ရေဝ်၊ ဂျာန္နဝါရဳ ၂၄
ပ္ဍဲတွဵုရးဍုၚ်မန်၊ ပွိုၚ်ဍုၚ်ရေဝ် ဒပ်ကံၚ်ဇြဳပၞာန် ကၠုၚ်စိုပ်ရပ်ဒက်လဝ် ညးဒေသ ၅ တၠ ပါလုပ်သီုကဵုတၠဆေၚ်စသုၚ်မွဲတၠ နကဵုတၚ်စောဲစပ် ထံက်ပၚ်ဒၟံၚ်သြန် ဇရေၚ် PDF ဂကောံဒပ်စဵုဒၞါညးဍုၚ်ကွာန်တံဂှ် ဂွံတီကေတ် ဇရေၚ်ညးဒေသတံရ။
တုဲကၠုၚ် ပ္ဍဲဂိတုဂျာန္နဝါရဳ ၂၂ အခိၚ်ဇိုၚ်သဝ်တ္ၚဲ ၜိုတ် ၅ နာဍဳ ဒပ်ကံၚ်ဇြဳပၞာန်တံ လုပ်စိုပ်ရပ်ဒက်လဝ် ကိုဝ်နေပိုၚ် တၠဆေၚ်စသုၚ် ယှိုဲဒံၚ်ကျဳ တၞုၚ်ကွာန်အၜဝ် ကေုာံ ကောန်ရဲညး ၂ တၠ နကဵုဇြဟတ်ဗွဲမဂၠိုၚ်ဂၠေၚ်ရ။
ဗွဲကြဴဂှ် အခိၚ်ဗ္တံဗၞတ် ၇ နာဍဳဂှ်လေဝ် ဂကောံဒပ်ပံၚ်ကောံကံၚ်ဇြဳပၞာန်တံဝွံ ကြဴနူလုပ်စိုပ်ကၠုၚ် အပ္ဍဲကွာန်ပါၚ်ၜဳတုဲဂှ် ထပ်ရပ်ဒက်ဏာလဝ် သမ္ဘာတၠသ္ၚိ ၂ တၠ ဒၟံၚ်ကွာန်ဂှ်ရ။
ကံၚ်ဇြဳပၞာန်ဂှ် ညးဒေသ ၅ တၠ ပါလုပ်သီုကဵု ကိုဝ်နေပိုၚ်ဂှ်ဝွံ ရပ်ဒက်ဏာလဝ် နကဵုတၚ်စောဲစပ် ဆက်စၠောံကဵု PDF တုဲ ထံက်ပၚ်ဒၟံၚ်သြန်တံ နွံဂှ် ဂွံတီကေတ်ရ။
ပ္ဍဲကဵုကွာန်အၜဝ် ကေုာံ ကွာန်ပါၚ်ၜဳတံဂှ် ဒပ်ကံၚ်ဇြဳပၞာန် ကၠုၚ်စိုပ်ရပ်ဒက်ဏာလဝ် နကဵုဇြဟတ်ဒပ်ဗွဲမဂၠိုၚ်ဂၠေၚ်တုဲ ပရေၚ်ဒှ်ဓဝိၚ်တံ သၠုၚ်တိုန်ဒၟံၚ်ဂှ် ညးဒေသတံ ဟီုဂးလဝ်ရ။
ညးဒေသ ၅ တၠ ဒးဒုၚ်ရပ်ဒက်လဝ်တံဂှ် ဒပ်ကံၚ်ဇြဳပၞာန် ကော်ဏာလဝ် ဒၞါဲစၟဳတ် မွဲတဲဓဝ်တုဲ ကဵုဂြောဝ်ဂတာတံဂှ်လေဝ် ဟွံဂွံအဆက်ဏီပုဟ်ဂှ် ဂွံတီကေတ်ရ။
တုဲကၠုၚ်ပ္ဍဲသၞာံ ၂၀၂၃ အပ္ဍဲဂိတုဒဳဇြေမ်ဗာ ပ္ဍဲကဵုဍုၚ်ဇြပ်ဗုဂှ် ကောန်ဒပ် PDF မွဲတၠ ဒးဒုၚ်ရပ်ဒက်လဝ်တုဲ ဒပ်ကံၚ်ဇြဳပၞာန် ရပ်ဒက်လဝ် ညးဒေသ ဟွံအောန်နူကဵု ၆၀ တုဲ ပ္ဍဲကဵုဏံ ပံက်လဝ်ဂဗုတ် ကုညးဒေသ ဗ္ဒါဲ ၂၀ နကဵုသၞောဝ်ဗ္တိုက်သ္အးပကီုပရာပ်ရ။
အတိုၚ်တၚ်နၚ် ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPP ဂှ်မ္ဂး အပ္ဍဲကာလသီအဝဵုဏံ မၞိဟ်ဒးဒုၚ်ရပ် ပ္ဍဲတွဵုရးဍုၚ်မန်ဂှ် ၈၀၀ ပြၚ် နွံကၠုၚ်ဂှ် လလောၚ်ပ္တိတ်လဝ် လိက်ဒုၚ်စဳရေၚ် ပ္ဍဲဂိတုဂျာန္နဝါရဳ ၂၂ တေံရ။
ပရိုၚ်−သြၚ်လောန်တိုၚ်(မ်)
ဗီု−CJ