ရေဝ်၊ ဂျာန္နဝါရဳ ၂၅
တွဵုရးဍုၚ်မန် ပ္ဍဲပွိုၚ်ဍုၚ်ရေဝ် ကောန်သ္ဂံၚ်ဒပ်စဵုဒၞါၜိုဟ်လလမ်ကောန်ဂကူမန် မပြံၚ်လှာဲလဝ် နဒဒှ်ပၞာန်ပျဳတုသေတ်ကံၚ်ဇြဳပၞာန် ၃ တၠ ဒးဒုၚ်ကြတ်ဗ္တိုက်လဝ်အကြာဂၠံၚ်တုဲ ချိုတ်အာလဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂိတုဂျာန္နဝါရဳ ၂၄ အခိၚ်နူဂယး ၜိုတ် ၈ နာဍဳ ကောန်ဒပ်စဵုဒၞါၜိုဟ်လလမ်ကောန်ဂကူမန် ၃ တၠ ဂွံအာရာန်ဖျာ ပ္ဍဲကွာန်ဇီုသာဲ အခိၚ်တိတ်ကၠုၚ် ကဵုကွဳစက်မွဲဖ္ဍိုက်ဂှ် ဂကောံလကိုဟ်ဍုၚ်ရေဝ်တံ ကြတ်ဗ္တိုက်လဝ် ဗ္ဒါဲခဠာတ်မခ္ဍံကျာ ကွာန်ဇီုသာဲရ။
ဟိုတ်နူဒးဒုၚ်ကြတ်ဗ္တိုက်လဝ်ဂှ်တုဲ ပါလုပ်သီုကဵု ဗိုလ်ဒပ်စဵုဒၞါၜိုဟ်လလမ်ကောန်ဂကူမန်မွဲတၠဂှ် သ္ဂံၚ် ၃ တၠ ချိုတ်တုဲ ဂကောံလကိုဟ်ဍုၚ်ရေဝ်တံ သီဂွံဏာလဝ် လွဟ်လက်နက်မကမ်တံဂှ်လေဝ် ဂွံတီကေတ်ရ။
အတိုၚ်ဂလာန်ညးဒေသတံဂှ်မ္ဂး ဇွကောန်ဒပ်စဵုဒၞါၜိုဟ်လလမ်ကောန်ဂကူမန် ၃ တၠဂှ် စဵုကဵုလဒေါဝ်တ္ၚဲဂှ် ကၠုၚ်စိုပ်ကပှ်လဝ် ဟွံမွဲဏီပုဟ်ဂှ် သ္ဂးရ။
ကောန်ဂကောံဒပ်စဵုဒၞါၜိုဟ်လလမ်ကောန်ဂကူမန် ဒးဒုၚ်ဗ္တိုက်တံဂှ်ဝွံ ကေတ်လဝ်ဂီုကၠီု သွက်ကံၚ်ဇြဳပၞာန် ပ္ဍဲဒဒန်ခါန်သေမ် အကြာကွာန်ရုတ်တံၚ်ကဵု ကွာန်ဇီုသာဲဂှ်တုဲ ကွဳစက်အာတရဴတံဂှ်လေဝ် စၟဳတ်ကီု ကံက်အခေါန်တံကီုဂှ် ကၠောန်ၜိုတ်ဒၟံၚ်ရ။
စပ်ကဵုလၟေၚ်ဒဒှ်သ္ဂံၚ် ၃ တၠ ဒးဒုၚ်ဗ္တိုက်ဂှ်တုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်သၟုက်လဝ် ညးမၞုံအခေါၚ်ဟီုဂး ဂကောံဒပ်စဵုဒၞါၜိုဟ်လလမ်ကောန်ဂကူမန် သ္ကိုပ်ဗိုလ်ဇၞော် နာဲဆာန်လွဳကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။
ဂကောံဒပ်စဵုဒၞါၜိုဟ်လလမ်ကောန်ဂကူမန်ဝွံ ပါ်တိတ်နူဗော်ဍုၚ်မန်တၟိတုဲ ပ္ဍဲသၞာံ ၂၀၁၀ ဂိတုအံက်တဝ်ဗာ ၁၀ ဂှ် လုပ်စိုပ်ဖျေံလဝ်လွဟ် ဇရေၚ်ဌာန်ဂအုပ်ပၞာန်ရးအဂၞဲ ဇြဟတ်ဒပ် ၂၆၈ တၠ၊ လွဟ်ဍောတ်လွဟ်ဇၞော် ၇၂ ဇကိုအ်ရ။
ကြဴနူသၠးကၠေံလွဟ်တုဲ ပေၚ် ၁၂ သၞာံ ပ္ဍဲသၞာံ ၂၀၂၂ ဂိတုအံက်တဝ်ဗာ ၁၀ ဂှ် ဒဒှ်ရပြံၚ်လှာဲဒက်ပ္တန် နဒဒှ်ပၞာန်ပျဳတုသေတ် ကံၚ်ဇြဳပၞာန်ဂှ် ဂကောံဒပ်စဵုဒၞါၜိုဟ်လလမ်ကောန်ဂကူမန် လလောၚ်တြးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media