ဝါယှေန်တာန်၊ ဂျာန္နဝါရဳ ၂၃
ပ္ဍဲဍုၚ်အမေရိကာန် ဟိုတ်နူလဗိုတ်ကျာ ရာသဳၜိုဟ်ဂံက်ဏံတုဲ အလုံဍုၚ်မွဲ မၞိဟ်ဗ္ဒါဲ ၉၀ ချိုတ်အာတုဲ ဒးလလောၚ်တြးလဝ် အကာဲအရာကာတၟေၚ်ဂှ် ဂွံတီကေတ်ရ။
ဟိုတ်နူလဗိုတ်ကျာရာသဳၜိုဟ်ဂံက်ဏံတုဲ ပ္ဍဲကဵုတွဵုရးတာန်နက်သဳဂှ် ၂၅ တၠ၊ ပ္ဍဲတွဵုရးအဝ်ရဳဂေါန်ဂှ် ၁၆ တၠ ချိုတ်အာလဝ်တုဲ အလုံဍုၚ်မွဲ ဒေသဗွဲမဂၠိုၚ်ဂှ်လေဝ် ပၟတ်ဓာတ်လလဳပိုတ်ပၠိုတ်ဒၟံၚ်ဂှ် ဂွံတီကေတ်ရ။
ဟိုတ်နူအကာဲအရာရာသဳဥတု သတ္တာဟလောန်ကၠုၚ်တေံဂှ်တုဲ မၞိဟ်ဒးချိုတ်အာ စဵုကဵု ၈၉ တၠ နွံဂှ် ထ္မံက်ထ္ၜးလဝ် ပ္ဍဲကဵုဌာန်ပရိုၚ် CBS တုဲ ဗ္ၜတ်ဂမ္တဴမစိုပ်ဒၟံၚ် ဗ္ၜတ်ဍာ်ဂံက်ဂှ်လေဝ် ဆက်က္တဵုဒှ်အာ စဵုကဵုကဝက်သတ္တာဟဏံမာန်ဂှ် သ္ဂးလဝ်ရ။
ပ္ဍဲတာန်နက်သဳ ကေုာံ အဝ်ရဳဂေါန်ဂှ် မၞိဟ်ချိုတ်ဂျိုၚ် က္တဵုဒှ်လဝ်ဂၠိုၚ်အိုတ်တုဲ တွဵုရးအဳလဳနွိုက်၊ ပါန်သေဝ်ဗေနဳယျာ၊ မေဿပဳ၊ ဝါယှေန်တာန်၊ ကာန်တက်ကဳ၊ ဝေန်ကောန်သေန်၊ နျူယျံက် ကေုာံ တွဵုရးနျူဂျာသဳတံသၟးဟွံက ဒေသတၞဟ်ဟ်တံဂှ်လေဝ် မၞိဟ်ချိုတ်လဝ်တံ နွံလဝ်ရ။
ပ္ဍဲကဵုလၟေၚ်ဒဒှ် မက္တဵုဒှ်လဝ် ပ္ဍဲဍုၚ်ပပ်လာန် တွဵုရးအဝ်ရဳဂေါန် ပ္ဍဲဂိတုဂျာန္နဝါရဳ ၁၇ ဂှ် ဟိုတ်နူအသိၚ်ကျာပိုက် သ္ကာတ်တုဲ ဇုက်ဓာတ်ပိုတ်စှ်ေ လ္တူကွဳစက်မွဲဖ္ဍိုက်တုဲ မၞိဟ်ဍိုက်ပါဗက်ကၠုၚ် ၃ တၠ ဓတ်ဓာတ်လလဳဗက်တုဲ ချိုတ်အာလဝ်ကီုလေဝ် ကောန်ၚာ်သၟတ် ပါဗက်ကၠုၚ်လ္တူကွဳစက်ဂှ်မွဲတၠ လမျီုဂျိုၚ်သှ်ေတဴဂှ် ဂွံတီကေတ်ရ။
ဒၟါနူအကာဲအရာရာသဳဥတုသ္ကာတ်လောန်ဒၟံၚ်တုဲ ပ္ဍဲကဵုမၞိဟ်ချိုတ်အာဂမၠိုၚ် မၞိဟ်သ္ၚိဌာန်ဟွံမွဲတံလေဝ် ပါလုပ်ဒၟံၚ်တုဲ ပၠံၚ်ပရအ်ဍာ်တံလေဝ် လီုလာ်အာဂှ်ရ ပ္ဍဲကဵုဒေသလ္ၚဵုတံဂှ် ဍာ်ပိုတ်သ္ကုတ်အာတံလေဝ် နွံဒၟံၚ်ရ။
အခိၚ်လၟုဟ် သၟိၚ်တၠအဝဵုဂမၠိုၚ်ဝွံ ပၟတ်ဓာတ်လလဳပိုတ်သ္ကုတ်ဒၟံၚ်ဗွဲမဂၠိုၚ်ဂှ် ကလေၚ်ပလေဝ်ပလေတ်လဝ်ကီုလေဝ် စဵုကဵုဂိတုဂျာန္နဝါရဳ ၂၁ ဂှ် ပ္ဍဲကဵုအဝ်ရဳဂေါန် မၞိဟ် ၁ ဠက်၊ ပ္ဍဲကဵုကာရိုဝ်လိုၚ်နာသၟဝ်ကျာဂှ် မၞိဟ် ၈ လ္ၚီ၊ ပ္ဍဲကာလဳဝှဝ်နဳယျာ မၞိဟ် ၇ လ္ၚီ ကေုာံ ပ္ဍဲကာန်တက်သဳဂှ် မၞိဟ် ၄၃၀၀ ပြၚ် ဟွံဂွံပၟတ်ဏီပုဟ်ဂှ် ဂွံတီကေတ်ရ။
ဗ္ၜတ်ဂမ္တဴစှ်ေဂှ် ဆက်က္တဵုဒှ်ဒၟံၚ်ဏီဏောၚ်တုဲ ခြာဟွံလအ်ဏံ ကျာဂမ္တဴလုပ်စိုပ်တုဲ ဗြဲဂူမာန်ဂှ်ရ ပ္ဍဲကဵုသ္ကုတ်ဗၟံက်လ္ဒေါဝ်ကၟိန်ဍုၚ် ကေုာံ ဗွဲဒိုဟ်ဨသာန်တံဂှ် ဍာ်ဇၞော်ဍာ်ကလိုပ် က္တဵုဒှ်မာန်ရောၚ် ဌာနစမ်ၜတ်အကာဲအရာဗြဲကျာ လလောၚ်ပ္တိတ်ကဵုလဝ်သတိရ။
Ref: BBC