မတ်မလီု၊ ဂျာန္နဝါရဳ ၂၅
ပရေၚ်ကြုက်လုပ်စိုပ်ပ္ညဳပ္ညပ်အကြာဂှ်ကဵု တၚ်တုပ်စိုတ်ဟိုၚ်ဂေန် ပရေၚ်ဒေါအ်ပန်ပှော်ဂှ် ဒၟါနူကံၚ်ဇြဳပၞာန် မိက်ဂွံကဵုကဝ်လီုလာ်အာတုဲ နကဵုတၚ်ရန်တၟံနွံနွံ ဂၠါဲဒၟံၚ်သၞတံဂှ် ဂကောံမဟာမိတ်ကောဒေံပိဂကောံ ဒးအေၚ်ဒုၚ်ဒၟံၚ်ရောၚ် ဟီုပ္တိတ်ကၠုၚ်ရ။
ဂကောံမဟာမိတ်ကောဒေံပိဂကောံ ဂကောံကဝ်က MNDAA, ဂကောံတအာၚ် TNLA ၊ ဂကောံရခေၚ် AA တံဝွံ ဟိုတ်နူအေၚ်ဒုၚ်ဒၟံၚ် ပရေၚ်ဗ္တိုက်ကံၚ်ဇြဳပၞာန်တံဂှ်တုဲ ပေါဲဗ္တိုက် ဟွံသၠဲလးအာဂှ် သ္ဂးရ။
ပရေၚ်ပၞာန် ၁၀၂၇ စဵုကဵု ၈၈ တ္ၚဲ ဂိတုဂျာန္နဝါရဳ ၂၂ ဂှ် ဂကောံကောဒေံပိဂကောံတံ ထ္ပက်ပၞာန်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် ရးသေံသၟဝ်ကျာတံဂှ်ကီုလေဝ် လ္ပာ်ကံၚ်ဇြဳပၞာန် ဟိုတ်နူဗ္တိုက်လဝ်နကဵုက္ၜၚ်ကျာ ကေုာံ ကြတ်ဗ္တိုက်လဝ် ပ္ဍဲဗလးတိတံဂှ်တုဲ ပ္ဍဲဒေသတအာၚ်ဂှ် ပေါဲဗ္တိုက်တံ က္တဵုဒှ်ဒၟံၚ်ရ။
ကံၚ်ဇြဳပၞာန်ဝွံ ဝးပ္ကဝ်တၚ်တုပ်စိုတ်ဟိုၚ်ဂေန်တုဲ ဒၞါဲဒပ်ပၞာန်တအာၚ် TNLA နွံ အကြာမိုဝ်ကုတ်ကဵု မိုဝ်မုက် ပ္ဍဲ ၈ မိုၚ်ဂှ် စထ္ပက်ပၞာန်ဗ္တိုက်လဝ်တုဲ ပေါဲဗ္တိုက်ဆေၚ်မုက်ၜါလ္ပာ်တံ က္တဵုဒှ်ဒၟံၚ်ရောၚ် ဂကောံမဟာမိတ်ကောဒေံပိဂကောံ လလောၚ်ပ္တိတ်လဝ်ရ။
ဆ္ဂး ဟိုတ်နူတၚ်တုပ်စိုတ်ဟိုၚ်ဂေန် သီုဒပ်ၜါလ္ပာ် ထ္ပက်လဝ်စၟတ်တဲဂှ်တုဲ လ္ပာ်ဂကောံမဟာမိတ်ကောဒေံပိဂကောံတံ စထ္ပက်ပၞာန်ဗ္တိုက်လဝ် ကုန်ဗျူဟာ၊ ဗ္ဒိုပ်ဒပ် ကံၚ်ဇြဳပၞာန် ရးသေံသၟဝ်ကျာတံဂှ် ဟွံမွဲရ။
ဒံက်တာလှကျဝ်ဇြဝ် ညးစိုန်သ္ကီုပရေၚ်ကြုက်ဂှ် နကဵုဂကောံကောဒေံပိဂကောံ အေၚ်ဒုၚ်ဒၟံၚ် ပရေၚ်ဂၠါဲသၞကံၚ်ဇြဳပၞာန် ပ္ဍဲရးသေံသၟဝ်ကျာဂှ်ဝွံ ပလေဝ်ပလေတ်ဒၟံၚ် သွက်ပေါဲဗ္တိုက်ဂတနူဏံလေဝ် ဒှ်မာန်တုဲ စဝးပ္ကဝ်တၚ်တုပ်စိုတ်ဂှ် ဒှ်ကံၚ်ဇြဳပၞာန်ဏောၚ် မိက်ကဵုထ္ၜးစ ကုကြုက်ဂှ်လေဝ် သ္ၚဳဂၠိပ်လဝ်ရ။
“ညးတံ ( ဂကောံကောဒေံပိဂကောံ) ပလေဝ်လဝ် သွက်ပေါဲဗ္တိုက်ဂတဏံလေဝ် ဒှ်မာန်ရ။ ကဵုဒပ်ညးတံ ဇူလဝ်လဝ်ဒှ်မာန်ဏောၚ်။ ဗပေၚ်လဝ်လွဟ်လက်နက် အရာမနွံပၟိက်တံ ဒှ်မာန်ဏောၚ်။ ကလေၚ်လွဳ မၞိဟ်ဂွံလဝ်ဝပ်တံ မုတံ ဒှ်မာန်ဏောၚ်။ မွဲပၠန်ဂှ် ဒၞါဲဂွံလဝ်တံဂှ်လေဝ် ညံၚ်ဂွံခိုၚ် ဒးကၠောန်ဒၟံၚ်ဏီဏောၚ်။ မူဟိုတ်ရောဟီုတှ်ေ သီဗ္ဒိုပ်ဒပ်မွဲတုဲယျဟီုမ္ဂး ဗ္ဒိုပ်ဏံ ညံၚ်ဂွံခိုၚ်ကၠောန်တုဲမှ ဒးတိုန်မွဲကဆံၚ်ပၠန်ဏောၚ်။ အေ ဂှ်တှ်ေ ဂကောံသ္ကုတ်သၟဝ်ကျာပိဂကောံတံ ကၠောန်ဒၟံၚ်ညအ်ဏောၚ်ဂှ်လေဝ် မိက်ဂွံထ္ၜးစဏောၚ်။ မွဲပၠန်ဂှ် ယဝ်ရထပ်ဗ္တိုက်ကၠုၚ်မွဲဗလးပၠန်မ္ဂး ဟီုဂွံရ။ ညးတံဟွံဗ္တိုက်တုဲမံၚ်ဒၟံၚ်ကီုလေဝ် စဖံက်ပ္ကဝ်ဂှ် ဒှ်ကံၚ်ဇြဳပၞာန်ဏောၚ် ဟီုသာ်ဏံဂွံရ” သ်ာဝွံ သ္ဂးရ။
လ္ပာ်ကံၚ်ဇြဳပၞာန်ဂှ်လေဝ် မိက်ဂွံကလေၚ်ပကောံဇြဟတ်လေဝ် ဒှ်တုဲ ဒှ်ရဲမိက်ဂွံဂွံပရေၚ်ၜိုဟ်လလမ် ဟွံသေၚ်ဂှ်ရ ကလေၚ်ပါ်ထ္ကးဆီ ဂကောံပၠန်ဂတးတံ နကဵုနဲဗျူဟာမွဲမွဲတုဲ ယဝ်ရဂွံစေဝ်လ္တူမ္ဂး ကလေၚ်ဗ္တိုက်ပၠန်ဏောၚ်ဂှ် ဒံက်တာလှကျဝ်ဇြဝ် သ္ပလဝ်တၚ်စၟတ်ရ။
ပ္ဍဲဂိတုဂျာန္နဝါရဳ သတ္တာဟဒုတိယဂှ် ညးစၞးကမ္မတဳပ္ညဳပ္ညပ်ပရေၚ်ၜိုဟ်လလမ် ကံၚ်ဇြဳပၞာန် (NSPNC) ကေုာံ ဂကောံမဟာမိတ်ကောဒေံပိဂကောံတံ အပ္ဍဲပေါဲသဳကၠဳဆဵုဂဗ အလန်တတိယ ပ္ဍဲဍုၚ်ကူမေန်ဂှ် တုပ်လဝ်စိုတ် ၜါတၚ် သီုၜါဂကောံ ဒးဒ္ဂေတ်ဗက်တံဂှ်ရ။
ပ္ဍဲကဵုတၚ်တုပ်စိုတ်ဏံဂှ် ဂကောံမဟာမိတ်ကောဒေံပိဂကောံတံ ညံၚ်ဂွိုအ်စဒး ပရေၚ်ဗ္တိုက်ထ္ပက်ပၞာန် ကုန်ဗျူဟာ၊ ဗ္ဒိုပ်ကံၚ်ဇြဳပၞာန် မၞုံရးသေံသ္ကုတ်သၟဝ်ကျာဂှ်ကီု၊ လ္ပာ်ကံၚ်ဇြဳပၞာန်ဂှ်လေဝ် ဒၞါဲဇကုတံ ထိၚ်ဒက်သီဂွံလဝ် ပ္ဍဲကဵုဒေသဏံသီုဖအိုတ်ဂှ် ညံၚ်ဂွိုအ်ဗ္တိုက်ပန်ပှော် နကဵုလွဟ်ဇၞော် ကေုာံ ကဵုက္ၜၚ်ကျာတံ မဒှ်ရ။
ဒပ်ၜါလ္ပာ်တံ ကြဴနူလလောၚ်တြး ဒေါအ်ပန်ပှော်ယာယဳတုဲဂှ် ပ္ဍဲဂိတုဂျာန္နဝါရဳ ၁၂ တေံ ကံၚ်ဇြဳပၞာန် ပန်ပှော်ဗ္တိုက်လဝ် ကွာန်လ္ၚဵုလ္ၚဵု ပ္ဍဲပွိုၚ်ဍုၚ်မိုဝ်ကုတ်၊ သဳပဝ်၊ ကျံက်မေဝ်၊ လာယှိုဝ် မၞုံရးသေံသၟဝ်ကျာဂှ် TNLA လလောၚ်ပ္တိတ်လဝ်ရ။
စနူအခိၚ်ဂှ်တုဲ ပ္ဍဲကဵုဒၞါဲဒေသကဝ်က ဂကောံကဝ်က MNDAA တံဖျေံလဝ်ဒပ်ဂှ်ကီု ပါလုပ်သီုကဵုပွိုၚ်ဍုၚ်၊ ကွာန်ရး ဒၞါဲဒပ် TNLA ရးသေံသၟဝ်ကျာတံဖျေံလဝ်ဒပ်တံဂှ် ဒပ်ကံၚ်ဇြဳပၞာန် ကၠောန်သ္ပဗ္တိုက်ထ္ပက်ကၠုၚ်ပၞာန်တံဂှ် ဂကောံကောဒေံပိဂကောံ သ္ဂးလဝ်ရ။
ညးခါတ်အကာဲပရေၚ်ပၞာန်တံဂှ် နကဵုဂကောံကောဒေံပိဂကောံ ဂွံထိၚ်ဒက် ဍုၚ်လာယှိုဝ် ရးသေံသၟဝ်ကျာ သီုဖအိုတ်မာန် ပလေဝ်ပလေတ်ဒၟံၚ်ပရေၚ်ပၞာန်တံမာန်ဂှ်ရ ပြဟ်ဟ်ဏံ ပေါဲဗ္တိုက်သီဗ္ဒိုပ်၊ သီဍုၚ် အပ္ဍဲကဵုဒေသတံဏံ ဒေါအ်ဒေၚ်ဒၟံၚ်ရောၚ် ထံက်ထ္ၜးလဝ်အိုတ်ရ။
မွဲလ္ပာ်ပၠန်ဂှ် နကဵုဂကောံကောဒေံပိဂကောံ ဒေါအ်လဝ်ပန်ပှော် ကုကံၚ်ဇြဳပၞာန် ပ္ဍဲကဵုရးသေံသ္ကုတ်သၟဝ်ကျာဂှ်ဝွံ တိဍာ်ညးတံ သီဂွံထိၚ်ဒက်လဝ်တံဂှ် သွက်ဂွံထ္မံက်ယန္တယာပရေၚ်အုပ်ဓုပ်တံ ဗွဲမစှ်ေကဵုသၞောတ်မာန်ဂှ် အခေါၚ်အရာနွံကၠုၚ်ရ။
သွက်ကံၚ်ဇြဳပၞာန် ဒးဗလးလဝ်တဲ ဗ္ဒိုပ်ဒပ်တံ ဍုၚ်တံဂှ် ၜိုန်ရဒေါအ်ကၠေံ အသိၚ်ပရေၚ်ပၞာန် ၁၀၂၇ ပ္ဍဲရးသေံသၟဝ်ကျာမာန်ကီုလေဝ် သွက်ဂွံဒေါအ်ဒေၚ်ကဵု အသိၚ်ပၞာန်ပၠန်ဂတး ဂကောံဇြဟတ်ပၠန်ဂတးတၞဟ်ဟ်တံ အလုံဍုၚ်မွဲဂှ် ဟီုဟွံဂွံပုဟ်ဂှ် Myanmar Peace Monitor သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media