သဵုလ်၊ ဂျာန္နဝါရဳ ၂၅
တိုၚ်တၟံစၟတ်သမ္တီ မဒှ်သၚ်္ကေတ ကလေၚ်ပံၚ်ကောံ ကုကိုဝ်ရဳယျာသၠုၚ်ကျာ မၞုံပ္ဍဲဍုၚ်ပျုၚ်ယာန်၊ ဍုၚ်ကိုဝ်ရဳယျာသၟဝ်ကျာဂှ် သရိုဟ်ဖျေံပလီုထောံလဝ် နကဵုအမိၚ်က္ဍိုပ်သ္ကိုပ်ကေန်ဂျုၚ်အာန်ဂှ် ဂွံတီကေတ်ရ။
ကၠာဂွိုအ်သရိုဟ်ဖျေံ တိုၚ်တၟအ်စၟတ်သမ္တီဂှ် ဍုၚ်ကိုဝ်ရဳယျာသၠုၚ်ကျာဝွံ ဒှ်ကၠုၚ်ဒၟံၚ်သၞကိုဝ်ရဳယျာသၟဝ်ကျာအဓိကတုဲ ဂွံကလေၚ်ပံၚ်ကောံ သာ်လဵုမှဒှ်ဟွံမာန်ရပုဟ်ဂှ် က္ဍိုပ်သ္ကိုပ်ကေန် သ္ဂးလဝ်ရ။
တုဲကၠုၚ် ပ္ဍဲဂိတုဂျာန္နဝါရဳ ၂၃ တေံ ပ္ဍဲကဵုဗီုဂြိုဟ်ပ္တောံ မတက်လဝ် ဍုၚ်ပျုၚ်ယာန်ဂှ် ပ္ဍဲသၞာံ ၂၀၀၀ ကြဴနူၜါဍုၚ်ကၠောန်သ္ပသဳကၠဳတုဲဂှ် တိုၚ်တၟအ်မဒက်ပ္တန်လဝ်ဂှ်ဝွံ ဟွံမွဲဒၞါဲဂှ်ရပုဟ်ဂှ် ထ္မံက်ထ္ၜးလဝ် ပ္ဍဲပရိုၚ် NK News မဒှ်ဌာန်ပရိုၚ်မၚ်ကျောဝ်ဒၟံၚ် ကိုဝ်ရဳယျာသၟဝ်ကျာဂှ်ရ။
တိုၚ်တၟအ်စၟတ်သမ္တီ ကော်ဂးတိုၚ်တၟအ်ကလေၚ်ပံၚ်ကောံ ပံၚ်ကုပ်ဂှ် စပ်ကဵုအကာဲအရာ လ္ပာ်ကိုဝ်ရဳယျာသၟဝ်ကျာတံ သရိုဟ်ဖျေံဂှ်တုဲ ဌာန်ပရိုၚ်ရာ်တာ သ္ပဒတန်ဟွံမာန်ဏီပုဟ်ဂှ် ထ္မံက်ထ္ၜးလဝ်ရ။
တိုၚ်တၟအ်စၟတ်သမ္တီဏံဝွံ သမၠုၚ် ၃၀ မဳတာနွံတုဲ ရန်ကဵု သွက်ၜါဍုၚ်ဂွံကလေၚ်ပံၚ်ကောံ၊ ညံၚ်ဂွံသ္ပပဓာန်ဇကုဇကုမာန်၊ သွက်ဂွံပံၚ်တောဲရေၚ်တၠုၚ် ပရေၚ်ၜိုဟ်လလမ် ကေုာံ ပရေၚ်ဂကူတံတုဲ ဒက်ခၞံလဝ်ဂှ် ဂွံတီကေတ် အတိုၚ်တၚ်နၚ် အလဵုအသဳလ္ပာ်သၠုၚ်ကျာရ။
သမ္မတကိုဝ်ရဳယျာသၠုၚ်ကျာ ယောန်သက်ယောဂှ် သွက်ဂွံကလေၚ်ခၠေဝ် ကုပရေၚ်ချဳဒရာၚ်ပရေၚ်ပၞာန် ကိုဝ်ရဳယျာသၟဝ်ကျာဂှ် ကဵုလဝ်အမိၚ်ရောၚ် ဂွံတီကေတ်ရ။
ကိုဝ်ရဳယျာသၟဝ်ကျာဂှ် ယဝ်ရဒပ်ကိုဝ်ရဳယျာသၠုၚ်ကျာ ကေုာံ အမေရိကာန်တံ ကၠုၚ်ဗ္တိုက်ဇကုတံမ္ဂး ၚးတးအာကိုဝ်ရဳယျာသၠုၚ်ကျာဏောၚ်ဂှ် ဘပဠလဝ်ရ။
တၚ်တုပ်စိုတ် ထ္ပက်လဝ်စၟတ်တဲ ကဵုကိုဝ်ရဳယျာသၠုၚ်ကျာ သၞာံ ၂၀၀၈ ရန်တၟံ သ္ဂောံဖအောန်ဖျေံ ပရေၚ်ကြံၚ်မ္ၚိုဟ်ပရေၚ်ပၞာန်ၜါဍုၚ်ဂှ်ဝွံလေဝ် ဟွံလုပ်အဝေါၚ်ရပုဟ်ဂှ် ကိုဝ်ရဳယျာသၟဝ်ကျာ လလောၚ်တြးလဝ် ပ္ဍဲကၞောတ်သၞာံတုဲကၠုၚ်တေံရ။
ပ္ဍဲဂိတုဂျာန္နဝါရဳ ၂၄ ဂှ်လေဝ် ကိုဝ်ရဳယျာသၟဝ်ကျာဝွံ ပန်ဗလးလဝ် ကမ်လှောဝ်ခရုသ် ပ္ဍဲၜဳဍာ်မိတ်ရောၚ် ဒပ်ပၞာန်ကိုဝ်ရဳယျာသၠုၚ်ကျာ စောတ်စောဲလဝ်တုဲ ကမ်လှောဝ်ခရုသ် ကိုဝ်ရဳယျာသၟဝ်ကျာပန်ပှော်လဝ်ဂှ်ဝွံ ဟွံပါလုပ် ပ္ဍဲကဵုတၚ်တာဒၞါ ကုလသမဂ္ဂပုဟ်ဂှ် ဂွံတီကေတ်ရ။
Ref: Reuters