတ် ၁၀ နာဍဳဂှ် ပန်စုတ်လဝ်လွဟ်ဇၞော် ၂ မ ပွဳပွူဗ္ဒါဲကွာန်ကာန်နဳ ဒၞါဲညးဍုၚ်ကွာန်ကောန်အရာပ်တံ မမံၚ်တန်တဴဒၟံၚ်တံဂှ်ရ။
မကမ်လွဟ်ဇၞော် ၂ မ ဒပ်ကံၚ်ဇြဳပၞာန် ပန်ပှော်စုတ်လဝ်ဂှ်ဝွံ ဟိုတ်နူဒတုံဗ္တိုဟ်ထ္ကးအာလဝ် အပ္ဍဲကၠအ်သတ် မၞုံကွာန်ကာန်နဳတံဂှ်တုဲ တၞံသတ်ဂမၠိုၚ် ဇီုကပိုက်လီုလာ်အာလဝ်ကီုလေဝ် မၞိဟ်ဂွံဝပ်ဇီုကပိုက်တံ ဟွံမွဲပုဟ်ဂှ် ညးဒေသမွဲတၠ ဟီုရ။
ပေါဲဗ္တိုက်ဟွံမွဲမွဲသာ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ညးဍုၚ်ကွာန်ဒေသတံ ပရေၚ်ဒှ်ဓဝိၚ်တံ သၠုၚ်တိုန်ဒၟံၚ်တုဲ သွက်ဂွံစဵုဒၞါကဵုတံဂှ် အာတ်မိက်ဒၟံၚ်ဗော်ဍုၚ်မန်တၟိ နွံဒၟံၚ်ဂှ် ဂွံတီကေတ်ရ။
စပ်ကဵုပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် ပ္ဍဲကွာန်ကာန်နဳဂှ်တုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံလဝ် နာဲဗညာလဴ ကေုာံ နာဲအံၚ်မ္ၚဵု ကေၚ်ကာဗဟဵုဗော်ဍုၚ်မန်တၟိတံဂှ် နကဵုဖုၚ်ကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။
ဗော်ဍုၚ်မန်တၟိ မကၠောန်သ္ပလဝ် ပရေၚ်သဳကၠဳၜိုဟ်လလမ် ကုကံၚ်ဇြဳပၞာန် ဟွံအောန်နူကဵု ၇ ဝါဂှ်ဝွံ အပ္ဍဲတိဍာ်ထိၚ်ဒဝ်ဗော်ဂှ် ပ္ဍဲသၞာံတုဲကၠုၚ်တေံ အဃောဆဵုဂဗလဝ်ကဵု က္ဍိုပ်သ္ကိုပ်ပၞာန်ဂှ် အာတ်မိက်လဝ် သွက်ဂွံထိၚ်ဒက်ကဵု ပရေၚ်ပန်ပှော်လွဟ်ဇၞော် နူကဵုတမ်ဒပ်ဖျေံသ္ဇိုၚ်ကံၚ်ဇြဳပၞာန်တံဂှ်ရ။
သ္အာၚ်နူဂှ်ပၠန် တုဲကၠုၚ်ပ္ဍဲဂိတုဂျောန်တေံဂှ်လေဝ် ဟိုတ်နူပရေၚ်ပန်ပှော်လွဟ်ဇၞော် ဒပ်ပၞာန် အပ္ဍဲကွာန်ဝၚ်တၟအ် ပွိုၚ်ဍုၚ်ရေဝ်ဂှ်တုဲ မိထိုဲထိုဲကျဳ ညးဒေသမန် စပ်ကဵုဒးချိုတ်အာဂှ်တုဲ သွက်ဂွံကေတ်ကဵုတာလျိုၚ်ဂှ် ကေၚ်အာတ်မိက်လဝ် ဇရေၚ်အလဵုအသဳတွဵုရးဍုၚ်မန် ကံၚ်ဇြဳပၞာန်ခါန်ကၞက်လဝ်ဂှ်ကဵု ဌာန်ဂအုပ်ပၞာန်ရးအဂၞဲရ။
နကဵုဗော်ဍုၚ်မန်တၟိ မကေမ်ၛာပ်လဝ် မူဝါဒမံၚ်အကြာ ကေုာံ ဂၠံၚ်တရဴသဳကၠဳဆဵုဂဗဂှ် ဟိုတ်နူစဵုဒၞါကဵု လ္တူညးဍုၚ်ကွာန်မန်တံ ဟွံမွဲဂှ်ရ ဒးဆေၚ်ဒၟံၚ်မုက်ကဵု ပရေၚ်ပါ်ပါဲ ညးဍုၚ်ကွာန်ဒေသဂမၠိုၚ် သီုကဵုခမဳသၚ်မန်တံရ။
အတိုၚ်တၚ်လလောၚ်တြး နူကဵုသြၚ်လောန်တိုၚ်(မ်) ၜိုတ်က္ဍစိုပ်ပ္ကောံပ္ကေဝ်ဂွံလဝ်ဂှ်မ္ဂး အပ္ဍဲကာလသီအဝဵုဏံ ဟိုတ်နူပရေၚ်ဗ္တိုက်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ညးဍုၚ်ကွာန်ကောန်အရာပ် နူကဵုတိဍာ်ထိၚ်ဒဝ်ဗော်ဍုၚ်မန်တၟိ ဟွံအောန်နူကဵု ၁၀ တၠ ချိုတ်လဝ်တုဲ ဗ္ဒါဲ ၂၀ တၠ ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−CJ