ဒပ် BGF သၟဝ်ပၠတရဴသ္ကိုပ်ဗိုလ်ဇၞော်သဝ်ချေတ်တူ  ပါ်တိတ်နူသၟဝ်တဲကံၚ်ဇြဳပၞာန်

မတ်မလီု၊ ဂျာန္နဝါရဳ ၂၄

ဒပ်မၚ်ပယျဵုကရေၚ် BGF သ္ကိုပ်ဗိုလ်ဇၞော် သဝ်ချေတ်တူ သ္ကိုပ်သ္ကဂှ်ဝွံ ကြဴနူဆဵုဂဗသဳကၠဳလဝ်ကဵု ကံၚ်ဇြဳပၞာန် ဟွံပြေပြံၚ်တုဲဂှ် ပါ်တိတ်နူဒပ်ကံၚ်ဇြဳပၞာန်တုဲ ဒတူလိုၚ်အာတၞဟ်ခြာဏောၚ်ဂှ် ဂၠိုက်ဂၠါဲဂွံတီကေတ် နူကဵုပရိုၚ်တမ်ရိုဟ် မစုက်လုက်ကဵု BGF တံရ။

တုဲကၠုၚ် ပ္ဍဲဂိတုဂျာန္နဝါရဳ ၁၅ တေံ ပ္ဍဲတွဵုရးကရေၚ် ပွိုၚ်ဍုၚ်လိုၚ်ဗၠဲဂှ် သ္ကိုပ်ရးဌာန်ဂအုပ်ပၞာန်ရးအဂၞဲ ကေုာံ ညးအုပ်ကာနာနာ ဒပ်မၚ်ပယျဵုကရေၚ် BGF သ္ကိုပ်ဗိုလ်ဇၞော်သဝ်ချေတ်တူတံ ဆဵုဂဗသဳကၠဳလဝ်တုဲ သဳကၠဳလဝ် ကိစ္စစပ်ကဵုကမၠောန်ဝေၚ်ၛၚ်လံၚ်သြန် ဗ္ဒါဲပယျဵု၊ ဂိုဏ်လီဠာန်သြန် (ကျားဖြန့်) ကေုာံ ကိစ္စစပ်ကဵုပရေၚ်ပၞာန်တံရ။

သ္အာၚ်နူဂှ်ပၠန် ပ္ဍဲဂိတုဂျာန္နဝါရဳ ၁၉ ဂှ်လေဝ် ဝန်ဇၞော်လလောၚ်ပရိုၚ် သၟဝ်တဲကံၚ်ဇြဳပၞာန် ဥူမာၚ်ၚ်ဥုံ ကေုာံ သ္ကိုပ်ဝန်ဇၞော်တွဵုရးကရေၚ်တံ သ္ကိုပ်သ္ကဂှ်ကဵု BGF သဝ်ချေတ်တူတံ ကၠောန်ဗဒှ်လဝ် ပရေၚ်ဆဵုဂဗသဳကၠဳဂှ် ဂွံတီကေတ် အတိုၚ်ပရိုၚ်တမ်ရိုဟ်အပ္ဍဲဒေသတံရ။

အတိုၚ်ပရေၚ်ဆဵုဂဗသဳကၠဳဂှ်မ္ဂး သ္ကိုပ်ရးဒိုဟ်အဂၞဲကံၚ်ဇြဳပၞာန်ဝွံ စန်ဒက်လှေံလှန်ဒၟံၚ် BGF သဝ်ချေတ်တူ သၠုၚ်ပ္တိုန်ကဵုကဆံၚ် ဒဵုကဵုဂအုပ်ဗိုလ်ဏောၚ်တုဲ ပ္ဍဲကဵုကိစ္စစပ်ကဵုလ္ပာ်ပၞာန်တံဂှ်လေဝ် နကဵုဂကောံဒပ် BGF သွက်ဂွံရီုဗၚ်ထံက်ပၚ်ကဵုဇြဟတ်ဒပ် ကုဒပ်ပၞာန်တံဂှ် အာတ်မိက်လဝ်ရောၚ် ဂွံတီကေတ် နူကဵုပရိုၚ်တမ်ရိုဟ် မစုက်လုက်ကဵု BGF တံရ။

ပ္ဍဲကဵုပရေၚ်ဆဵုဂဗသဳကၠဳ အကြာကံၚ်ဇြဳပၞာန် ကေုာံ BGF တံဂှ် အရာဟွံပြေပြံၚ်တံ က္တဵုဒှ်လဝ်တုဲ BGF ဝွံ ဟွံမံၚ်သၟဝ်တဲ ကံၚ်ဇြဳပၞာန်ရတုဲ သြန်ဂိတုဇွောံမတံဂှ်လေဝ် ဟွံကေတ်ရတုဲ ဒတူလိုၚ်အာ နဒဒှ်ဂကောံတၞဟ်ခြာမွဲဏောၚ်ဂှ် သ္ကိုပ်ဗိုလ်ဇၞော် သဝ်ချေတ်တူ ဟီုဂးလဝ်ဂှ် ပရိုၚ်တမ်ရိုဟ် မစုက်လုက်ကဵု BGF တံ သ္ဂးလဝ်ရ။

“ပပဵုပ္တိုန်ကဵု ကဆံၚ်ဂအုပ်ဗိုလ်ဏောၚ်။ သဝ်ချေတ်တူဂှ် ဟွံဒုၚ်တဲပုဟ်။ တုဲပၠန် သၟဝ်တဲကံၚ်ဇြဳပၞာန်ဂှ် ဟွံမံၚ်ရပုဟ်။ ဒတူလိုၚ်အာ ညံၚ်ရဴဂကောံ DKBA ဂကောံ PC (ကံၚ်ဇြဳပရေၚ်ၜိုဟ်လလမ်ကရေၚ်) တံတုဲ မံၚ်အာဏောၚ်” ဂှ် ပရိုၚ်တမ်ရိုဟ် မစုက်လုက်ကဵု BGF တံ သ္ဂးရ။

ကြဴနူဆဵုဂဗသဳကၠဳကဵု ကံၚ်ဇြဳပၞာန်တုဲဂှ် က္ဍိုပ်သ္ကိုပ် BGF သ္ကိုပ်ဗိုလ်ဇၞော် သဝ်ချေတ်တူဝွံ စဴကၠုၚ်ဍုၚ်တၟိ ယှိုဲကုက္ကိုလ်ညးတုဲ ကၠောန်သ္ပဏာလဝ် ပရေၚ်ဆဵုဂဗသဳကၠဳ ကုသ္ကိုပ်ဒပ် BGF တုဲ ညးဝွံ ဒဒှ်ရဟွံမံၚ်သၟဝ်တဲ ဒပ်ပၞာန်ရဂှ်ကဵု ဟွံကေတ်ဇွောံမသြန်ဂိတုတံရပုဟ်ဂှ် ကဵုလဝ်သမ္တီ ကုသ္ကိုပ်ဒပ်ညးဂမၠိုၚ်ဂှ် ဂွံတီကေတ် နူကဵုပရိုၚ်တမ်ရိုဟ် မစုက်လုက်ကဵု BGF တံရ။

သ္အာၚ်နူဂှ်ပၠန် BGF သဝ်ချေတ်တူဝွံ ကြဴနူဆဵုဂဗသဳကၠဳကဵု ကံၚ်ဇြဳပၞာန်တုဲဂှ် ကလေၚ်ကော်လဝ် ကောန်ဒပ် BGF ဗွဲမဂၠိုၚ်ဂၠေၚ် စိုပ်ဒၟံၚ်အပ္ဍဲဒေသဘာပန် ကမမံၚ် တိဍာ်ဒပ်မဟာ ၅ KNU တံဂှ်တုဲ ကလေၚ်ဖျေံလဝ်ဒၞါဲ ပ္ဍဲကဵုဍုၚ်ယှိုဲကုက္ကိုလ်ဂှ် ဂွံတီကေတ် ဇရေၚ်ပရိုၚ်တမ်ရိုဟ် BGF တံရ။

ပ္ဍဲကဵုဒၞါဲ ဒပ်မၚ်ပယျဵု BGF တံ ထိၚ်ဒက်လဝ် ဗ္ဒါဲဍုၚ်ယှိုဲကုက္ကိုလ်တၟိဂှ် ဂကောံဒပ်ပံၚ်ကောံပၠန်ဂတး ဗိုလ်အေဝ်သေဝါတံ သ္ကိုပ်သ္ကဂှ် တုဲကၠုၚ်အပ္ဍဲသၞာံ ၂၀၂၃ ဂိတုဨပရဴတေံ လုပ်စိုပ်ဗ္တိုက်လဝ်တုဲ ဍုၚ်ယှိုဲကုက္ကိုလ် ကေုာံ ဒၞါဲပွဳပွူဗ္ဒါဲဗ္ဒါဲတံ ညံၚ်ဂွိုအ်ထပ်ဒးဒုၚ်ဗ္တိုက်ဂှ် BGF တံ ဒက်လဝ်ဂဒုက်တံတုဲ ထပ်ဗပေၚ်လဝ်ဇြဟတ်ဒပ်တံရ။

သ္အာၚ်နူဂှ်ပၠန် ပ္ဍဲကဵုဒေသယှိုဲကုက္ကိုလ်ဂှ် ဂကောံဒပ် BGF တံ ဗပေၚ်ဒၟံၚ်ဇြဟတ်ဒပ်တံ နွံဒၟံၚ်တုဲ ဟိုတ်နူအကာဲအရာကြံၚ်မ္ၚိုဟ် မက္တဵုဒှ်ဒၟံၚ်ပြဟ်ဟ်ဏံတုဲ ပ္ဍဲကဵုယှိုဲကုက္ကိုလ်ဂှ် နူဂိတုဂျာန္နဝါရဳ ၂၀ စဵုကဵု ၃၁ သွက်ဂွံဝေၚ်ပါဲစသတ်မၞုံကဵုလမျီုတံဂှ် BGF ပ္တိတ်လဝ်အမိၚ်ဂှ် ဂွံတီကေတ် နူကဵုညးဒေသတံရ။

ဒပ်မၚ်ပယျဵုကရေၚ် BGF တံဝွံ ဒှ်ဒပ်သၟဝ်တဲကံၚ်ဇြဳပၞာန်မွဲတုဲ ပ္ဍဲကဵုပေါဲဗ္တိုက် နူအပ္ဍဲတွဵုရးဍုၚ်မန်၊ တွဵုရးကရေၚ်တံဂှ် ပံၚ်တောဲကဵု ကံၚ်ဇြဳပၞာန်တုဲ ထ္မံက်ပၞာန်ထ္ပက် ဘိုၚ်ဗ္တိုက်ဒၟံၚ် ဂကောံဒပ်ပံၚ်ကောံပၠန်ဂတးတံရ။

ဗ္ဒါဲဍုၚ်ဗြဝတဳ ပယျဵုသေံဗၟာ ဒၞါဲ BGF ထိၚ်ဒက်လဝ် ဍုၚ်ယှိုဲကုက္ကိုလ်တၟိကဵု ကိုန်စဳမာန်ဍုၚ်တၟိ KK Park တံဂှ် သွက်ဂွံဗ္တိုက်သရိုဟ်အာ ကမၠောန်ရာဇဝတ် ကေုာံ ဂိုဏ်လီဠာန်လှုဲ (ကျားဖြန့်) ကမၠောန်ဝေၚ်ၛၚ်လံၚ်သြန်အောန်လာၚ်တံမာန်ဂှ် အလဵုအသဳသေံ ဆဵုဂဗသဳကၠဳလဝ် ကုကံၚ်ဇြဳပၞာန် အာတ်မိက်လဝ်တံလေဝ် နွံဒၟံၚ်ရ။

စပ်ကဵုကိုန်စဳမာန် ဍုၚ်တၟိယှိုဲကုက္ကိုလ်ဏံဂှ်တုဲ က္ဍိုပ်သ္ကိုပ် BGF သဝ်ချေတ်တူကီု လ္ပာ်က္ဍိုပ်သ္ကိုပ်လ္ၚဵုတံ သွက်ဂွံနုက်တိတ်ဂှ် အပ္ဍဲသၞာံ ၂၀၂၀ တုဲကၠုၚ်တေံ ဒပ်ပၞာန်ဗၟာ ကဵုလဝ်ဇြဟတ်ဂရိုဟ်ကီုလေဝ် သ္ကိုပ်ဗိုလ်ဇၞော် သဝ်ချေတ်တူဝွံ တမ်ဒပ် BGF ညးသ္ကိုပ်သ္ကဒၟံၚ်သီုဖအိုတ် သွက်ဂွံနုက်တိတ် ပ္တိုန်လဝ်လိက်တုဲ ဒပ်ပၞာန်ဟွံဒုၚ်တဲ တးပါဲလဝ်တုဲ ကဵုမံၚ်လဝ် အတိုၚ်ဒပ်မၚ်ပယျဵုတြေံ BGF ကၠာတေံ မဒှ်ရ။

ညးအုပ်ကာနာနာ BGF သ္ကိုပ်ဗိုလ်ဇၞော် သဝ်ချေတ်တူဝွံ ပ္ဍဲကဵုဒပ်မၚ်ပယျဵုကရေၚ် BGF ဂှ် ဒှ်အဝဵုသြဇာကၟောန်ဓရန် ဒြပ်ကသပ်သိုက်လောဲမွဲတၠတုဲ အလဵုက္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ် ပအပ်ပြာပ်ကဵုလဝ် သဝ်ချေတ်တူ တဆိပ်ကြာ (သီရိပျံချီ) မဒှ်ရ။

ပရိုၚ်−သြၚ်လောန်တိုၚ်(မ်)

ဗီု−cj