လာန်ဒါန်၊ ဂျာန္နဝါရဳ ၂၁
နဒဒှ်အလန်ကိုပ်ကၠာအိုတ် ဒပ်ပၞာန်ဗျိတိၚ် ပန်ပှော်စုတ် ပွန်မှဲအကးမွဲ နကဵုလွဟ်လက်နက်လေသာ ဇြဟတ်သၠုၚ်ၚ်တုဲ စမ်ၜတ်ဂွံလဝ် ဗွဲမအံၚ်ဇၞးဂှ် ဂွံတီကေတ်ရ။
ပရေၚ်စမ်ၜတ်လွဟ်လက်နက်လေသာ ကဵုလဝ်ယၟုပၟတ်နာ် အံၚ်ဇၞးတုဲ ပ္ဍဲကဵုဒၞါဲကမ်လှောဝ် သုၚ်စောဲသွက်ဂွံပန်ဖျေံ ပွန်ညံၚ်ရဴဒရုၚ်တံဂှ် ညံၚ်ဂွံသုၚ်စောဲ လွဟ်လက်နက်ၚုဟ်မးသက်သာတံမာန် ဒပ်ပၞာန်ဗျိတိၚ် စၟဳစလဝ်ရ။
လွဟ်လက်နက်လေသာဏံဝွံ သြန်တၚ်္ကာမွဲခတှ်ေ ၁ သတာလေန်ပံၚ်ဂှ် ပန်ဏာ နူကဵုဇမ္ၚောဲ ၁ ကဳလောမဳတာမာန်ဂှ် ဌာနဝန်ဇၞော်ကာစဵုဒၞါ ဟီုလဝ်ရ။
ဟိုတ်နူစမ်ၜတ်ပန်ပှော်လဝ် ပ္ဍဲသကတ်တလာန် အံၚ်ဇၞးလဝ်တုဲ သွက်ဂွံသုၚ်စောဲ နဲပညာလွဟ်လက်နက်ဏံမာန် တတ်ကၠောံကၠုၚ် ကဆံၚ်ဇၞော်ဇၞော်မွဲမာန်ယျဂှ် ဌာနဝန်ဇၞော်ကာစဵုဒၞါ သ္ဂးလဝ်ရ။
ဝန်ဇၞော်ကာစဵုဒၞါဂရာန်ယှာတ်ဂှ် ဟိုတ်နူနဲပညာဏံတုဲ ဒဒှ်မဒးဗ္ဒဗ္ဒါဲဒၟံၚ် လ္တူလွဟ်လက်နက်ၚုဟ်မးဇၞော်ဇၞော်တံဂှ် ဖအောန်ဖျေံမာန်ဏောၚ်တုဲ အန္တရာယ်လီုလာ်ဇီုကပိုက် ဗ္ဒါဲပွန်တံဂှ်လေဝ် ဖအောန်ဖျေံမာန်ဏောၚ်ဂှ် ဟီုလဝ်ရ။
ဒပ်ပၞာန်ဗျိတိၚ်တံကဵု ဒပ်ဍာ်ဨကရာဇ်တံဂှ် သွက်ဂွံစဵုဒၞါ ဘဲတရဴကျာအနာဂတ်တုဲ သုၚ်စောဲအာနဲပညာဏံဏောၚ်ဂှ် ဌာနဝန်ဇၞော်ကာစဵုဒၞါ ဟီုလဝ်ဏီရ။
လွဟ်လက်နက်လေသာတံဏံဝွံ ၜိုန်ရထေၚ်လဝ် လွဟ်လက်နက် ပ္ဍဲရုပ်ဒမျိုၚ်ပုံအဂီုသိပ္ပံတံဂှ်ကီုလေဝ် ပ္ဍဲကဵုက္ၜၚ်ပလီု ဒပ်ဍာ်အမေရိကာန်တံဂှ် စုတ်လဝ်လွဟ်လက်နက်လေသာတံဏံ တုဲယျဂှ် ဂွံတီကေတ်ရ။
က္ၜၚ်ပၞာန် အမေရိကာန်တံဝွံ သွက်ဂွံဖအိုတ်ကၠေံ ဒရုၚ် ကေုာံ ကမ်လှောဝ်ဂကောံဟူတဳတံဂှ် ဟွံသုၚ်စောဲလွဟ်လက်နက်လေသာတံဏီတုဲ သုၚ်စောဒၟံၚ်ကမ်လှောဝ်တံဖိုဟ်ဂှ် ဂွံတီကေတ်ရ။
ကမ်လှောဝ်ဂမၠိုၚ်ဝွံ စၞးဒရုၚ် ဒးလီုလာ်အာ ဒၟါနူဍေံတံဂှ် ဟိုတ်နူခရိတ်အိုတ်ဇၞော်မာန်တုဲ ခရိတ်ကၠောန်ပ္တိတ် ကမ်လှောဝ်လ္ၚဵုတံဂှ်ဝွံ ဂၠိုၚ်ကဵုပြကောဋိကိုဋ်သတာလေန်ပံၚ် နွံမာန်ဂှ် ဂွံတီကေတ်ရ။
ခရိတ်အိုတ် ပန်ပှော်လွဟ်လက်နက်ပၟတ်နာ် ၁၀ မိနေတ်ဂှ်ဝွံ ၜိုတ်ခရိတ်အိုတ် သုၚ်စောဲကိရိယာကဵုဂမ္တဴဓမ္မတာ မွဲနာဍဳရနွံတုဲ ပန်မွဲလစုတ်မ္ဂး ခရိတ်အိုတ် ၜိုတ် ၁၀ ပံၚ် ဟွံပေၚ်ပုဟ်ဂှ် ဌာနဝန်ဇၞော်ကာစဵုဒၞါဗျိတိၚ် ဟီုရ။
သၞောတ်လွဟ်လက်နက်ဏံဝွံ ထပိုတ်ဝးပ္ကဝ်ကၠေံ ပွန်ဂမၠိုၚ် နကဵုပယျးလျးတုဲ ပန်ပှော် နကဵုဒမြိပ်ပယျးလျးတံမာန်ဂှ် ဂွံတီကေတ်တုဲ စၞးဌာနဝန်ဇၞော်ကာစဵုဒၞါဂှ် ပရေၚ်စမ်ၜတ် သိပ္ပံ ကေုာံ နဲပညာ Dstl ပံၚ်တောဲကၠောန်ပ္တိတ်လဝ် ကုမဟာမိတ်တၞဟ်သ္အာၚ်ရ။
သွက်ဂွံခၞံဗဒှ် သၞောတ်လွဟ်လက်နက်ဏံဂှ် ဌာနဝန်ဇၞော်ကာစဵုဒၞါ ကေုာံ ဂကောံပ္ဍဲကဵုသွာၚ်ကမၠောန်ဂမၠိုၚ် ဓလိုက်လဝ်တမ်ရိုဟ် ၁၀၀ ပြကောဋိကိုဋ်ပံၚ်ရ။
Ref: BBC